ໄດ້ໄປເຄື່ອນໄຫວຢ້ຽມຢາມເຮັດວຽກຢູ່ແຂວງບໍລິຄຳໄຊ ໂດຍຮ່ວມກັບ ທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊ ແລະ ພາກສ່ວນທີ່ກ່ຽວຂ້ອງ ລົງຕິດຕາມຄວາມຄືບໜ້າຂອງໂຄງການກໍ່ສ້າງຂົວຂ້າມນ້ຳຂອງມິດຕະພາບ ລາວ-ໄທ ແຫ່ງທີ 5 (ບໍລິຄໍາໄຊ-ບຶງການ).
ໃນໂອກາດດັ່ງກ່າວ, ທ່ານ ໄລທອງ ພົມມະວົງ ຫົວໜ້າໂຄງການ ໄດ້ລາຍງານກ່ຽວກັບຄວາມຄືບໜ້າຂອງການຈັດຕັ້ງປະຕິບັດ ບັນດາໜ້າວຽກຕ່າງໆຂອງໂຄງການ ສະເພາະຄວາມຮັບຜິດຊອບເບື້ອງຝ່າຍລາວ ເປັນຕົ້ນ ວຽກງານການກໍ່ສ້າງພື້ນຖານໂຄງລ່າງ ເຊັ່ນ: ເສັ້ນທາງເຂົ້າຫາຂົວ, ຕຶກອາຄານດ່ານ ແລະ ສິ່ງອໍານວຍຄວາມສະດວກ ແມ່ນໄດ້ຈັດຕັ້ງປະຕິບັດສໍາເລັດແລ້ວ 100% ແລະ ໄດ້ມີການກວດກາຢັ້ງຢືນຜົນສໍາເລັດໃນເດືອນມີນາ 2024 ທີ່ຜ່ານມາ, ສໍາລັບບັນດາໜ້າວຽກການກໍ່ສ້າງຂົວກາງນ້ຳ ໄດ້ຈັດຕັ້ງປະຕິບັດສໍາເລັດແລ້ວ 94.76% ໂດຍລວມແລ້ວ ເຫັນວ່າ ທັງສອງໜ້າວຽກດັ່ງກ່າວ ທີ່ຢູ່ໃນສ່ວນຮັບຜິດຊອບຂອງຝ່າຍລາວ ສາມາດຈັດຕັ້ງປະຕິບັດ ສໍາເລັດສະເລ່ຍ 96.64% ຊຶ່ງເຫັນວ່າ ໂຄງການດັ່ງກ່າວ ມີຄວາມຊັກຊ້າເກີນແຜນການທີ່ກໍານົດໄວ້ເບື້ອງຕົ້ນ ໃນປີ 2024 ເນື່ອງຈາກບັນຫາໂຄວິດ-19.
ພາຍຫຼັງທີ່ໄດ້ຮັບຟັງການລາຍງານ, ທ່ານ ໂພໄຊ ໄຂຄຳພິທູນ ໄດ້ສະແດງຄວາມຊົມເຊີຍຕໍ່ທຸກໆພາກສ່ວນກ່ຽວຂ້ອງທີ່ໄດ້ເອົາໃຈໃສ່ຈັດຕັ້ງປະຕິບັດບັນດາໜ້າວຽກຕ່າງໆດ້ວຍຄວາມພະຍາຍາມມາໂດຍຕະຫຼອດ. ພ້ອມນີ້, ໄດ້ຮຽກຮ້ອງໃຫ້ຄະນະຮັບຜິດຊອບໂຄງການ ແລະ ພາກສ່ວນທີ່ກ່ຽວຂ້ອງຕ່າງໆ ຈົ່ງສືບຕໍ່ຈັດຕັ້ງປະຕິບັດບັນດາໜ້າວຽກທີ່ຍັງຄົງຄ້າງ ໂດຍສະເພາະແມ່ນການກໍ່ສ້າງຂົວກາງນ້ຳໃຫ້ສໍາເລັດຕາມແຜນການ ເພື່ອໃຫ້ກ້າວໄປສູ່ການຈັດພິທີເທເບຕົງເຊື່ອມຈອດຈຸດໃຈກາງຂອງຂົວໃນເດືອນມີນາ ແລະ ພິທີເປີດນໍາໃຊ້ຂົວດັ່ງກ່າວ ຢ່າງເປັນທາງການ ໃນເດືອນພຶດສະພາ ປີ 2025 ລວມທັງ ການສ້າງບັນດານິຕິກຳຕ່າງໆທີ່ກ່ຽວຂ້ອງ ເພື່ອຮອງຮັບພາຍຫຼັງມີການເປີດນຳໃຊ້ຂົວ ຊຶ່ງເປັນ 2 ກິດຈະກໍາທີ່ສໍາຄັນໃນການສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ລາວ-ໄທ ຄົບຮອບ 75 ປີ ແລະ ເປັນການຕອບສະໜອງຕໍ່ນະໂຍບາຍຂອງ ສປປ ລາວ ໃນການຫັນປະເທດຈາກປະເທດບໍ່ມີຊາຍແດນຕິດກັບທະເລ ເປັນປະເທດເຊື່ອມໂຍງ-ເຊື່ອມຈອດທາງດ້ານຄົມມະນາຄົມ ທັງເປັນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຖານບ້ານໃກ້ເຮືອນຄຽງທີ່ດີ ທີ່ມີມາແຕ່ດົນນານ ກໍຄືການເປັນຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ ລະຫວ່າງ ສອງຊາດ ລາວ ແລະ ໄທ.
(ຂ່າວ: ກົມອາຊີ-ປາຊີຟິກ ແລະ ອາຟຣິກາ ກຕທ)
ຄໍາເຫັນ