 |
ສະພາບນໍ້າຖ້ວມທີ່ເກີດຂຶ້ນໃນຄັ້ງນີ້, ແມ່ນເປັນຜົນມາຈາກພາຍຸລາກາຊາ ແລະພາຍຸບົວລອຍ ທີ່ ສົ່ງຜົນໃຫ້ຝົນຕົກໜັກຕິດຕໍ່ກັນຫຼາຍວັນ ເຮັດໃຫ້ນໍ້າຂັງ ແລະໄຫຼ້ຂົ້າຖ້ວມເນື້ອທີ່ການຜະລິດ, ບ້ານເຮືອນຂອງປະຊາຊົນ ກໍໃຫ້ເກີດຄວາມເສຍຫາຍຕໍ່ຊີວິດການເປັນຢູ່ຂອງປະຊາຊົນ ແລະພືດຜົນກະສິກຳຢ່າງຫຼວງຫຼາຍ.
ການລົງຕິດຕາມໃນຄັ້ງນີ້, ທ່ານເຈົ້າແຂວງ ພ້ອມຄະນະໄດ້ເລີ່ມຕົ້ນຈາກການຂີ່ເຮືອສໍາຫຼວດສະພາບນໍ້າຖ້ວມ ແຕ່ອ່າງເກັບນໍ້າບຶງວະ ບ້ານບຶງວະ ເລາະຕາມເຂດບ້ານໂພນສູງ ແລະດົງໝາກຢາງ ເພື່ອສໍາຫຼວດສະພາບຄວາມເສຍຫາຍແບບລະອຽດ ແລະໃກ້ຊິດກັບຊີວິດການເປັນຢູ່ ຂອງປະຊາຊົນທີ່ປະສົບໄພ.
 |
ຈາກການສໍາຫຼວດພົບວ່າ: ມີບ້ານທັງໝົດ 5 ບ້ານ ທີ່ປະຊາຊົນໄດ້ຮັບຜົນກະທົບຢ່າງໜັກ ຊຶ່ງປະກອບດ້ວຍ: ບ້ານບຶງວະ, ບ້ານໂພນສູງ, ບ້ານຊອກ, ບ້ານຍາງສູງ ແລະ ບ້ານດົງໝາກຢາງ. ປະຊາຊົນໃນບ້ານເຫຼົ່ານີ້ ຕ້ອງປະສົບກັບຄວາມຫຍຸ້ງຍາກ ໃນການດໍາລົງຊີວິດ ເນື່ອງຈາກນໍ້າຖ້ວມ ຂັງຢູ່ເປັນເວລາຫຼາຍວັນ ສົ່ງຜົນກະທົບຕໍ່ການເຄື່ອນໄຫວ, ການຜະລິດ ແລະ ຊີວິດປະຈຳວັນຂອງ ຄອບຄົວ.
ໃນໂອກາດນີ້,ທ່ານເຈົ້າແຂວງ ໄດ້ຮັບຟັງລາຍງານສະພາບຄວາມເສຍຫາຍຈາກຜູ້ຊີ້ນໍາ ກຸ່ມບ້ານ ພ້ອມທັງໄດ້ລົງພົບປະໃຫ້ກຳລັງໃຈ ແລະ ຕິດຕາມສະພາບຄວາມເປັນຢູ່ຂອງພໍ່ແມ່ປະຊາຊົນຢ່າງໃກ້ຊິດ. ທ່ານໄດ້ກ່າວຢືນຢັນວ່າ: ພັກ ແລະ ລັດຖະບານຈະບໍ່ປະຖິ້ມປະຊາຊົນ ແລະ ຈະເອົາໃຈໃສ່ຊ່ວຍເຫຼືອເບື້ອງຕົ້ນຢ່າງທັນການ ພ້ອມທັງໄດ້ສັ່ງການໃຫ້ພາກສ່ວນກ່ຽວຂ້ອງເຮັດວຽກແບບມີປະສິດທິພາບເພື່ອຊ່ວຍເຫຼືອປະຊາຊົນທຸກຄອບຄົວ ຊຶ່ງຕ້ອງມີການສໍາຫຼວດຜົນເສຍຫາຍຕົວຈິງເມື່ອນໍ້າຫຼຸດປະລິມານລົງ.
 |
ເພື່ອເປັນການແກ້ໄຂບັນຫາເບື້ອງຕົ້ນ ທາງການນໍາແຂວງສະຫວັນນະເຂດ ແລະ ນະຄອນ ໄກສອນພົມວິຫານ ໄດ້ມອບການຊ່ວຍເຫຼືອໃຫ້ແກ່ 5 ບ້ານທີ່ປະສົບໄພ ມູນຄ່າ 50 ລ້ານກວ່າກີບ. ໃນນັ້ນ, ທ່ານເຈົ້າແຂວງມອບມູນຄ່າ 31 ລ້ານກວ່າກີບ ໂດຍມີ ປາກະປອງ 14ເກັດ, ໜີ້ 20ແກັດ; ສ່ວນນະຄອນໄກສອນພົມວິຫານ ມອບມູນຄ່າ 23ລ້ານກວ່າກີບ ລວມມີ: ນໍ້າດື່ມ 1 ພັນແພັກ, ໝີ່ແກັດໃຫຍ່ 5ແກັດ. ເພື່ອແກ້ໄຂສຸກເສີນເບື້ອງຕົ້ນ ໃຫ້ແກ່ປະຊາຊົນຜູ້ປະສົບໄພໃນໄລຍະເລັ່ງດ່ວນນີ້. ນອກຈກນັ້ນ, ທາງນະຄອນ ໄດ້ສັ່ງການໃຫ້ ພາກສ່ວນກ່ຽວຂ້ອງຕິດຕາມສະພາບ ແລະ ວາງແຜນການຊ່ວຍເຫຼືອໃນໄລຍະຕໍ່ໄປ.
 |
ທ່ານເຈົ້າແຂວງ ໄດ້ເນັ້ນໜັກ ໃຫ້ພາກສ່ວນກ່ຽວຂ້ອງ ເອົາໃຈໃສ່ຕິດຕາມສະພາບນໍ້າ ແລະ ພ້ອມທັງປະສານງານກັບໜ່ວຍງານກ່ຽວຂ້ອງ ຊ່ວຍເຫຼືອປະຊາຊົນໃນທຸກດ້ານ ພ້ອມກັນນັ້ນໄດ້ ເຕືອນໃຫ້ປະຊາຊົນໃນເຂດທີ່ມີຄວາມສ່ຽງລະມັດລະວັງ ແລະ ຕິດຕາມຂ່າວສານພະຍາກອນອາກາດຢ່າງໃກ້ຊິດ ເພື່ອຫຼີກລ່ຽງອັນຕະລາຍ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ