ຖໍ້ານໍ້າລອດເຊບັ້ງໄຟ ເປັນແຫຼ່ງທ່ອງທ່ຽວອີກແຫ່ງໜຶ່ງທີ່ມີຊື່ສຽງຂອງແຂວງຄໍາມ່ວນ

ໂດຍ:ຄຳລີ
ຖໍ້ານໍ້າລອດເຊບັ້ງໄຟ ກໍເປັນແຫຼ່ງທ່ອງທ່ຽວອີກແຫ່ງໜຶ່ງທີ່ມີຊື່ສຽງຂອງແຂວງຄໍາມ່ວນ, ຖໍ້າແຫ່ງນີ້ໄດ້ເປີດໃຫ້ບໍລິການນັກທ່ອງທ່ຽວທັງພາຍໃນ ແລະ  ຕ່າງປະເທດຢ່າງເປັນທາງການ ໃນວັນທີ 28 ມີນາ 2013 ໂດຍໄດ້ຮັບກຽດລັ່ນຄ້ອງໃນພິທີເປີດຈາກ ທ່ານ ສົມໃຈ ເພັດສີນວນ ຮອງເຈົ້າແຂວງຄໍາມ່ວນໃນເວລານັ້ນ ແລະ ໄດ້ມີນັກທ່ອງທ່ຽວຫຼັ່ງໄຫຼເຂົ້າມາທ່ຽວຖໍ້າແຫ່ງນີ້ບໍ່ໄດ້ຂາດນັບແຕ່ເວລານັ້ນເປັນຕົ້ນມາ.
ຖໍ້ານໍ້າລອດເຊບັ້ງໄຟຕັ້ງຢູ່ໃນເຂດອຸດທະຍານແຫ່ງຊາດພູຫີນໜາມໜໍ່ ຊຶ່ງຫ່າງຈາກຕົວເມືອງທ່າແຂກໄປທາງທິດຕາເວັນອອກປະມານ 154 ກິໂລແມັດ ແລະ ຫາງຈາກຕົວເມືອງບົວລະພາ 14 ກິໂລແມັດ, ຂອບເຂດຂອງຖໍ້າແຫ່ງນີ້ກວມເອົາເນື້ອທີ່ທັງໝົດ 10.430 ເຮັກຕາ, ຕິດກັບ 3 ບ້ານຄື: ບ້ານຫຍ້າແວດ, ບ້ານໜອງປິງ ແລະ ບ້ານກວນຂະໂຍມ.ອີງຕາມປະຫວັດ ຖໍ້າແຫ່ງນີ້ໄດ້ຖືກຄົ້ນພົບມາເປັນເວລາ 90 ກວ່າປີ, ໃນໄລຍະສົງຄາມຮຸກຮານຈຶ່ງເປັນສາເຫດໜຶ່ງທີ່ບໍ່ໄດ້ມີໂອກາດເຂົ້າໄປສໍາຫຼວດສຶກສາຄົ້ນຄວ້າຢ່າງລະອຽດ. ໃນເມື່ອກ່ອນຊາວບ້ານໄດ້ເອີ້ນວ່າ: ຖໍ້າຂຸນເຊ, ໃນປີ1995 ໄດ້ມີນັກສໍາຫຼວດຈາກປະເທດຝຣັ່ງເດີນທາງມາສໍາຫຼວດເທື່ອທໍາອິດ ການສໍາຫຼວດຄັ້ງນັ້ນສາມາດເກັບກໍາຂໍ້ມູນໄດ້ພຽງເລັກໜ້ອຍ. ຕໍ່ມາໃນປີ 2006 ທ່ານ ຈອນໂພແລກ ຜູ້ຊ່ຽວຊານກ່ຽວກັບຖໍ້າໄດ້ນໍາພາທີມງານມາສໍາຫຼວດຖໍ້າຄືນໃໝ່ ແລະ ຕໍ່ມາໃນປີ 2008 ທ່ານ ຈອນໂພແລກ ກັບທີມງານສໍາຫຼວດ 4 ຄົນກໍໄດ້ມາທໍາການສໍາຫຼວດອີກ ຈຶ່ງສາມາດບັນທຶກ ແລະ ເກັບກຳຂໍ້ມູນຕ່າງໆ.
ຖ້ຳນ້ຳລອດເຊບັ້ງໄຟ ມີຄວາມຍາວປະມານ 11,5 ກິໂລແມັດ, ຄວາມກວ້າງ 76 ແມັດ ແລະ ສູງ 56 ແມັດ, ຢູ່ພາຍໃນຖໍ້າມີກ້ອນຫີນງອກ, ຫີນຍ້ອຍ ມີບາງກ້ອນກໍເຫຼື້ອມຍິບຍັບແວວວາວ, ມີຫາດຊາຍ, ມີແມ່ນໍ້າໄຫຼລອດ ແລະ ມີວັງນໍ້າ, ເກາະແກ້ງທີ່ໃຫຍ່ເຖິງ 5 ແຫ່ງ, ຢູ່ບໍລິເວນປາກຖໍ້າເບື້ອງລຸ່ມ ຈະເປັນວັງນ້ຳທີ່ກວ້າງໃຫຍ່, ໃສສະອາດ ແລະ ມີໝູ່ປາ ນ້ອຍ-ໃຫຍ່ ລອຍຫຼິ້ນຢູ່ໜ້າຜິວນໍ້າ ຢ່າງໜ້າອອນຊອນ.
ສໍາລັບກິດຈະກໍາບໍລິການນັກທ່ອງທ່ຽວໃນປັດຈຸບັນປະກອບມີ: ກິດຈະກຳພາຍເຮືອໃນຖໍ້າ, ນອນກາງເຕັ້ນ, ເຮືອນນອນໃຫ້ແກ່ນັກທ່ອງທ່ຽວ, ເຮືອນນອນບັງກະໂລ, ສ່ວນການບໍລິການຕ່າງໆ ແມ່ນປະຊາຊົນເປັນຜູ້ໃຫ້ບໍລິການ ແລະ ມີສ່ວນຮ່ວມ. ໃນອະນາຄົດແມ່ນຈະປັບປຸງ ແລະ ເພີ່ມການບໍລິການ ເປັນຕົ້ນ: ກິດຈະກຳທາງຍ່າງ, ນອນແຮມຄືນ, ກິດຈະກຳຊົມທິວຖັດວິວທຳມະຊາດ, ລ່ອງກົງເບັງ ແລະ ອື່ນໆ.
ຂໍ້ມູນຈາກ: ຂະແໜງທ່ອງທ່ຽວ, ພະແນກ ຖວທ ແຂວງຄໍາມ່ວນ.