ຊຶ່ງໂດຍລວມແມ່ນຍ້ອນສະພາບອັດຕາແລກປ່ຽນທີ່ສືບຕໍ່ມີສະຖຽນລະພາບດີຂຶ້ນ ແລະ ສະພາບການຜະລິດໂດຍສະເພາະສິນຄ້າກະສິກຳ ຍັງສືບຕໍ່ສະໜອງໄດ້ຕາມຄວາມຕ້ອງການ; ພ້ອມນັ້ນ, ລາຄາສິນຄ້ານໍາເຂົ້າ ລວມທັງນໍ້າມັນເຊື້ອໄຟ ຢູ່ຕະຫຼາດໂລກບໍ່ເໜັງຕີງຫຼາຍ.
ໃນເດືອນມັງກອນ ປີ 2025, ອັດຕາເງິນເຟີ້ຂອງ ສປປ ລາວ ຍັງສືບຕໍ່ເໜັງຕີງເພີ່ມຂຶ້ນໃນຈັງຫວະທີ່ຊ້າລົງຈາກເດືອນທັນວາ ປີ 2024, ອັດຕາເງິນເຟີ້ຢູ່ໃນລະດັບ 15.5% (ເດືອນທັນວາ ປີ 2024 ແມ່ນ 16.9%) ເຫັນວ່າຫຼາຍໝວດສິນຄ້າແມ່ນມີການເໜັງຕີງເພີ່ມຂຶ້ນເລັກນ້ອຍ ເມື່ອສັງເກດເບິ່ງໝວດສິນຄ້າທີ່ມີອັດຕາເງິນເຟີ້ສູງກວ່າໝູ່ແມ່ນໝວດທີ່ພັກອາໄສ, ນໍ້າປະປາ, ໄຟຟ້າ ແລະ ເຊື້ອເພີງຫຸງຕົ້ມ ມີອັດຕາເງິນເຟີ້ຢູ່ໃນລະດັບ 24.7%,ຖັດລົງມາແມ່ນໝວດຮັກສາສຸຂະພາບ ແລະ ຢາ ຢູ່ໃນລະດັບ 23.3%, ໝວດການສຶກສາ 22.4%, ໝວດເຄື່ອງໃຊ້ໃນເຮືອນ 22.2%, ໝວດຮ້ານອາຫານ ແລະ ໂຮງແຮມ 20.3%, ໝວດເຫຼົ້າ ແລະ ຢາສູບ 19.4%, ໝວດສິນຄ້າ ແລະ ບໍລິການອື່ນໆ 18.7%, ໝວດສະບຽງອາຫານ ແລະ ເຄື່ອງດື່ມບໍ່ມີທາດເຫຼົ້າ ຊຶ່ງເປັນໝວດສິນຄ້າທີ່ມີນໍ້າໜັກການຊົມໃຊ້ກວມເອົາຫຼາຍກວ່າໝູ່ ມີອັດຕາເງິນເຟີ້ຢູ່ທີ່ລະດັບ 14.4%, ໝວດຄົມມະນາຄົມ ແລະ ການຂົນສົ່ງ ຢູ່ໃນລະດັບ 11.4%.
ຂະນະທີ່ອັດຕາເງິນເຟີ້ປະຈໍາເດືອນກຸມພາ ປີ 2025ກໍໄດ້ສືບຕໍ່ເໜັງຕີງເພີ່ມຂຶ້ນໃນຈັງຫວະທີ່ຊ້າລົງຈາກເດືອນມັງກອນປີນີ້, ອັດຕາເງິນເຟີ້ ຢູ່ໃນລະດັບ 12.7% (ເດືອນມັງກອນ ປີ 2025 ແມ່ນ 15.5%) ຊຶ່ງທຸກໝວດສິນຄ້າ ເໜັງຕີງເພີ່ມຂຶ້ນໃນຈັງຫວະທີ່ຊ້າລົງ; ໃນນີ້, ໝວດສິນຄ້າທີ່ມີອັດຕາເງິນເຟີ້ສູງກວ່າໝູ່ແມ່ນໝວດຮັກສາສຸຂະພາບ ແລະ ຢາ ມີອັດຕາເງິນເຟີ້ຢູ່ໃນລະດັບ 22.7%, ຖັດລົງມາແມ່ນໝວດທີ່ພັກອາໄສ, ນໍ້າປະປາ, ໄຟຟ້າ ແລະ ເຊື້ອເພີງຫຸງຕົ້ມ 21.8%, ໝວດການສຶກສາ 20.7%, ໝວດເຄື່ອງໃຊ້ໃນເຮືອນ 20.3%, ໝວດຮ້ານອາຫານ ແລະ ໂຮງແຮມ 19%,ໝວດສະບຽງອາຫານ ແລະ ເຄື່ອງດື່ມບໍ່ມີທາດເຫຼົ້າ 10.8%, ໝວດຄົມມະນາຄົມ ແລະ ຂົນສົ່ງ 8.7%.
ສຳລັບເດືອນມີນາ ປີ 2025, ສະພາບອັດຕາເງິນເຟີ້ ກໍຍັງສືບຕໍ່ເໜັງຕີງເພີ່ມຂຶ້ນໃນຈັງຫວະທີຊ້າລົງ ມາຢູ່ທີ່ລະດັບ 11.2%; ໃນນັ້ນ, ໝວດສິນຄ້າທີ່ມີອັດຕາເງິນເຟີ້ເພີ່ມຂຶ້ນຫຼາຍກວ່າໝູ່ແມ່ນໝວດທີ່ພັກອາໄສ, ນ້ໍາປະປາ, ໄຟຟ້າແລະເຊື້ອເພີງຫຸງຕົ້ມເພີ່ມຂຶ້ນ28.6%,ໝວດຮັກສາສຸຂະພາບແລະຢາ21.4%,ໝວດເຄື່ອງໃຊ້ໃນເຮືອນ19.1%,ໝວດການສຶກສາ18.1%,ໝວດຮ້ານອາຫານແລະໂຮງແຮມ16.4%,ໝວດເຫຼົ້າແລະຢາສູບ15%.ພ້ອມນັ້ນ, ເມື່ອສັງເກດການປ່ຽນແປງຂອງລາຄາເດືອນມີນາ2025ທຽບກັບເດືອນກຸມພາ2025 ເຫັນວ່າລາຄາຫຼຸດລົງເລັກນ້ອຍຢູ່ໃນລະດັບ-0.1%;ໃນນັ້ນ, ໝວດສິນຄ້າທີ່ຫຼຸດລົງມີ: ໝວດສະບຽງອາຫານແລະເຄື່ອງດື່ມບໍ່ມີທາດເຫຼົ້າຫຼຸດລົງ -0.9%, ພົ້ນເດັ່ນແມ່ນລາຄາຜັກສົດ-5.6%, ປາ-1.3%,ໝາກໄມ້-1%;ໝວດຄົມມະນາຄົມແລະການຂົນສົ່ງຫຼຸດລົງ-0.9%, ພົ້ນເດັ່ນແມ່ນລາຄານໍ້າມັນເຊື້ອໄຟ-5.7%,ພາຫານະຂົນສົ່ງ-0,4; ໝວດໄປສະນີ, ໂທລະຄົມມະນາຄົມແລະການສື່ສານຫຼຸດລົງ-0,7%ພົ້ນເດັ່ນແມ່ນລາຄາໄປສະນີຫຼຸດລົງ-2.9%,ໂທລະສັບ-1%.
ໂດຍລວມແລ້ວ, ອັດຕາເງິນເຟີ້ໄຕມາດ1ປີ2025ຢູ່ໃນລະດັບ13.1% (ໄຕມາດ1ປີ2024ແມ່ນ24.9%); ໃນນັ້ນ, ໝວດທີ່ເພີ່ມຂຶ້ນສູງກວ່າໝູ່ແມ່ນໝວດທີ່ພັກອາໄສ, ນໍ້າປະປາ, ໄຟຟ້າແລະເຊື້ອເພີງຫຸງຕົ້ມເພີ່ມຂຶ້ນ25.1%ພົ້ນເດັ່ນແມ່ນລາຄາໄຟຟ້າ, ຫີນແຮ່, ຊາຍ, ໄມ້ແປຮູບ;ໝວດຮັກສາສຸຂະພາບແລະຢາເພີ່ມຂຶ້ນ22.5%ພົ້ນເດັ່ນແມ່ນລາຄາຢາ, ການບໍລິການຄົນເຈັບພາຍນອກແລະການບໍລິການຈາກໂຮງໝໍເອກະຊົນ; ໝວດເຄື່ອງໃຊ້ໃນເຮືອນເພີ່ມຂຶ້ນ20.5%ພົ້ນເດັ່ນແມ່ນລາຄາເຄື່ອງໃຊ້ໃນເຮືອນປະຈໍາວັນ, ເຄື່ອງໃຊ້ໃນຄົວເຮືອນ, ເຄື່ອງເຟີນີເຈີ; ໝວດການສຶກສາເພີ່ມຂຶ້ນ20.4%ພົ້ນເດັ່ນແມ່ນລາຄາເທີມຮຽນ, ເຄື່ອງແບບນັກຮຽນ, ຄ່າຮຽນເພີ່ມ; ໝວດຮ້ານອາຫານແລະໂຮງແຮມເພີ່ມຂຶ້ນ18.5%ພົ້ນເດັ່ນແມ່ນລາຄາອາຫານສຸກເຊັ່ນ:ເຂົ້າຜັດ, ປີ້ງປາ, ເຂົ້າປຽກ, ເຂົ້າຜັດ, ເຝີ.
ເຖິງຢ່າງໃດກໍຕາມ, ເມື່ອສັງລວມ 3 ເດືອນ ຕົ້ນປີ 2025 ທ່າອ່ຽງອັດຕາເງິນເຟີ້ຂອງ ສປປ ລາວ ແມ່ນມີທ່າອ່ຽງທີ່ດີຂຶ້ນ, ອັດຕາເງິນເຟີ້ຫຼຸດລົງເປັນ 3 ເດືອນຕິດຕໍ່ກັນ (ເດືອນມັງກອນ15.5%ຊຶ່ງຫຼຸດລົງຈາກເດືອນທັນວາປີ2024ແມ່ນ16.9%,ເດືອນກຸມພາສືບຕໍ່ຫຼຸດລົງມາຢູ່ໃນລະດັບ12.7% ແລະ ເດືອນມີນາ ກໍສືບຕໍ່ຫຼຸດລົງ ມາຢູ່ໃນລະດັບ11.2%)ຊຶ່ງເປັນໜຶ່ງສັນຍາທີ່ດີໃນການທີ່ຈະເຮັດໃຫ້ເປົ້າໝາຍ ທີ່ຈະສູ້ຊົນໃຫ້ອັດຕາເງິນເຟີ້ ຢູ່ໃນລະດັບ 1ໂຕເລກ ໃນທ້າຍປີ 2025 ຕາມມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ປະຈໍາປີ 2024 ແລະ ທິດທາງແຜນການ ແລະ ແຜນການລົງທຶນຂອງລັດ ປະຈໍາປີ 2025 ສະບັບເລກທີ 153/ສພຊ, ລົງວັນທີ 12 ທັນວາ 2024.ແຕ່ການຈະບັນລຸເປົ້າໝາຍດັ່ງກ່າວນັ້ນ, ກໍຍັງມີຫຼາຍສິ່ງທ້າທາຍ ແລະ ນີ້ກໍເປັນພຽງ 3 ເດືອນທໍາອິດຂອງປີ ຊຶ່ງ ສປປ ລາວ ຍັງປະເຊີນກັບສິ່ງທ້າທາຍ ຈາກຜົນກະທົບທີ່ອາດເກີດຂຶ້ນ.
ຄໍາເຫັນ