ໃນໂອກາດດັ່ງກ່າວ, ທ່ານ ບຸນທອງ ຈິດມະນີ ໄດ້ສະແດງຄວາມຍິນດີຕ້ອນຮັບພ້ອມທັງຊົມເຊີຍ ແລະ ຕີລາຄາສູງຕໍ່ ທ່ານນາງ ຊິວ-ແລັງ ຊູອອກ ທີ່ປະສົບຜົນສໍາເລັດໃນການປະຕິບັດໜ້າທີ່ການທູດ ປະຈຳ ສປປ ລາວ ເປັນໃນໄລຍະເວລາເກືອບ 4 ປີຜ່ານມາ ຊຶ່ງຕະຫຼອດການປະຕິບັດໜ້າທີ່ ທ່ານທູດໄດ້ ປະກອບສ່ວນຢ່າງຫ້າວຫັນ ໃນການຊຸກຍູ້ສົ່ງເສີມການພົວພັນຮ່ວມມືລະຫວ່າງ ສປປ ລາວ - ສ ຝຣັ່ງ ທີ່ມີມາແຕ່ດົນນານແລ້ວນັ້ນ ໃຫ້ມີຄວາມແໜ້ນແຟ້ນ ແລະ ເຕີບໃຫຍ່ຂະຫຍາຍຕົວເປັນກ້າວໆ. ພ້ອມນີ້, ທ່ານ ບຸນທອງ ຈິດມະນີ ຍັງໄດ້ສະແດງຄວາມຂອບໃຈຕໍ່ການສະໜັບສະໜູນຊ່ວຍເຫຼືອຈາກປະຊາຊົນ ແລະ ລັດຖະບານຝຣັ່ງໃນໄລຍະຜ່ານມາທີ່ໄດ້ໃຫ້ການປະກອບສ່ວນຊ່ວຍເຫຼືອ ສປປ ລາວ, ທ່ານ ບຸນທອງ ຈິດມະນີ ຍັງໄດ້ອວຍພອນໃຫ້ທ່ານທູດ ຈົ່ງປະສົບຜົນສຳເລັດໃນໜ້າທີ່ໃໝ່ຂອງທ່ານ ແລະ ເດີນທາງກັບຄືນ ປະເທດດ້ວຍຄວາມສະຫວັດດີພາບ.
ໂອກາດນີ້, ທ່ານນາງ ຊິວ-ແລັງ ຊູອອກ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຂອງ ທ່ານ ບຸນທອງ ຈິດມະນີ ແລະ ສະແດງຄວາມຂອບໃຈຕໍ່ການຈັດຕັ້ງຂອງລາວທຸກຂັ້ນ ທີ່ໄດ້ໃຫ້ ການຮ່ວມມື ແລະ ອໍານວຍຄວາມສະດວກ ຕະຫຼອດໄລຍະການປະຕິບັດໜ້າທີ່ການທູດຂອງຕົນ ຢູ່ ສປປ ລາວ ຈົນໄດ້ປະຜົນສໍາເລັດຢ່າງຈົບງາມ.
ສປປ ລາວ - ສ ຝຣັ່ງ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 22 ຕຸລາ 1953, ການຮ່ວມມື ແລະ ຊ່ວຍເຫຼືອ ລະຫວ່າງ ລາວ-ຝຣັ່ງ, ໂດຍສະເພາະ
ການລົງທຶນຂອງຝຣັ່ງ ໃນປີ 2023 ມີຈຳນວນ 558 ລ້ານໂດລາ ຊຶ່ງຈັດໃນອັນດັບທີ 8 ຂອງບັນດາຕ່າງປະເທດ ທີ່ລົງທຶນຢູ່ປະເທດລາວ ແລະ ປີ 2024 ມີມູນຄ່າທັງໝົດ 829,330,169 ໂດລາ, ຂະແໜງການທີ່ມີການລົງທຶນຫຼາຍສຸດຄື: ໂຮງແຮມ, ຮ້ານອາຫານ, ກະສິກາ, ການບໍລິການ, ການກໍ່ສ້າງ, ການສຶກສາ ແລະ ອື່ນໆ. ສິນຄ້າສົ່ງອອກຂອງລາວມີ ເຄື່ອງນຸ່ງຫົ່ມ, ເຂົ້າ, ຂີ້ຄັ່ງ, ຂີ້ຊີ, ນໍ້າຕານ, ເຫຼົ້າ, ເບຍ ແລະ ອື່ນໆ (ປີ 2024 ມູນຄ່າສົ່ງອອກ 4,765,360 ໂດລາ). ສິນຄ້ານໍາເຂົ້າຈາກຝຣັ່ງມີພາຫະນະທາງອາກາດ ແລະ ຊິ້ນສ່ວນອາໄຫຼ່, ເຫຍື່ອໄມ້ ແລະ ເສດເຈ້ຍ, ເຫຼົ້າ, ເບຍ, ວາຍ, ອຸປະກອນກົນຈັກ, ຊິ້ນສ່ວນອາໄຫຼລົດ, ອາຫານສັດ, ອຸປະກອນການແພດ ແລະ ອື່ນໆ (ປີ 2024 ມູນຄ່ານໍາເຂົ້າ 20,171,830 ໂດລາ). (ຂ່າວ-ພາບ: ສຳນານ)
ຄໍາເຫັນ