 |
ທ່ານ ນາງ ຫວັ່ງພະໄທ ໄຊຍະປັນຍາ ໃຫ້ສໍາພາດໃນວັນທີ 7 ຕຸລາ 2026 ນີ້ວ່າ: ໃນນາມຮ້ານຄໍາສົມຫວັງ ສົມພະໄທ, ຂ້າພະເຈົ້າຮູ້ສຶກພາກພູມໃຈ ແລະ ເປັນກຽດຢ່າງສູງ ທີ່ໄດ້ຮັບລາງວັນ ເຄືອຂ່າຍຜູ້ປະກອບການແມ່ຍີງດີເດັ່ນ ເອຊຽນ ປີ 2026, ເພາະວ່າ ລາງວັນດັ່ງກ່າວນີ້ ໄດ້ສ້າງຊື່ສຽງອັນໂດດເດັ່ນໃຫ້ຫົວໜ່ວຍທຸລະກິດຂອງແຂວງຈໍາປາສັກ ໂດຍສະເພາະແມ່ນນັກທຸລະກິດແມ່ຍິງ, ມີຄວາມດີໃຈ ແລະ ຕື່ນເຕັ້ນທີ່ຂຶ້ນເວທີຮັບລາງວັນອັນຊົງກຽດ ດັ່ງກ່າວ ເພາະວ່າເປັນລາງວັນທໍາອິດ
ທີ່ຂ້າພະເຂົ້າໄດ້ຮັບໃນອາຊີບການດໍານີນທຸລະກິດ, ລາງວັນນີ້ ຈະເປັນກຳລັງໃຈ, ເປັນແຮງພັກດັນ ໃຫ້ມີຄວາມຕັ້ງໃຈ, ມີຄວາມມຸ່ງໝັ້ນໃນການເຮັດວຽກ ກໍຄືການພັດທະນາທຸລະກິດ ໃຫ້ກວ້າງໄກຍິ່ງໆຂຶ້ນ.
ທ່ານ ນາງ ຫວັ່ງພະໄທ ໄຊຍະປັນຍາ ໃຫ້ຮູ້ຕື່ມວ່າ: ຜ່ານມາ,ໄດ້ເລີ່ມຕົ້ນດໍາເນີນທຸລະກີດຂະໜາດນ້ອຍ ແລະ ກ້າວມາເປັນທຸລະກິດຂະໜາດກາງໃນ ປັດຈຸບັນ ໂດຍດໍາເນີນທຸລະກີດ ຄ້າຂາຍຄໍາ, ອັນຍະມະນີ ແລະ ວັດຖຸມີຄ່າ ຢູ່ແຂວງຈໍາປາສັກ, ມີຄວາມມັກ - ຮັກອາຊີບ ກໍຄືທຸລະກິດນີ້ ເພາະວ່າມີຜົນສໍາເລັດ ແລະ ມີຄວາມຍືນຍົງ, ເມື່ອກ່ອນ ຮ້ານ ເປັນພຽງຮ້ານນ້ອຍໆ ຢູ່ໃນຕະຫຼາດໃໝ່ປາກເຊ (ຕະຫຼາດດາວເຮືອງ) ແລະ ມີຮ້ານດຽວ. ຕໍ່ມາ, ທຸລະກິດມີການຂະຫຍາຍຕົວ, ປັດຈຸບັນ ຈິ່ງໄດ້ມີການຂະຫຍາຍຮ້ານ ມາເປັນ ສາຂາ 2 ຕັ້ງຢູ່ດ້ານເໜືອຂອງຕະຫຼາດໃໝ່ປາກເຊ, ເພື່ອອໍານວຍຄວາມສະດວກໃຫ້ແກ່ລູກຄ້າ ທີ່ມາໃຊ້ບໍລິການ, ຮ້ານຄໍາພວກເຮົາ ໃຫ້ຄວາມສໍາຄັນ ດ້ານຄຸນະພາບ, ສິນຄ້າໄດ້ມາດຕາຖານ, ດໍາເນີນທຸລະກິດພາຍໃຕ້ລະບຽບກົດໝາຍ, ມີຄວາມຊື່ສັດ ຕໍ່ລູກຄ້າ. ນອກນີ້ ຮ້ານຍັງໄດ້ມອບພັນທະອາກອນໃຫ້ພັກ - ລັດ ຕາມລະບຽບກົດໝາຍ ພ້ອມທັງຮ່ວມເຄື່ອນໄຫວວຽກງານນໍາອົງການຈັດຕັ້ງຕ່າງໆ ແລະ ປະກອບສ່ວນຊ່ວຍເຫຼືອສັງຄົມຕາມທ່າແຮງ, ຮ້ານຍັງ ໃຫ້ຄວາມສໍາຄັນກັບທຸກພາກສ່ວນ ເພາະມີຄວາມເຊື່ອໝັ້ນວ່າ ຄວາມສໍາເລັດບໍ່ໄດ້ເກີດຈາກຄົນພຽງຄົນດຽວ ແຕ່ຄືການຮ່ວມມື ຈາກຫຼາຍພາກສ່ວນ ຈຶ່ງຈະປະສົບຄວາມສຳເລັດໄດ້. ຍ້ອນແນວນັ້ນ, ຜ່ານມາ ຮ້ານໄດ້ຮັບໃບຍ້ອງຍໍຈາກການນໍາແຂວງ, ໃບກຽດຕິຄຸນຈາກອົງການຈັດຕັ້ງທາງສັງຄົມ, ພິເສດແມ່ນໄດ້ຮັບຫຼຽນກາລະນຶກ 50 ປີ ວັນສະຖາປະນາ ສປປ ລາວ ຄົບຮອບ 50 ປີ.
 |
ທ່ານ ນາງ ຫວັ່ງພະໄທ ໄຊຍະປັນຍາ ກ່າວຕື່ມວ່າ: ປັດຈຸບັນ ທຸລະກິດມີຮ້ານຄໍາ ຄື: ຮ້ານຄໍາ ສົມຫວັງ ສົມພະໄທ ມີ 2 ສາຂາ, ມີໂຮງຊວດຈໍານໍາ ລັດດາ ແລະ ມີຮ້ານໂອນເງິນ ຫວັ່ງພະໄທ ຢູ່ບ້ານພະບາດ ນະຄອນປາກເຊ. ນອກຈາກນີ້ຍັງໄດ້ປຸກລະດົມຂົນຂວາຍ ກຸ່ມທຸລະກິດດ້ວຍກັນ ໃຫ້ດໍາເນີນທຸລະກິດ ຕາມແນວທາງນະໂຍບາຍຂອງພັກ - ລັດ, ຖືກຕ້ອງສອດຄ່ອງກັບລະບຽບກົດໝາຍ, ມີຜົນກຳໄລ ແລະ ເປັນທີ່ຍອມຮັບຈາກລູກຄ້າ ທຸກກຸ່ມຄົນ. ໃນຕໍ່ໜ້າ, ກໍມີຄວາມຕັ້ງໃຈທີ່ຈະພັດທະນາທຸລະກິດຂອງຕົນ ໃຫ້ເຕີບໂຕຢ່າງໝັ້ນຄົງ ແລະ ມີຄວາມເຂັ້ມແຂງ ,ສ້າງລວດລາຍ, ປັບປຸງຮູບຮ່າງສິນຄ້າ ໂດຍນໍາໃຊ້ເທັກໂນໂລຍີ ແລະ ລະບົບການບໍລິຫານທີ່ທັນສະໄໝມາປະກອບສ່ວນໃນການດໍາເນີນທຸລະກິດ ເພື່ອບໍລິການລູກຄ້າໄດ້ຢ່າງສະດວກ ແລະ ວ່ອງໄວ, ດໍາເນີນທຸລະກິດດ້ວຍຄວາມບໍລິສຸດສັດຊື່, ເຄົາລົບ ແລະ ຖືລູກຄ້າເປັນສິ່ງສໍາຄັນ, ດໍາເນີນທຸລະກິດພາຍໃຕ້ລະບຽບກົດໝາຍ.
ຕອນທ້າຍ ທ່ານ ນາງ ຫວັ່ງພະໄທ ໄຊຍະປັນຍາ ຍັງເຊີນຊວນໃຫ້ນັກທຸລະກິດທຸກທ່ານ ຕັ້ງໜ້າພັດທະນາທຸລະກິດຂອງຕົນໃຫ້ກ້າວຂຶ້ນຢ່າງບໍ່ຢຸດຢັ້ງ ເພື່ອໃຫ້ບັນລຸຜົນສໍາລັດຕາມລະດັບຄາດໝາຍ ແລະ ເປັນຕົ້ນແບບທີ່ດີ ໃນດ້ານທຸລະກິດ ສາມາດປະກອບສ່ວນໃນການພັດທະນາເສດຖະກິດ - ສັງຄົມຂອງຊາດ ກໍຄືຂອງແຂວງ ໃຫ້ມີຄວາມຈະເລີນຮຸ່ງເຮືອງຂຶ້ນໄປເລື້ອຍໆ. * ຂ່າວ-ພາບ: ທູນທອງໃຈ *
ຄໍາເຫັນ