ປີ 2025 ແມ່ນປີສຸດທ້າຍຂອງແຜນພັດທະນາເສດຖະກິດ-ສັງຄົມແຫ່ງຊາດຈີນ 5 ປີຄັ້ງທີ XIV. ທ່ານ ສີຈິ້ນຜິງ ໄດ້ສະຫຼຸບວິວັດທະນາການທີ່ບໍ່ທຳມະດາທີ່ສຸດໃນເວລາ 5 ປີຜ່ານມາ ແລະເຫັນວ່າ: ຈີນໄດ້ເຮັດຫຼ້ອນໜ້າທີ່ເປົ້າໝາຍຢ່າງຈົບງາມ ແລະ ໄດ້ຢວ່າງບາດກ້າວອັນໝັ້ນທ່ຽງໃນການເດີນທາງຄັ້ງໃໝ່ແຫ່ງຄວາມທັນສະໄໝແບບຈີນ. ທັງໄດ້ສະແດງຄວາມເຄົາລົບນັບຖືໄປຍັງຜູ້ສູ້ຊົນແຕ່ລະຄົນທີ່ສຸມຄວາມພະຍາຍາມຢ່າງດຸໝັ່ນ.
ທ່ານ ສີຈິ້ນຜິງ ໄດ້ຫວນຄືນເຫດການທີ່ບໍ່ມີວັນຫຼົງລືມ ແລະ ຜົນງານອັນໃຫຍ່ຫຼວງຂອງຈີນໃນປີ 2025 ຄື: ພິທີລະນຶກວັນຄົບຮອບ 80 ປີແຫ່ງໄຊຊະນະສົງຄາມປະຊາຊົນຈີນຕໍ່ຕ້ານການຮຸກຮານຂອງຟາດຊິດ ແລະ ສົງຄາມຕ້ານຟາດຊິດໂລກ ເຊິ່ງເປັນງານມະໂຫລານລະດັບຊາດທີ່ມີຄວາມສະຫງ່າຜ່າເຜີຍ. ການປະດິດສ້າງໃໝ່ໄດ້ຊຸກຍູ້ການກຳເນີດຂອງກຳລັງການຜະລິດໃນຄຸນນະພາບໃໝ່ ແລະເພີ່ມພະລັງແຮງຂັບເຄື່ອນເຂົ້າໃນການພັດທະນາທີ່ມີຄຸນນະພາບສູງ. ລວມຍອດເສດຖະກິດຂອງຈີນຄາດວ່າຈະບັນລຸເຖິງ 140,000 ຕື້ຢວນ. ກະແສດ້ານວັດທະນະທຳ ຫໍພິພິທະພັນ ແລະ ມໍລະດົກວັດທະນະທຳນາມມະທຳໄດ້ຮັບຄວາມນິຍົມຊົມຊອບນັບມື້ນັບຫຼາຍຂຶ້ນ, ຕະຫຼາດການທ່ອງທ່ຽວດ້ານວັດທະນະທຳໄດ້ຕ້ອນຮັບນັກທ່ອງທ່ຽວຈຳນວນຫຼວງຫຼາຍ, ຄວາມດັ້ງເດີມ ແລະ ຄວາມທັນສະໄໝເຊື່ອມໂຍງເຂົ້າກັນ, ຫຼໍ່ລ້ຽງບ້ານເມືອງແຫ່ງຈິດໃຈດ້ວຍວັດທະນະທຳ. ປະຊາຊົນຮ່ວມກັນສ້າງ ແລະ ຮ່ວມກັນຊົມໃຊ້ຊີວິດການເປັນຢູ່ອັນດີງາມ, ເມື່ອຊີວິດການເປັນຢູ່ຂອງແຕ່ລະ “ຄອບຄົວນ້ອຍ” ໃນແຕ່ລະມື້ລ້ວນແຕ່ມີວາມຜາສຸກແລ້ວ, ປະເທດຈີນທີ່ເປັນ “ຄອບຄົວໃຫຍ່” ກໍຈະນັບມື້ນັບກ້າວເຂົ້າສູ່ລະດັບໃໝ່. ທ່ານ ສີຈິ້ນຜິງ ເນັ້ນໜັກວ່າ: ເມື່ອພັກຈະເລີນແລ້ວ ປະເທດຊາດຈຶ່ງຈະເຂັ້ມແຂງໄດ້ ແລະຊີ້ໃຫ້ເຫັນວ່າ: ປີ 2025, ພັກກອມມູນິດຈີນໄດ້ຊຸກຍູ້ການປະຕິວັດຕໍ່ຕົນເອງ, ເຮັດໃຫ້ແບບແຜນຂອງພັກ ແລະ ລັດ ໄດ້ຮັບການປັບປຸງໃຫ້ດີຂຶ້ນຢ່າງຕໍ່ເນື່ອງ.
ຫຼັງຈາກສະເໜີ “3 ຂໍ້ລິເລີ່ມ” ຄື: ຂໍ້ລິເລີ່ມການພັດທະນາທົ່ວໂລກ, ຂໍ້ລິເລີ່ມຄວາມໝັ້ນຄົງທົ່ວໂລກ ແລະຂໍ້ລິເລີ່ມອະລິຍະທຳທົ່ວໂລກແລ້ວ, ທ່ານ ສີຈິ້ນຜິງຍັງໄດ້ສະເໜີຂໍ້ລິເລີ່ມບໍລິຫານທົ່ວໂລກອີກ ເພື່ອຊຸກຍູ້ການສ້າງລະບົບການບໍລິຫານທົ່ວໂລກທີ່ຍຸຕິທຳ ແລະ ສົມເຫດສົມຜົນກວ່າເກົ່າ. ທ່ານ ສີຈິ້ນຜິງ ກ່າວວ່າ: ໃນເມື່ອຜະເຊີນກັບທົ່ວໂລກທີ່ມີການປ່ຽນແປງ ແລະ ຄວາມວຸ່ນວາຍອັນສະຫຼັບຊັບຊ້ອນ, ຈີນຈະຢືນຢູ່ຂ້າງຝ່າຍຖືກຕ້ອງໃນປະຫວັດສາດຢ່າງສະເໝີຕົ້ນສະເໝີປາຍ, ຍິນດີຮ່ວມກັບບັນດາປະເທດ ເກາະແຂນກັນຊຸກຍູ້ສັນຕິພາບ ແລະ ການພັດທະນາຂອງໂລກ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
ເມື່ອມຸ່ງໜ້າສູ່ປີ 2026, ທ່ານ ສີຈິ້ນຜິງ ກ່າວວ່າ: ຈີນຈະຊຸກຍູ້ການພັດທະນາທີ່ມີຄຸນນະພາບສູງຢ່າງໜັກແໜ້ນ, ລົງເລິກການປະຕິຮູບ ແລະ ເປີດປະຕູສູ່ພາຍນອກຢ່າງຮອບດ້ານຕື່ມອີກ, ຊຸກຍູ້ໃຫ້ປະຊາຊົນທົ່ວທັງຊາດຮັ່ງມີຂຶ້ນຮ່ວມກັນ, ສືບຕໍ່ຂຽນໜ້າໃໝ່ແຫ່ງເລື່ອງອັດສະຈັນຂອງຈີນ.
ສຸດທ້າຍ, ທ່ານ ສີຈິ້ນຜິງ ໄດ້ສະແດງຄວາມອວຍພອນອັນປະເສີດໄປຍັງປະຊາຊົນທົ່ວໂລກ, ອວຍພອນທຸກຄົນຈົ່ງມີຄວາມເບີກບານມ່ວນຊື່ນ, ໄດ້ຮັບຜົນສຳເລັດໃນໜ້າທີ່ວຽກງານ ແລະ ສົມຫວັງທຸກປະການ.
ຂ່າວ: ຊີອາໄອ
ຄໍາເຫັນ