ງານປະກວດຮູບແຕ້ມຄັ້ງນີ້, ພາຍໃຕ້ໂຄງການປະກວດຮູບພາບຈິດຕະກໍາ ສະເຫຼີມສະຫຼອງ ຄົບຮອບ 75 ປີ ການສະຖາປະນາສາຍພົວພັນທາງການທູດລາວ-ໄທ. ການປະກວດແຕ້ມຮູບ ແມ່ນໄດ້ກະກຽມມາແຕ່ເດືອນກຸມພາ ໂດຍແບ່ງອອກເປັນ 3 ກຸ່ມ ຄື: ກຸ່ມນັກຮຽນຊັ້ນປະຖົມສຶກສາ ແຕ່ ປ3-ປ5,ກຸ່ມມັດທະຍົມສຶກສາ ມ1-ມ7 ແລະ ກຸ່ມ ປະຊາຊົນທົ່ວໄປ ອາຍຸ 19 ປີ ຂຶ້ນໄປ ປະກອບມີ 76 ຜົນງານ
ທ່ານ ນາງ ມໍຣະກົດ ສີສະຫວັດ ໄດ້ກ່າວວ່າ: ການປະກວດຮູບແຕ້ມ ຄັ້ງນີ້ ຊຶ່ງຜູ້ໄດ້ຮັບລາງວັນ ກຸ່ມທີ 1 ຊັ້ນປະຖົມສຶກສາ ຜູ້ຊະນະເລີດ ທ້າວ ທະລາສອນ ອິນທິສານ ອາຍຸ 11 ປີ ໂຮງຮຽນປະຖົມຮາກແກ້ວ ນະຄອນຫຼວງວຽງຈັນ, ຊື່ຜົນງານ ວັດທະນະທໍາທີ່ຮຸ່ງເຮືອງຂອງສອງຝັ່ງ ໄດ້ຮັບລາງວັນ 3 ລ້ານກີບ; ຮອງຊະນະເລີດ ນາງ ສີຣິຕາ ຊານຸບານ ອາຍຸ 10 ປີ ໂຮງຮຽນວຽງຈັນພັດທະນາ, ຊື່ຜົນງານ ມ່ວນແທ້ເດ ລາວ-ໄທເຮົາ ໄດ້ຮັບລາງວັນ 1 ລ້ານ 8 ແສນກີບ. ກຸ່ມທີ 2 ຊັ້ນມັດທະຍົມສຶກສາ ລາງວັນຊະນະເລີດ ທ້າວ ວາດສະໜາ ໄຊມຸງຄຸນ ອາຍຸ 13 ປີ ໂຮງຮຽນ ອໍສະເຕລຽນ ອິນເຕເນເຊິນແນວ ນະຄອນຫຼວງວຽງຈັນ ຊື່ຜົນງານ 75 ປີ ແຫ່ງມິດໄມຕຣີທີ່ງົດງາມ ໄດ້ຮັບລາງວັນ 3 ລ້ານກີບ, ຮອງຊະນະເລີດ ນາງ ຄໍາພາມີ ວິຈິດ ອາຍຸ 16 ປີ ໂຮງຮຽນ ເອັສໂອເອັສ ແຮກມານໄມເນີ ແຂວງຈໍາປາສັກ ຊື່ຜົນງານ ມິດຕະພາບລາວ-ໄທ ຜູກພັນຫົວໃຈທີ່ແໜ້ນແຟ້ນຖາວອນ ໄດ້ຮັບລາງວັນ 1 ລ້ານ 8 ແສນກີບ ແລະ ກຸ່ມທີ 3 ປະຊາຊົນທົ່ວໄປ ຊະນະເລີດແມ່ນ ທ້າວ ພອນປະເສີດ ແສງມະນີວົງ ອາຍຸ 26 ປີ ຈາກນະຄອນຫຼວງວຽງຈັນ ຊື່ຜົນງານງາມແທ້ເດບ້ານເຮົາ ໄດ້ຮັບລາງວັນ 30 ລ້ານກີບ, ຮອງຊະນະເລີດອັນດັບ 1 ທ້າວ ເຄືອບຄໍາ ວົງປະທຸມ ອາຍຸ 28 ປີ ນະຄອນຫຼວງວຽງຈັນ ຊື່ຜົນງານ ຜູ້ຍິງລາວ-ຜູ້ສາວໄທ ໄດ້ຮັບລາງວັນ 18 ລ້ານກີບ, ຮອງຊະນະເລີດອັນດັບ 2 ທ້າວ ແສງມະນີ ພົງມິດພອນ ອາຍຸ 21 ປີ ນະຄອນຫຼວງວຽງຈັນ ຊື່ຜົນງານ ສາມັກຄີ ແລະ ຜູກພັນ ໄດ້ຮັບລາງວັນ 12 ລ້ານກີບ.
ສຳລັບຜູ້ທີ່ໄດ້ຮັບລາງວັນ ຈະໄດ້ຮັບປີ້ລົດໄຟໄປ-ກັບ ນະຄອນຫຼວງວຽງຈັນ-ກຸງເທບ ໂດຍກຸ່ມທີ 1 ແລະ ກຸ່ມທີ 2 ໄດ້ຮັບລາງວັນລະ 3 ໃບ ແລະ ກຸ່ມທີ 3 ໄດ້ຮັບລາງວັນລະ 1 ໃບ. ສ່ວນພິທີມອບລາງວັນແມ່ນຈະຈັດຂຶ້ນທີ່ນະຄອນຫຼວງວຽງຈັນໃນລະຫວ່າງເດືອນກໍລະກົດ - ເດືອນສິງຫາ 2025.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ