ທ່ານ ມະໄລທອງ ກົມມະສິດ ຕ້ອນຮັບຜູ້ບໍລິຫານລະດັບສູງກຸ່ມບໍລິສັດ ຫາງໂຈຈິນຈ່ຽງ

ໃນໂອກາດດັ່ງກ່າວ, ທ່ານ ນາງ ຊູ ຮວາເຈິນ ໄດ້ແຈ້ງຈຸດປະສົງການມາຢ້ຽມຂໍ່ານັບຄະນະນຳກະຊວງອຸດສາຫະກຳ ແລະ ການຄ້າ ກໍເພື່ອປຶກສາຫາລື ໂດຍປະຕິບັດຕາມນະໂຍບາຍ “ໜຶ່ງແລວ ໜຶ່ງເສັ້ນທາງ” ຂອງລັດຖະບານ ສປ ຈີນ ໃນຂົງເຂດການຮ່ວມມື ລະຫວ່າງ ຈີນ-ລາວ ຊຶ່ງປັດຈຸບັນ ກໍມີບັນດານັກລົງທຶນທີ່ໃຫ້ຄວາມສົນໃຈໃນການເຂົ້າມາລົງທຶນ ໃນ ສປປ ລາວ ກັນຢ່າງຫຼວງຫຼາຍ ໂດຍສະ ເພາະໃນຂົງເຂດທີ່ມີທ່າແຮງ ໃນດ້ານເສດຖະກິດ, ການຄ້າ, ການລົງທຶນ, ບໍ່ແຮ່ ແລະ ພະລັງງານ ຊຶ່ງໜຶ່ງໃນນັ້ນ ກໍແມ່ນ ກຸ່ມບໍລິສັດ ຫາງໂຈຈິນຈ່ຽງ ທີ່ກໍາລັງສຶກສາສໍາຫຼວດການລົງທຶນ ກ່ຽວກັບ ອາລູມີນຽມ ຢູ່ໃນ ສປປ ລາວ, ໂຄງການດັ່ງກ່າວ ກໍເປັນອີກໂຄງການໜຶ່ງທີ່ສໍາຄັນ, ເພາະປັດຈຸບັນເຫັນໄດ້ວ່າຍັງບໍ່ທັນມີໂຮງງານຜະລິດອາລີມີນ້ຽມພາຍໃນ, ສ່ວນໃຫຍ່ແມ່ນສິນຄ້ານໍາເຂົ້າຈາກຕ່າງປະເທດ, ໂຄງການດັ່ງກ່າວນີ້ສາມາດສ້າງຂຶ້ນໃນ ສປປ ລາວ, ກໍເປັນອີກບາດກ້າວໜຶ່ງທີ່ສໍາຄັນໃນການພັດທະນາວຽກງານດ້ານເສດຖະກິດ ສປປ ລາວ ໃຫ້ນັບມື້ນັບດີຂຶ້ນ.

ທ່ານລັດຖະມົນຕີ ສະແດງຄວາມຊົມເຊີຍ ແລະ ຕີລາຄາສູງຕໍ່ ທ່ານ ນາງ ຊູ ຮວາເຈິນ ທີ່ໄດ້ມາຢ້ຽມຢາມ ແລະ ພົບປະກັບ ກະຊວງອຸດສາຫະກຳ ແລະ ການຄ້າ ພ້ອມທັງປຶກສາຫາລືການຮ່ວມມືດ້ານເສດຖະກິດ, ການຄ້າ, ການລົງທຶນ, ບໍ່ແຮ່ ແລະ ພະລັງງານ; ທ່ານລັດຖະມົນຕີລາຍງານໃຫ້ຊາບຕື່ມວ່າ: ປັດຈຸບັນ, ກະຊວງອຸດສາຫະກຳ ແລະ ການຄ້າ ຢູ່ໃນຂັ້ນຕອນການຄົ້ນຄວ້າ, ວາງແຜນ, ປະເມີນນະໂຍບາຍ ແລະ ນິຕິກຳຄືນໃໝ່, ເພື່ອໃຫ້ການຄຸ້ມຄອງວຽກງານດັ່ງກ່າວໃຫ້ໄດ້ຮັບໝາກຜົນທີ່ດີຂຶ້ນ. ພ້ອມກັນນີ້, ທ່ານລັດຖະມົນຕີຍັງໄດ້ສະເໜີໃຫ້ບໍລິສັດ ຮ່ວມມື ກັບບໍລິສັດທີ່ໄດ້ຂຸດຄົ້ນໄປແລ້ວ ເພື່ອຮ່ວມກັນພັດທະນາ ແລະ ສຶກສາເບິ່ງຄວາມເປັນໄປໄດ້ ໃນການລົງທຶນ ຢູ່ ສປປ ລາວ.

(ຂ່າວ-ພາບ: ສົມສະນຸກ)