 |
ທ່ານ ສີຈິ້ນຜິງ ກ່າວວ່າ: ປີນີ້ແມ່ນປີຄົບຮອບ 25 ປີຂອງການສ້າງຕັ້ງອົງການຮ່ວມມືຊຽງໄຮ້. ຕະຫຼອດ 25 ປີຜ່ານມາ, ອົງການຮ່ວມມືຊຽງໄຮ້ໄດ້ຜ່ານຂະບວນວິວັດທີ່ບໍ່ທຳມະດາທີ່ສຸດ, ຜົນສຳເລັດດ້ານການພັດທະນາອັນໃຫຍ່ຫຼວງທີ່ສຸດ ຄື: ໄດ້ຄ່ອຍໆກາຍເປັນອົງການຮ່ວມມືພາກພື້ນແບບໃໝ່ທີ່ກວມເນື້ອທີ່ກວ້າງຂວາງທີ່ສຸດ, ປະຊາກອນຫຼາຍທີ່ສຸດ ແລະ ມີທ່າແຮງບົ່ມຊ້ອນດ້ານການພັດທະນາໃຫຍ່ທີ່ສຸດໃນໂລກ. ປັດຈຸບັນ, ສະພາບການປ່ຽນແປງຢ່າງໃຫຍ່ຫຼວງຂອງໂລກແບບບໍ່ເຄີຍມີມາກ່ອນໃນຮອບຮ້ອຍປີໄດ້ເລັ່ງຜັນແປໄວຂຶ້ນ, ອົງການຮ່ວມມືຊຽງໄຮ້ຄວນແບກຫາບຄວາມຮັບຜິດຊອບທາງປະຫວັດສາດຢ່າງກ້າຫານ ແລະ ເປັນຜູ້ນຳພາທາງປະຫວັດສາດຢ່າງເປັນເຈົ້າການ.
ທ່ານ ສີຈິ້ນຜິງ ໄດ້ສະເໜີ 4 ຈຸດຢືນ ຄື: 1, ຢຶດໝັ້ນການຖືເອົາການພັດທະນາເປັນບຸລິມະສິດ ແລະ ສ້າງອະນາຄົດທີ່ຮ່ວມກັນກ້າວໄປສູ່ຄວາມຈະເລີນຮຸ່ງເຮືອງ. 2, ຢຶດໝັ້ນການຖືເອົາຄວາມໝັ້ນຄົງເປັນສິ່ງສຳຄັນຕົ້ນຕໍ ແລະ ສ້າງສະພາບແວດລ້ອມທີ່ປອດໄພໂດຍທົ່ວໄປ. 3, ຢຶດໝັ້ນການຖືເອົາປະຊາຊົນເປັນຫຼັກ ແລະ ເສີມສ້າງພື້ນຖານໄມຕີຈິດ ມິດຕະພາບທີ່ຍືນຍົງໃຫ້ໜັກແໜ້ນ. 4, ຢຶດໝັ້ນການສົນທະນາ ແລະ ການປຶກສາຫາລື, ປັບປຸງການຄຸ້ມຄອງບໍລິຫານທີ່ຍຸຕິທຳ ແລະ ເປັນລະບຽບຮຽບຮ້ອຍໃຫ້ສົມບູນກວ່າເກົ່າ.
ທ່ານ ສີຈິ້ນຜິງ ເນັ້ນໜັກວ່າ: ຈີນຍິນດີຮ່ວມກັບທຸກຝ່າຍ ເພື່ອສືບຕໍ່ຊູຄັນທຸງ “ຈິດໃຈຊຽງໄຮ້”, ຈັດຕັ້ງປະຕິບັດແຜນຍຸດທະສາດດ້ານການພັດທະນາໃນ 10 ປີຂ້າງໜ້າຂອງອົງການຮ່ວມມືຊຽງໄຮ້, ພະຍາຍາມບັນລຸການພັດທະນາທີ່ມີຄຸນນະພາບສູງກວ່າເກົ່າ ແລະ ປະກອບສ່ວນໃຫຍ່ຫຼວງກວ່າເກົ່າເຂົ້າໃນການຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
ບັນດາຜູ້ນຳຈາກປະເທດສະມາຊິກອົງການຮ່ວມມືຊຽງໄຮ້ທີ່ເຂົ້າຮ່ວມກອງປະຊຸມ ໄດ້ຍ້ອງຍໍຊົມເຊີຍຢ່າງເຕັມທີ່ຕໍ່ຜົນສຳເລັດດ້ານການພັດທະນາຂອງອົງການຮ່ວມມືຊຽງໄຮ້ໃນໄລຍະເວລາ 25 ປີຜ່ານມານີ້, ເຫັນດີສືບຕໍ່ສົ່ງເສີມ “ຈິດໃຈຊຽງໄຮ້”, ເພີ່ມທະວີການເຊື່ອມສານຈິດໃຈປະຊາຊົນ, ຮ່ວມມືກັນຮັບມືກັບສິ່ງທ້າທາຍດ້ານຄວາມໝັ້ນຄົງແບບໃໝ່, ຂຽນປະຫວັດສາດໜ້າໃໝ່ແຫ່ງສັນຕິພາບທີ່ຖາວອນ ແລະ ການພັດທະນາຮ່ວມກັນ.
ກອງປະຊຸມດັ່ງກ່າວໄດ້ຕົກລົງໃຫ້ປາກິດສະຖານຮັບໜ້າທີ່ເປັນປະເທດປະທານໝູນວຽນອົງການຮ່ວມມືຊຽງໄຮ້ສຳລັບວາລະປີ 2026-2027.
ຄໍາເຫັນ