 |
ສາມຢ່າງທີ່ບໍ່ເຄີຍມີມາກ່ອນ
ທ້າຍປີ 2017, ທ່ານ ສີຈິ້ນຜິງ ໄດ້ສະເໜີຕໍ່ທູຕານຸທູດຕ່າງປະເທດປະຈຳຈີນເປັນຄັ້ງທຳອິດວ່າ: “ເມື່ອເບິ່ງໃນທົ່ວໂລກແລ້ວເຫັນວ່າ, ພາກເຮົາພວມຜະເຊີນໜ້າກັບສະພາບການປ່ຽນແປງອັນໃຫຍ່ຫຼວງແບບບໍ່ເຄີຍມີມາກ່ອນໃນຮອບຮ້ອຍປີ”. ນອກນັ້ນ, ທ່ານຍັງໄດ້ອະທິບາຍເນື້ອໃນອັນເລິກເຊິ່ງຂອງທັດສະນະດັ່ງກ່າວດ້ວຍ “ສາມຢ່າງທີ່ບໍ່ເຄີຍມີມາກ່ອນ”.
 |
ກ່ອນອື່ນກໍຄືຈັງຫວະການພັດທະນາຂອງປະເທດທີ່ເປັນຕະຫຼາດພັດທະນາ ໃໝ່ ແລະ ປະເທດທີ່ກຳລັງພັດທະນາດ້ວຍຄວາມໄວບໍ່ເຄີຍມີມາກ່ອນ. ປະເທດເຂດໂລກໃຕ້ພວມປ່ຽນແປງສະພາບການພັດທະນາຂອງໂລກດ້ວຍຄວາມໄວສູງສຸດຫຼັງເກີດການປະຕິວັດອຸດສາຫະກຳເປັນຕົ້ນມາ; ປະເທດທີ່ພັດທະນາແລ້ວສຳເລັດການຫັນເປັນອຸດສາຫະກຳໃຊ້ເວລາຮ້ອຍກວ່າປີ, ແຕ່ວ່າໃນປັດຈຸບັນ, ອຸດສາຫະກຳ IT ຂອງອິນເດຍເລີ່ມຈາກບໍ່ມີຫຍັງເລີຍ, ໃຊ້ເວລາ 40 ປີໄດ້ກວມສ່ວນຫຼາຍຂອງຕະຫຼາດຮັບເໝົາການຜະລິດຊັອຟແວຂອງໂລກ; ຫວຽດນາມ ສ້າງສຳເລັດ “ໂຮງງານລະດັບໂລກ” ດ້ວຍການເຄື່ອນຍ້າຍຕ່ອງໂສ້ອຸດສາຫະກຳໂດຍໃຊ້ເວລາ 20 ປີ; ຈີນໃຊ້ເວລາ 15 ປີເທົ່ານັ້ນກໍໄດ້ບັນລຸການກ້າວກະໂດດຈາກຜູ້ແລ່ນໄລ່ຕາມກາຍເປັນຜູ້ແລ່ນນຳໜ້າໃນຂົງເຂດ 5G/AI.
 |
ສອງ: ການປະຕິວັດວິທະຍາສາດເຕັກໂນໂລຊີ ແລະ ການປ່ຽນແປງດ້ານອຸດສາຫະກຳຮອບໃໝ່ໄດ້ນຳມາຊຶ່ງການແຂ່ງຂັນຢ່າງດຸເດືອດແບບບໍ່ເຄີຍມີມາກ່ອນ. ເມື່ອເບິ່ງຄືນປະຫວັດສາດຂອງມະນຸດແລ້ວເຫັນວ່າ: ການບຸກທະລຸສຳຄັນທຸກຄັ້ງໃນດ້ານວິທະຍາສາດເຕັກໂນໂລຊີ ລ້ວນແຕ່ຈະພາໃຫ້ເກີດມີການປ່ຽນແປງກຳລັງການຜະລິດຢ່າງເລິກເຊິ່ງແລ້ວພາໃຫ້ສະພາບການສາກົນ ແລະ ລະບຽບສາກົນເກີດມີການປ່ຽນແປງ.
ປັດຈຸບັນ, ມວນມະນຸດເຮົາຢູ່ໃນຄ່ຳຄືນກ່ອນປະຕິວັດວິທະຍາສາດເຕັກໂນໂລຊີ ຄັ້ງທີ 4 ທີ່ມີສັນຍາລັກຕ່າງໆເປັນຕົ້ນ: ວັດຖຸໃໝ່, ພະລັງງານໃໝ່, ປັນຍາປະດິດ, ວິທະຍາສາດກວນຕຳ (quantum science) ແລະ ອື່ນໆຊຶ່ງກຳລັງຊຸກຍູ້ຄວາມສິວິໄລຂອງມະນຸດກ້າວເຂົ້າສູ່ຍຸກອັດສະລິຍະ.
 |
ສາມ: ລະບົບບໍລິຫານໂລກກັບການປ່ຽນແປງຂອງສະພາບສາກົນ ມີຄວາມບໍ່ສອດຄ່ອງ ແລະ ບໍ່ສົມດຸນກັນແບບບໍ່ເຄີຍມີມາກ່ອນ. ລະບົບບໍລິຫານໂລກທີ່ສ້າງຂຶ້ນໃນໄລຍະທ້າຍສົງຄາມໂລກຄັ້ງທີສອງນັ້ນ ແມ່ນບໍ່ທ່ວງທັນກັບການຂະຫຍາຍຕົວແບບຫັນເປັນຫຼາຍຂົ້ວນັ້ນຢ່າງໜັກໜ່ວງ. ດ້ານໜຶ່ງ, ການແບ່ງສິດບໍ່ສອດຄ່ອງກັບການປະກອບສ່ວນດ້ານເສດຖະກິດຢ່າງໜັກໜ່ວງ, ຕົວຢ່າງເຊັ່ນ: ປະເທດເຂດໂລກໃຕ້ໄດ້ປະກອບສ່ວນເຂົ້າໃນການເຕີບໂຕດ້ານເສດຖະກິດໂລກຫຼາຍກວ່າ 70%, ແຕ່ປະເທດເຫຼົ່ານີ້ມີສິດລົງຄະແນນສຽງພຽງ 40% ໃນອົງການສຳຄັນຕ່າງໆເຊັ່ນ: ອົງການກອງທຶນເງິນຕາສາກົນ ຫຼື IMF; ອີກດ້ານໜຶ່ງ, ໂຄງປະກອບການບໍລິຫານແບບດັ່ງເດີມໄດ້ເຜີຍແບໃຫ້ເຫັນເຖິງການເບິ່ງຂ້າມກຸ່ມຄົນດ້ອຍໂອກາດໃນດ້ານລະບຽບການ, ຕົວຢ່າງ: ໃນການເຈລະຈາບັນຫາຕ່າງໆຂອງໂລກເຊັ່ນ: ການປ່ຽນແປງຂອງດິນຟ້າອາກາດເປັນຕົ້ນ, ປະເທດເກາະດອນນ້ອຍທີ່ໄດ້ຮັບໄພຂົ່ມຂູ່ຢ່າງໜັກໜ່ວງທີ່ສຸດຈາກບັນຫາດັ່ງກ່າວນັ້ນຊ້ຳພັດມີສິດອອກຄຳເຫັນໜ້ອຍທີ່ສຸດເມື່ອທຽບໃສ່ປະເທດທີ່ພັດທະນາແລ້ວ ທີ່ລະບາຍກາກບອນກວມອັດຕາສ່ວນຫຼາຍກວ່າໃນປະຫວັດສາດ.
“ໂລກປັດຈຸບັນຢູ່ໃນສະພາບການປ່ຽນແປງອັນໃຫຍ່ຫຼວງແບບບໍ່ເຄີຍມີມາກ່ອນໃນຮອບຮ້ອຍປີ”, ທັດສະນະນີ້ສາມາດໃຊ້ໃນການສັງເກດທິດທາງການພັດທະນາຂອງໂລກປັດຈຸບັນ ແລະ ກໍສາມາດໃຊ້ໃນການສັງເກດທິດທາງການພັດທະນາຂອງຈີນໃນຍຸກໃໝ່ເຊັ່ນດຽວກັນ.
ຈາກການລົງນາມໃນໂຄງການ “ໜຶ່ງແລວໜຶ່ງເສັ້ນທາງ” ກັບ 150 ກວ່າປະເທດ ແລະ 30 ກວ່າອົງການຈັດຕັ້ງສາກົນຮອດແນວຄິດ “ປະຊາຄົມຮ່ວມຊາຕາກຳຂອງມວນມະນຸດ” ຖືກບັນທຶກເຂົ້າໃນເອກະສານຂອງອົງການສະຫະປະຊາຊາດແລະ ອົງການຈັດຕັ້ງສາກົນອື່ນໆຫຼາຍຄັ້ງ; ຈາກການເປີດປະຕູຕໍ່ໂລກຂອງສະຖານີອະວະກາດສາກົນຈີນຮອດການເປີດກວ້າງລະບົບ DeepSeek ໃຫ້ທົ່ວໂລກນຳໃຊ້ໂດຍບໍ່ເກັບຄ່າ; ຈາກທ່ານປະທານ ສີຈິ້ນຜິງ ສະເໜີຂໍ້ລິເລີ່ມການພັດທະນາທົ່ວໂລກ, ຂໍ້ລິເລີ່ມຄວາມໝັ້ນຄົງທົ່ວໂລກ ແລະ ຂໍ້ລິເລີ່ມອະລິຍະທຳທົ່ວໂລກຮອດອົງການຈັດຕັ້ງສາກົນທີ່ຈີນເປັນຜູ້ນຳພາສ້າງຕັ້ງເປັນຕົ້ນ: ອົງການຮ່ວມມືຊຽງໄຮ ແລະ ທະນາຄານການລົງທຶນພື້ນຖານໂຄງລ່າງອາຊີ ໄດ້ເສີມຂະຫຍາຍບົດບາດນັບມື້ນັບສຳຄັນໃນຂົງເຂດການຮັກສາຄວາມໝັ້ນຄົງສາກົນ, ເສດຖະກິດການຄ້າ, ການຮ່ວມມືໃນພາກພື້ນ ແລະ ການແກ້ໄຂບັນຫາທົ່ວໂລກ.
ດັ່ງນັ້ນເຫັນໄດ້ວ່າ: ຄວາມເຂັ້ມແຂງຂອງຈີນບໍ່ໄດ້ນຳເອົາຄວາມຂັດແຍ່ງ ແລະ ສົງຄາມມາສູ່ໂລກ, ຫາກແມ່ນຊອກເຫັນຮູບແບບອະລິຍະທຳແບບໃໝ່. ອັນນີ້ຄືຄວາມຮັບຮູ້ທີ່ເລິກເຊິ່ງຈາກການປ່ຽນແປງແບບບໍ່ເຄີຍມີມາກ່ອນໃນຮອບຮ້ອຍປີ ຄື: ສິ່ງທີ່ໂລກຕ້ອງການບໍ່ແມ່ນການສິ້ນສຸດປະຫວັດສາດ, ແຕ່ແມ່ນໃຫ້ອະລິຍະທຳທີ່ແຕກຕ່າງກັນຮ່ວມກັນຂຽນປະຫວັດສາດໜ້າໃໝ່.
ໂດຍ: ຊີອາໄອ
ຄໍາເຫັນ