ທ່ານ  ນາງ ວຽງທອງ ສີພັນດອນ ໂອ້ລົມພະນັກງານ ສານປະຊາຊົນເຂດ II

ທ່ານ  ນາງ ວຽງທອງ ສີພັນດອນ ຄະນະເລຂາທິການສູນກາງພັກປະທານສານປະຊາຊົນສູງສຸດ ໄດ້ໂອ້ລົມພະນັກງານ -ສະມາຊິກພັກ ຂອງສານປະຊາຊົນເຂດ II ທີ່ເມືອງຊຽງຄໍ້ ແຂວງຫົວພັນ ເມື່ອບໍ່ດົນມານີ້ໂດຍການຕ້ອນຮັບຂອງທ່ານ  ວົງໄຊ ຍະສິງທອນກຳມະການພັກແຂວງເລຂາພັກເມືອງເຈົ້າເມືອງເມືອງຊຽງຄໍ້, ທ່ານ  ພອນສຸກ ທອງສົມບັດກຳມະການພັກແຂວງປະທານສານປະຊາຊົນເຂດIIແຂວງ ຫົວພັນ ມີຫົວໜ້າຄະນະສານ ແລະ ພະນັກງານ ຈາກສານປະຊາຊົນສູງສຸດເຂົ້າຮ່ວມ.
ໃນການພົບປະໂອ້ລົມ ພະນັກງານຫຼັກແຫຼ່ງຂອງສານປະຊາຊົນເຂດ II ແຂວງຫົວພັນ ຄັ້ງນີ້ ກ່ອນອື່ນທ່ານໄດ້ ສະແດງຄວາມຍ້ອງຍໍຊົມເຊີຍ ຕໍ່ພະນັກງານ-ສະມາຊິກພັກ ຂອງສານ  ເຖິງແມ່ນວ່າຈະພົບຄວາມຫຍຸ້ງຍາກຂາດເຂີດທາງດ້ານພາຫະນະ, ອຸປະກອນຮັບໃຊ້ ລວມເຖິງຈໍານວນຜູ້ພິພາກສາທີ່ສາມາດຂຶ້ນບັນລັງຕັດສິນຄະດີ ທີ່ມີຈຳກັດ ບວກກັບສະພາບພື້ນທີ່ພູມສັນຖານທີ່ຫ່າງໄກ ໄດ້ສ້າງຄວາມຫຍຸ້ງຍາກໃນການເຂົ້າເຖິງສະຖານທີ່ຂໍ້ຂັດແຍ່ງ ເພື່ອກວດກາ ແລະ ເກັບກຳຂໍ້ມູນ, ແຕ່ທຸກຄົນໄດ້ພ້ອມພຽງຮຽງໜ້າກັນຕັດສິນໃຈສູງໃນການປະຕິບັດໜ້າທີ່ວຽກງານທີ່ການຈັດຕັ້ງມອບໝາຍໃຫ້ຮັບຜິດຊອບ 3 ເມືອງ ຄື: ເມືອງຊຽງຄໍ້, ເມືອງແອນ ແລະ ເມືອງສົບເບົາ, ສະແດງອອກໃນການນໍາພາແກ້ໄຂຄະດີ ໃນ ປີ 2023 ສະຫຼຸບເບື້ອງຕົ້ນ ປະຕິບັດໄດ້ 100% ໃນຈຳນວນຄະດີ 15 ເລື່ອງ (ອາຍາ 5 ເລື່ອງ, ແພ່ງ 8 ເລື່ອງ, ຄອບຄົວ 2 ເລື່ອງ), ຕັດສິນແລ້ວ ມີການຂໍອຸທອນພຽງ 1 ເລື່ອງ. 
ຕໍ່ຜົນງານແລະຜົນສຳເລັດ ທີ່ຄະນະພັກ-ຄະນະນຳເມືອງ, ອົງການບໍລິຫານຂັ້ນເມືອງ, ສານປະຊົນເຂດ II ຍາດມາໄດ້ ແຕ່ເພື່ອເປັນທິດທາງໃນຕໍ່ໜ້າ ໂດຍສະເພາະຄະນະປະທານສານປະຊາຊົນເຂດ II ນໍາໄປຄົ້ນຄວ້າ ແລະ ຜັນຂະຫຍາຍເຂົ້າໃນການເຄື່ອນໄຫວວຽກງານ ໃນຕໍ່ໜ້າ ດັ່ງນີ້:1.    ໃຫ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ-ພະນັກງານ ໂດຍການຈັດຕັ້ງເຊື່ອມຊຶມບັນດາມະຕິ, ຄຳສັ່ງຂອງພັກ, ກົດໝາຍ ແລະ ນິຕິກໍາໃຕ້ກົດໝາຍຂອງລັດ ໃຫ້ບັນດາຖັນແຖວສະມາຊິກພັກ-ພະນັກງານ ຢ່າງເປັນກະຕິ, ສາມາດກໍາແໜ້ນທາດແທ້ຊົນຊັ້ນ ແລະ ຄຸນສົມບັດສິນທໍາປະຕິວັດ ໄປຄຽງຄູ່ກັບການຍົກສູງຄວາມຮູ້ຄວາມສາມາດທາງດ້ານວິຊາສະເພາະ ແລະ ສ້າງພະນັກງານໃຫ້ມີຄວາມຊໍານານງານ ກາຍເປັນມືອາຊີບໃນການຄົ້ນຄວ້າພິຈາລະນາຄະດີ, ປະຕິບັດຈັນຍາບັນ-ຈັນຍາທໍາໃນອາຊີບ ຢ່າງເຂັ້ມງວດ, 2.ເອົາໃຈໃສ່ພັດທະນາສານປະຊາຊົນແຂວງ ແລະ ສານປະຊາຊົນເຂດ ໃຫ້ມີຄວາມໜັກແໜ້ນ ເຂັ້ມແຂງ; ການກໍ່ສ້າງ ແລະ ຂະຫຍາຍພັກ ໃຫ້ປະຕິບັດສອດຄ່ອງກັບກົດລະບຽບຂອງພັກ ຢ່າງເຂັ້ມງວດ, 3.    ປັບປຸງແບບແຜນນໍາພາ, ວິທີເຮັດວຽກງານໃນລະບົບສານປະຊາຊົນ ຕາມຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ມີການແບ່ງງານໃຫ້ບຸກຄົນຮັບຜິດຊອບ, ສຽງສ່ວນໜ້ອຍຂຶ້ນກັບສຽງສ່ວນຫຼາຍ, ຂັ້ນລຸ່ມປະຕິບັດຕາມຂັ້ນເທິງ, ມີການສຳຫຼວດກວດກາ ຢ່າງເປັນປົກກະຕິ ເພື່ອຖອດຖອນບົດຮຽນ ເປັນແຕ່ລະໄລຍະ, 4.    ເພີ່ມທະວີຄວາມເອົາໃຈໃສ່ໃນການຈັດຕັ້ງປະຕິບັດວຽກງານດ້ານວິຊາສະເພາະ ໂດຍເລັ່ງໃສ່ກໍ່ສ້າງ ຈ່າສານ, ຜູ້ຊ່ວຍຜູ້ພິພາກສາ ແລະ ຜູ້ພິພາກສາ ໃຫ້ມີຄຸນນະພາບ, ມີຄວາມຮູ້ຄວາມສາມາດດ້ານວຽກງານວິຊາສະເພາະ, ມີຄຸນນະທຳ, ຈັນຍາບັນ-ຈັນຍາທຳ; ສ້າງໃຫ້ໄດ້ ຜູ້ພິພາກສາດີ-ເກັ່ງ ໃນສານປະຊາຊົນແຂວງ ແລະ ບັນດາສານເຂດ, 5.    ເອົາໃຈໃສ່ຕິດຕາມ, ກວດກາ ການປະຕິບັດໜ້າທີ່ ຂອງສະມາຊິກພັກ, ພະນັກງານ ຢູ່ສານແຕ່ລະຂັ້ນໃຫ້ເປັນປົກກະຕິ ແລະ ຕໍ່ເນື່ອງ; ປະຕິບັດມາດຕະການເຂັ້ມງວດ ແລະ ເດັດຂາດ ຕໍ່ສະມາຊິກພັກ-ພະນັກງານທີ່ລະເມີດກົດໝາຍ, 6.ເອົາໃຈໃສ່ເກັບກໍາຂໍ້ມູນຫຼັກຖານຂໍ້ເທັດຈິງ ມາຄົ້ນຄວ້າ ພິຈາລະນາຮ່ວມກັນລະຫວ່າງອົງການດໍາເນີນຄະດີຕາມຂະບວນຍຸຕິທຳ (ເຈົ້າໜ້າທີ່ ປກສ, ອົງການໄອຍະການ, ເຈົ້າໜ້າທີ່ປະຕິບັດຄໍາຕັດສິນຂອງສານ) ລວມທັງອຳນາດການປົກຄອງເມືອງ ເພື່ອປຶກສາຫາລື, ຍາດແຍ່ງຄວາມຄິດເຫັນ ສ້າງຄວາມເປັນເອກະພາບໃນການຕົກລົງແກ້ໄຂບັນຫາຄະດີຕ່າງໆ. 
ໃນກອງປະຊຸມ ທ່ານ ນາງ ວຽງທອງ ສີພັນດອນ ຍັງໄດ້ປະກາດແຕ່ງຕັ້ງຜູ້ພິພາກສາ ຊັ້ນ I ຂອງສານປະຊາຊົນ ແຂວງຫົວພັນ ແລະ ແຂວງຊຽງຂວາງ
  ຂ່າວ-ພາບ:ອານຸພົນ