 |
ເນື້ອໃນບົດປາໄສຂອງທ່ານ ສີຈິ້ນຜິງ ລະບຸວ່າ, ຈີນ ແລະ ອາເມຣິກາ ລ້ວນແຕ່ເປັນປະເທດທີ່ຍິ່ງໃຫຍ່, ປະຊາຊົນສອງຊາດລ້ວນແຕ່ແມ່ນປະຊາຊົນທີ່ຍິ່ງໃຫຍ່, ຜົນປະໂຫຍດຂອງສອງຝ່າຍເຊື່ອມໂຍງເຂົ້າກັນຢ່າງເລິກເຊິ່ງ, ຄວນກາຍເປັນຄູ່ຮ່ວມງານ ແຕ່ບໍ່ແມ່ນຄູ່ແຂ່ງ, ການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນກັບການເຮັດໃຫ້ອາເມຣິກາຍິ່ງໃຫຍ່ອີກຄັ້ງສາມາດດຳເນີນໄປຄຽງຄູ່ກັນໄດ້, ຫາກບໍ່ແມ່ນການຂັດແຍ້ງກັນ, ຊ່ວຍຊູຍູ້ໜູນກັນເພື່ອສ້າງຜົນສຳເລັດ ແລະ ນຳເອົາຄວາມສຸກມາໃຫ້ຊາວໂລກ. ຈີນ ແລະ ອາເມຣິກາ ຄວນກ້າວໄປສູ່ທິດທາງດຽວກັນ, ຊຸກຍູ້ການສ້າງສາຍພົວພັນທີ່ໝັ້ນຄົງ ໂດຍຖືເອົາການຮ່ວມມືເປັນຫຼັກ ແຂ່ງຂັນກັນຢ່າງສົມເຫດສົມຜົນ, ສາມາດຄວບຄຸມຄວາມຂັດແຍ້ງຢູ່ໄດ້ ແລະ ການຢູ່ຮ່ວມກັນໂດຍສັນຕິແມ່ນສາມາດຄອງຄອຍໄດ້, ບຸກເບີກເສັ້ນທາງທີ່ຖືກຕ້ອງສຳລັບປະເທດໃຫຍ່ທີ່ຈະຢູ່ຮ່ວມກັນໃນຍຸກໃໝ່.
 |
ທ່ານ ສີຈິ້ນຜິງ ເນັ້ນໜັກວ່າ, ຕັກກະດ້ານປະຫວັດສາດຂອງການຢູ່ຮ່ວມກັນໂດຍສັນຕິລະຫວາງຈີນ ແລະ ອາເມຣິກາ, ຄວາມປາຖະໜາອັນດີງາມຂອງປະຊາຊົນສອງຊາດທີ່ຢາກໄປມາຫາສູ່ກັນຢ່າງມີໄມຕີຈິດມິດຕະພາບ ແລະ ຄວາມຄາດຫວັງທົ່ວໄປຂອງປະຊາຄົມໂລກທີ່ມີຕໍ່ຈີນ ແລະ ອາເມຣິກາບໍ່ມີການປ່ຽນແປງ. ທ່ານຄອງຄອຍຈະໄດ້ແລກປ່ຽນຄວາມຄິດຄວາມເຫັນຢ່າງເລິກເຊິ່ງກັບທ່ານປະທານາທິບໍດີ ໂດໂນ ທຣຳ, ເສີມຂະຫຍາຍເນື້ອໃນຂອງສາຍພົວພັນທີ່ໝັ້ນຄົງທາງຍຸດທະສາດທີ່ສ້າງສັນລະຫວ່າງຈີນ-ອາເມຣິກາໃຫ້ອຸດົມສົມບູນຂຶ້ນ, ເປີດກວ້າງການແລກປ່ຽນ ແລະ ການຮ່ວມມືໃນຂົງເຂດຕ່າງໆ, ຕິດຕໍ່ພົວພັນກັບບຸກຄົນໃນວົງການຕ່າງໆຂອງອາເມຣິກາຢ່າງກວ້າງຂວາງ, ພ້ອມນີ້ ທ່ານປະທານ ສີຈິ້ນຜິງ ສະແດງຄວາມເຊື່ອໝັ້ນວ່າ ການຢ້ຽມຢາມອາເມຣິກາທາງລັດຖະກິດຄັ້ງນີ້ຈະໄດ້ຮັບໝາກຜົນຢ່າງຈົບງາມ ຊຶ່ງຈະເພີ່ມພູນຄູນສ້າງຄວາມສຸກຂອງປະຊາຊົນສອງຊາດ ແລະ ເພີ່ມຄວາມຫວັງໃຫ້ແກ່ສັນຕິພາບຂອງໂລກ.
ຄໍາເຫັນ