 |
ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ຮັບກຽດເຊີນເປັນແຂກກິດຕິມະສັກ ແລະ ໄດ້ຂຶ້ນກ່າວຄຳປາໄສ ຊຶ່ງທ່ານໄດ້ມີຄຳເຫັນວ່າ: ການຈັດງານວາງສະແດງດັ່ງກ່າວ ເພື່ອສ້າງກາລະໂອກາດໃຫ້ບັນດາພາກທຸລະກິດ ທີ່ມາຈາກປະເທດຕ່າງໆໃນໂລກ, ລວມທັງ ສປປ ລາວ ໄດ້ພົບປະແລກປ່ຽນຂໍ້ມູນຂ່າວສານ ດ້ານການຄ້າ-ການລົງທຶນ, ສົ່ງເສີມການທ່ອງທ່ຽວ ແລະ ສົ່ງເສີມການ ຮ່ວມມືດ້ານທຸລະກິດ ເພື່ອເຊື່ອມໂຍງຕະຫຼາດສິນຄ້ານຳກັນ. ການເຂົ້າຮ່ວມງານວາງສະແດງຄັ້ງນີ້ ບໍ່ແມ່ນພຽງແຕ່ສະແດງສິນຄ້າ ແຕ່ຍັງສ້າງຄວາມໄວ້ເນື້ອເຊື່ອໃຈຊຶ່ງກັນ ແລະ ກັນ ລະຫວ່າງ ບັນດາປະເທດ ກໍຄື ພາກສ່ວນເອກະຊົນ ແລະ ພາກລັດ ທີ່ຈະຮ່ວມສ້າງອະນາຄົດທີ່ໝັ້ນຄົງ ແລະ ຍືນຍົງ. ປີ 2024 ທີ່ຜ່ານມາ, ສປປ ລາວ ໄດ້ຮັບກຽດເປັນປະທານໜູນວຽນອາຊຽນ ຊຶ່ງໄດ້ຈັດກອງປະຊຸມສຸດຍອດອາຊຽນ ຮ່ວມກັບປະເທດຄູ່ຮ່ວມເຈລະຈາຕ່າງໆ ແລະ ກອງປະຊຸມປິ່ນອ້ອມຫຼາຍກອງປະຊຸມທີ່ສໍາຄັນ ໂດຍສະເພາະກອງປະຊຸມລົງທຶນອາຊຽນ. ກອງປະຊຸມດັ່ງກ່າວ ໄດ້ກຳນົດທິດທາງການລົງທຶນອາຊຽນໃນໄລຍະໃໝ່ ໂດຍໄດ້ຢຶດຖືເອົາການພັດທະນາເສດຖະກິດ-ສັງຄົມ ຕາມທິດ “ສີຂຽວ ແລະ ຍືນຍົງ” ເປັນເປົ້າໝາຍຫຼັກຂອງການພັດທະນາໃນໄລຍະໃໝ່ ເຫັນໄດ້ເຖິງກາລະໂອກາດ ກໍຄື ທ່າແຮງຂອງການພັດທະນາແບບຍືນຍົງ. ສປປ ລາວ ໄດ້ວາງຍຸດທະສາດການເຕີບໂຕສີຂຽວແຫ່ງຊາດ ທີ່ໄດ້ຖືກຮັບຮອງໃນປີ 2018 ຊຶ່ງສະແດງໃຫ້ເຫັນທ່າແຮງ ແລະ ສົ່ງເສີມການຫັນປ່ຽນ ຕາມທິດດັ່ງກ່າວ ຄື: ໜຶ່ງ: ທ່າແຮງດ້ານພະລັງງານສະອາດ: ສປປ ລາວ ເປັນປະເທດທີ່ນໍາໜ້າໃນພາກພື້ນ ທີ່ພັດທະນາພະລັງງານສະອາດ ເພື່ອຕອບສະໜອງຄວາມຕ້ອງການພະລັງງານຂອງປະເທດ ແລະ ພາກພື້ນອາຊຽນ ໂດຍສະເພາະ ພະລັງງານທີ່ມາຈາກໄຟຟ້ານໍ້າຕົກ, ແສງຕາເວັນ, ພະລັງງານລົມ, ພະລັງງານແບບສູບກັບ (Pump Storage), ພະລັງງານສິ່ງເສດເຫຼືອ ແລະ ອື່ນໆ; ສອງ: ການຊື້-ຂາຍສິນເຊື່ອກາກບອນ (Carbon Credit): ສປປ ລາວ ຖືກຈັດເປັນອັນດັບທີ 1 ໃນອາຊຽນ ແລະ ອັນດັບທີ 8 ຂອງໂລກ ທີ່ຍັງມີປ່າໄມ້ປົກຫຸ້ມຫຼາຍກວ່າໝູ່. ສະນັ້ນ, ດ້ວຍວິໄສທັດທີ່ຈະບັນລຸການປົກຫຸ້ມຂອງປ່າໄມ້ໃຫ້ໄດ້ 70% ຈຶ່ງເປັນກາລະໂອກາດ ສໍາລັບການລົງທຶນທີ່ຕິດພັນກັບການປົກປັກຮັກສາ ແລະ ຟື້ນຟູພື້ນທີ່ປ່າໄມ້, ການຫຼຸດຜ່ອນການປ່ອຍອາຍກາໂບນິກ ໃນກົນໄກການຊື້-ຂາຍສິນເຊື່ອກາກບອນ; ສາມ: ລັດຖະບານ ແຫ່ງ ສປປ ລາວ ມີນະໂຍບາຍຊຸກຍູ້ການລົງທຶນໃນຂົງເຂດກະສິກຳທັນສະໄໝ, ກະສິກຳສະອາດ, ກະສິກຳປຸງແຕ່ງ ແລະ ການພັດທະນາລະບົບຕ່ອງໂສ້ມູນຄ່າ ເພື່ອຮັບປະກັນຄວາມໝັ້ນຄົງດ້ານສະບຽງອາຫານ, ໜູນຊ່ວຍການທ່ອງທ່ຽວສີຂຽວ, ເຖິງແມ່ນວ່າ ຈະເປັນປະເທດທີ່ບໍ່ມີຊາຍແດນຕິດຈອດກັບທະເລກໍ່ຕາມ, ແຕ່ ສປປ ລາວ ມີທີ່ຕັ້ງພູມສາດທີ່ສຳຄັນ ແລະ ສິ່ງສຳຄັນ ປະເທດລາວ ມີສະຖຽນລະພາບທາງດ້ານການເມືອງທີ່ໜັກແໜ້ນ, ມີນະໂຍບາຍເປີດກວ້າງດຶງດູດການຄ້າ-ການລົງທຶນ, ມີຊັບພະຍາກອນທຳມະຊາດທີ່ອຸດົມສົມບູນ ແລະ ແຫຼ່ງທ່ອງທ່ຽວ ທີ່ສວຍສົດງົດງາມ. ຄຽງຄູ່ກັບທ່າແຮງດັ່ງກ່າວນັ້ນ ກໍຈຳເປັນຕ້ອງມີກຳລັງແຮງ ດ້ານທຶນຮອນ, ດ້ານເຕັກໂນໂລຊີ, ຄວາມຮູ້ເຊີງປະຕິບັດ (Know-How) ເຂົ້າຊ່ວຍ ເພື່ອບັນລຸແຜນຍຸດທະສາດການພັດທະນາສີຂຽວ-ຍືນຍົງ.
 |
ພ້ອມດຽວກັນນີ້, ທ່ານ ຮອງນາຍົກລັດຖະມົນຕີ ຍັງໄດ້ເຊື້ອເຊີນບັນດາວິສາຫະກິດ ຈາກ ສປ ຈີນ ແລະ ປະເທດຕ່າງໆ ເຂົ້າໄປສຶກສາໂອກາດການລົງທຶນໃນຂະແໜງການຕ່າງໆ ທີ່ ສປປ ລາວ ມີທ່າແຮງ ເປັນຕົ້ນ ການຜະລິດສິນຄ້າກະສິກຳສະອາດທີ່ມີມູນຄ່າສູງ, ອຸດສາຫະກຳປຸງແຕ່ງ ທີ່ນຳໃຊ້ນະວັດຕະກໍາ, ການທ່ອງທ່ຽວສີຂຽວ, ພະລັງງານສະອາດ-ພະລັງງານທົດແທນ, ການພັດທະນາພື້ນຖານໂຄງລ່າງ, ໂລຈິສຕິກ, ທ່າບົກ, ການບໍລິການດ້ານການເງິນ ແລະ ອື່ນໆ ຊຶ່ງ ສປປ ລາວ ພ້ອມທີ່ຈະຮ່ວມມື ແລະ ອຳນວຍຄວາມສະດວກຢ່າງເຕັມທີ່ ໃຫ້ແກ່ການລົງທຶນ ບົນພື້ນຖານ ຕ່າງຝ່າຍ ຕ່າງໄດ້ຮັບຜົນປະໂຫຍດຮ່ວມກັນ.
 |
ໃນໂອກາດເຂົ້າຮ່ວມງານວາງສະແດງຄັ້ງນີ້, ທ່ານ ຮອງນາຍົກລັດຖະມົນຕີ ແຫ່ງ ສປປ ລາວ ຍັງໄດ້ພົບປະສອງຝ່າຍກັບທ່ານ ເຈີນ ຮົ່ງ ຮາ ຮອງນາຍົກລັດຖະມົນຕີ ແຫ່ງ ສສ ຫວຽດນາມ ຊຶ່ງການພົບປະຄັ້ງນີ້ ສອງຝ່າຍຕີລາຄາສູງຕໍ່ສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ການຮ່ວມມືຮອບດ້ານ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ; ແລະ ໄດ້ພົບປະກັບ ທ່ານ ຫວັງ ຢຸ້ຍໂປ່ ເຈົ້າແຂວງຢຸນນານ ຊຶ່ງການພົບປະຄັ້ງນີ້ ສອງຝ່າຍໄດ້ຕີລາຄາສູງ ຕໍ່ການເປັນປະເທດເພື່ອນມິດຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມສະຕາກຳ ລາວ-ຈີນ, ຈີນ-ລາວ. ພ້ອມກັນນີ້, ຍັງໃຫ້ກຽດສຳພາດແກ່ສຳນັກຂ່າວ ສປ ຈີນ ຈຳນວນໜຶ່ງ.
 |
ນອກຈາກນີ້, ຄະນະຜູ້ແທນ ສປປ ລາວ ຍັງໄດ້ເດີນທາງໄປຢ້ຽມຢາມສະຖານທີ່ຕ່າງໆ ເປັນຕົ້ນ ສະຖານກົງສູນໃຫຍ່ ແຫ່ງ ສປປ ລາວ ປະຈຳນະຄອນຄຸນມິງ; ມະຫາວິທະຍາໄລຊົນເຜົ່າຢຸນນານ; ໂຮງຮຽນວິຊາຊີບການເຕັກນິກລົດໄຟຄຸນມິງ; ສໍານັກງານໃຫຍ່ຂອງກຸ່ມບໍລິສັດ ລົງທຶນກໍ່ສ້າງຢຸນນານ ແລະ ບໍລິສັດ ອາລູມິນຽມຢຸນນານ ຕື່ມອີກ.
(ຂ່າວ-ພາບ: ຫສນຍ)
ຄໍາເຫັນ