ທ່ານ ສີຈິ້ນຜິງ ກ່າວວ່າ: ການສ້າງຄູ່ຮ່ວມຊາຕາກຳຈີນ-ແຊັກບີ ໄດ້ຮັບຜົນສຳເລັດຢ່າງຕັ້ງໜ້າ, ສອງຝ່າຍຄວນເພີ່ມທະວີການແລກປ່ຽນ ແລະ ລົງເລິກການຮ່ວມມື, ຊຸກຍູ້ການພົວພັນຄູ່ຮ່ວມຍຸດທະສາດຮອບດ້ານໃຫ້ຂະຫຍາຍຕົວກ້າວຂຶ້ນສູ່ລະດັບໃໝ່. ຄວນເພີ່ມທະວີການຮ່ວມມືໃນຂົງເຂດພັດທະນາໃໝ່ ເຊັ່ນ: ປັນຍາປະດິດ, ເສດຖະກິດດິີຈີຕອນ ແລະ ອື່ນໆ, ນຳໃຊ້ຂອບ “ຍົກເວັ້ນວີຊາ + ການຄ້າເສລີ + ຖ້ຽວບິນໂດຍກົງ” ໃຫ້ເກີດປະໂຫຍດສູງສຸດ ແລະ ເປີດກວ້າງການແລກປ່ຽນວັດທະນະທຳ.
ທ່ານ ວູຊິກ ກ່າວວ່າ: ແຊັກບີທະນຸຖະໜອມຕໍ່ການພົວພັນກັບຈີນ, ເດັດດ່ຽວສະໜັບສະໜູນຜົນປະໂຫຍດແກນກາງຂອງຈີນ, ຍິນດີລົງເລິກການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ທີ່ມີຄຸນນະພາບສູງ, ຮ່ວມກັນປົກປັກຮັກສາຄວາມຍຸຕິທຳ ແລະ ຄວາມເປັນທຳໃນສາກົນ.
ພາຍຫຼັງສໍາເລັດການພົບປະເຈລະຈາ, ປະມຸກລັດສອງປະເທດໄດ້ຮ່ວມກັນເປັນສັກຂີພິຍານໃນການລົງນາມເອກະສານຮ່ວມມື 20 ກວ່າສະບັບໃນຂົງເຂດການເມືອງ, ເສດຖະກິດການຄ້າ, ວິທະຍາສາດເຕັກໂນໂລຊີ, ການສຶກສາ, ຕຸລາການ, ວັດທະນະທຳ ແລະອື່ນໆ.
ສອງຝ່າຍໄດ້ປະກາດ “ຖະແຫຼງການຮ່ວມລະຫວ່າງສາທາລະນະລັດປະຊາຊົນຈີນ ແລະ ສາທາລະນະລັດແຊັກບີ ວ່າດ້ວຍການສືບຕໍ່ຊຸກຍູ້ການສ້າງຄູ່ຮ່ວມຊາຕາກຳຈີນ-ແຊັກບີໃນຍຸກໃໝ່” ແລະ “ຖະແຫຼງການຮ່ວມລະຫວ່າງສາທາລະນະລັດປະຊາຊົນຈີນ ແລະ ສາທາລະນະລັດແຊັກບີວ່າດ້ວຍການຮ່ວມກັນຊຸກຍູ້ການຈັດຕັ້ງປະຕິບັດ 4 ຂໍ້ລິເລີ່ມທົ່ວໂລກ”.
ຄໍາເຫັນ