ທ່ານນາຍົກລັດຖະມົນຕີເຂົ້າຮ່ວມພິທີເປີດນຳໃຊ້ສະໜາມບິນສາກົນບໍ່ແກ້ວ

ທ່ານສອນໄຊສີພັນດອນນາຍົກລັດຖະມົນຕີໄດ້ໃຫ້ກຽດເຂົ້າຮ່ວມພິທີເປີດນຳໃຊ້ສະໜາມບິນສາກົນບໍ່ແກ້ວຢ່າງເປັນທາງການໃນວັນທີ 5 ກຸມພາ ນີ້,ໂດຍມີທ່ານບົວຄົງນາມມະວົງເຈົ້າແຂວງບໍ່ແກ້ວ;ທ່ານຈ້າວເຫວີຍປະທານສະພາບໍລິຫານເຂດເສດຖະກິດພິເສດສາມຫຼ່ຽມຄຳ;ບັນດາການນຳບັນດາກະຊວງ-ອົງການຂັ້ນສູນກາງ,ການນໍາບັນດາແຂວງ,ການນໍາຫຼັກແຫຼ່ງພາຍໃນແຂວງບໍ່ແກ້ວພ້ອມດ້ວຍການນໍາເມືອງ,ບ້ານ, ພາກທຸລະກິດທີ່ກ່ຽວຂ້ອງແລະແຂກຖືກເຊີນເຂົ້າຮ່ວມ. 
ໃນພິທີ, ທ່ານຈ້າວເຫວີຍກໍໄດ້ມີຄຳເຫັນຕໍ່ພິທີບາງຕອນວ່າ: ສະໜາມບິນສາກົນບໍ່ແກ້ວແຫ່ງນີ້ມີການກໍ່ສ້າງທີ່ເປັນເອກະລັກສະເພາະ, ມີລະບົບການບໍລິການທີ່ສົມບູນແບບ, ມີສິ່ງອຳນວຍຄວາມສະດວກ, ສະພາບແວດລ້ອມທີ່ສວຍງາມ, ມີຄວາມສາມາດໃນການຮອງຮັບທີ່ປອດໄພແລະມີປະສິດທິພາບເຮັດໃຫ້ກາຍເປັນສະໜາມບິນສາກົນທີ່ທັນສະ
ໄໝແລະໃຫຍ່ທີ່ສຸດໃນພາກເໜືອຂອງລາວ. ການເປີດສະໜາມບິນແຫ່ງໃໝ່ນີ້ແມ່ນຂີດໝາຍໃໝ່ຂອງການກໍ່ສ້າງແລະພັດທະນາເຂດເສດຖະກິດພິເສດສາມຫຼ່ຽມຄຳຊຶ່ງຈະຖືເອົາໂອກາດໃໝ່ໃນການພັດທະນາ, ສູ້ຊົນພະຍາຍາມແລະສ້າງເຂດເສດຖະກິດພິເສດແຫ່ງນີ້ໃຫ້ກາຍເປັນຕົວເມືອງໃໝ່ທີ່ທັນສະໄໝແລະເຕັມໄປດ້ວຍສະເໜ່ເພື່ອດຶງດູດການທ່ອງທ່ຽວ, ການຄ້າ, ການລົງທຶນ, ການດຳລົງຊີວິດແລະການສຶກສາ.
ໃນໂອກາດນີ້, ທ່ານລັນແສງອາພອນຮອງລັດຖະມົນຕີກະຊວງໂຍທາທິການແລະຂົນສົ່ງໄດ້ໃຫ້ຮູ້:ໂຄງການນີ້ໄດ້ເລີ່ມລົງມືກໍ່ສ້າງໃນວັນທີ 20 ກັນຍາ 2020, ຕາມແຜນການກໍ່ສ້າງແມ່ນໃຫ້ສຳເລັດພາຍໃນ 18 ເດືອນ, ແຕ່ຍ້ອນສະພາບການລະບາດຂອງພະຍາດໂຄວິດ-19 ເຮັດໃຫ້ການຂົນສົ່ງວັດຖຸອຸປະກອນຕິດຕັ້ງຕ່າງໆລວມທັງການກໍ່ສ້າງຕົວຈິງແກ່ຍາວເຖິງ 3 ປີກວ່າຈຶ່ງສໍາເລັດ. ໂຄງການດັ່ງກ່າວເປັນການລົງທຶນຂອງບໍລິສັດກຣິດເຕີເບເອເລຍອິນເວດເມັນແອນດີເວວລົບເມັ້ນຈຳກັດ 100% ໃນຮູບແບບBOT,ເປັນສະໜາມບິນຂະໜາດCode 4C, ມີທາງຂຶ້ນ-ລົງຍາວ2.500ແມັດແລະສາມາດຂະຫຍາຍໄດ້ເຖິງ3.000ແມັດ, ສາມາດຮອງຮັບການລົງຈອດຂອງຍົນແອບັດສA321 ແລະໂບອິ້ງ737-900, ອາຄານຜູ້ໂດຍສານສາມາດຮອງຮັບຜູ້ໂດຍສານເຂົ້າ-ອອກ600ຄົນ, ມີຕຶກອາຄານຫໍບັນຊາການບິນແລະສິ່ງອຳນວຍຄວາມສະດວກຕ່າງໆຢ່າງເປັນລະບົບ;ໂດຍນໍາໃຊ້ເນື້ອທີ່ດິນໃນການກໍ່ສ້າງ300 ກວ່າເຮັກຕາ,ມູນຄ່າການລົງທຶນທັງໝົດ 225 ລ້ານກວ່າໂດລາ,ອາຍຸສໍາປະທານ 50 ປີຊຶ່ງຫຼັງຈາກໝົດອາຍຸສໍາປະທານແລ້ວຈະມອບໂອນໂຄງການຄືນໃຫ້ລັດຖະບານຕາມສັນຍາລວມທັງເນື້ອທີ່ດິນ. ການກໍ່ສ້າງແມ່ນໄດ້ມາດຕະຖານຄວາມປອດໄພຂອງອົງການການບິນພົນລະເຮືອນສາກົນ (ICAO). ພາຍຫຼັງເປີດນໍາໃຊ້ຈະໄດ້ເປີດໃຫ້ບໍລິການສາຍການບິນພາຍໃນປະເທດກ່ອນໂດຍຮອງຮັບເຮືອບິນATR 72ຫຼືທຽບເທົ່າເພື່ອໃຫ້ບໍລິການບິນຂຶ້ນ-ລົງສະໜາມບິນ, ລານຈອດ, ບໍລິການຜູ້ໂດຍສານ,ບໍລິການວິທະຍຸຊ່ວຍລົງເດີ່ນ,ບໍລິການພາກພື້ນດິນແລະອື່ນໆທີ່ກ່ຽວຂ້ອງຕາມທີ່ໄດ້ລະບຸໃນສັນຍາສໍາປະທານ. ພ້ອມກັນນັ້ນ, ທ່ານຍັງໄດ້ຕີລາຄາວ່າການກໍ່ສ້າງສະໜາມບິນແຫ່ງນີ້ແມ່ນເປັນເປົ້າໝາຍຂອງການພັດທະນາໂຄງລ່າງພື້ນຖານພາຍໃນທ້ອງຖິ່ນໄປຄຽງຄູ່ກັບການເສີມສ້າງການຄົມມະນາຄົມຂົນສົ່ງທາງອາກາດຂອງແຂວງໃຫ້ມີຄວາມເຂັ້ມແຂງເພື່ອເຊື່ອມຈອດກັບພາຍໃນ, ພາກພື້ນແລະສາກົນ,ອໍານວຍຄວາມສະດວກໃນການລົງທຶນ, ການທ່ອງທ່ຽວທັງພາຍໃນແລະຕ່າງປະເທດເພີ່ມຂີດຄວາມສາມາດໃນການພັດທະນາເຂດພາກເໜືອຂອງສປປລາວໂດຍສະເພາະແຂວງບໍ່ແກ້ວ.
    ໃນໂອກາດດຽວກັນ,ທ່ານ ບົວຄົງ ນາມມະວົງກໍໄດ້ມີຄຳເຫັນບາງຕອນວ່າ: ໂຄງການສະໜາມບິນສາກົນບໍ່ແກ້ວເປັນໜຶ່ງໃນ 13 ກິດຈະການທີ່ໄດ້ລະບຸໄວ້ໃນສັນຍາພັດທະນາເຂດເສດຖະກິດພິເສດສາມຫຼ່ຽມຄໍາ,ທັງເປັນການຈັດຕັ້ງປະຕິບັດຍຸດທະສາດການພັດທະນາແຂວງບໍ່ແກ້ວ, ເປັນໂຄງການຂະໜາດໃຫຍ່ທີ່ສໍາຄັນໃນການສົ່ງເສີມການຄົມມະນາຄົມຂົນສົ່ງທາງອາກາດເພື່ອເຊື່ອມຈອດລະຫວ່າງແຂວງບໍ່ແກ້ວກັບບັນດາແຂວງພາຍໃນແລະຕ່າງປະເທດຊຶ່ງເປັນເງື່ອນໄຂອຳນວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມຂອງແຂວງກໍຄືສປປລາວ;ພ້ອມທັງກ່າວຍ້ອງຍໍຊົມເຊີຍຕໍ່ທຸກພາກສ່ວນທີ່ມີສ່ວນຮ່ວມເຮັດໃຫ້ການກໍ່ສ້າງໂຄງການນີ້ມີຜົນສຳເລັດແລະຮຽກຮ້ອງພາກສ່ວນທີ່ຮັບຜິດຊອບຄຸ້ມຄອງແລະນຳໃຊ້ສະໜາມບິນຈົ່ງເປັນເຈົ້າການຊ່ວຍກັນປົກປັກຮັກສາ, ເຮັດໃຫ້ການນໍາໃຊ້ສະໜາມບິນແຫ່ງນີ້ສາມາດນຳໃຊ້ໄດ້ຍາວນານ,ມີຄວາມ
ໝັ້ນຄົງຍືນຍົງ,ສະຫງົບ-ປອດໄພແລະເກີດປະໂຫຍດສູງສຸດ.ຫຼັງຈາກນັ້ນກໍໄດ້ກ່າວເປີດການນຳໃຊ້ສະໜາມບິນສາກົນບໍ່ແກ້ວຢ່າງເປັນທາງການ.

ໃນໂອກາດທີ່ມີຄວາມໝາຍສຳຄັນນີ້,ທ່ານນາຍົກລັດຖະມົນຕີກໍໄດ້ໃຫ້ກຽດຂຶ້ນຕັດແຖບຜ້າແລະລັ່ນຄ້ອງເພື່ອເປັນສິລິມຸງຄຸນໃຫ້ແກ່ການເປີດນຳໃຊ້ສະໜາມບິນສາກົນບໍ່ແກ້ວຢ່າງເປັນທາງການໃນຄັ້ງນີ້.

ສຳລັບສາຍການບິນ ລາວແອລາຍ (Lao Airlines) ທີ່ຈະບິນວຽງຈັນ-ບໍ່ແກ້ວ-ວຽງຈັນ ນັ້ນພາກສ່ວນທີ່ກ່ຽວຂ້ອງ ກຳລັງປຶກສາຫາລື ເພື່ອກະກຽມຄວາມພ້ອມ ແລະ ແຜນ ໃນການກຳນົດຖ້ຽວບິນຮ່ວມກັນ; ສ່ວນສາຍການບິນລາວເດີນອາກາດ (Lao Skyway) ແລະ ສາຍການບິນລ້ານຊ້າງ ແອເວ (Lanexang Airways) ແມ່ນຍັງໃຫ້ບໍລິການປົກກະຕິ.

ຂ່າວແລະພາບ: ກົມປະຊາສຳພັນຫສນຍ.