ທ່ານ ທອງລຸນ ສີສຸລິດ ໄດ້ສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງ ຕໍ່ທ່ານຫົວໜ້າອົງການໄອຍະການສູງສຸດ ແຫ່ງ ສະຫະພັນ ຣັດເຊຍ ແລະ ຄະນະທີ່ໄດ້ມາຢ້ຽມຢາມ ສປປ ລາວ ຄັ້ງນີ້, ການຢ້ຽມຢາມຂອງຄະນະຜູ້ແທນ ສ ຣັດເຊຍ ແມ່ນມີຄວາມໜາຍສໍາຄັນຍິ່ງ ຊຶ່ງເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບອັນມີມູນເຊື້ອ ແລະ ການຮ່ວມມືຫຼາຍດ້ານ ລະຫ່ວາງສອງປະເທດ ລາວ ແລະ ຣັດເຊຍ, ໂດຍສະເພາະແມ່ນການຮ່ວມມືໃນຂົງເຂດກົດໝາຍ ແລະ ຍຸຕິທໍາໃຫ້ນັບມື້ນັບແໜ້ນແຟ້ນ ແລະ ເກີດດອກອອກຜົນຍິ່ງໆຂຶ້ນ.
ທ່ານ ທອງລຸນ ສີສຸລິດ ໄດ້ກ່າວວ່າ: ຍາມໃດກໍໃຫ້ຄວາມສໍາຄັນ ແລະ ພ້ອມທີ່ຈະສືບຕໍ່ຮ່ວມມືຢ່າງໃກ້ຊິດກັບ ສະຫະພັນ ຣັດເຊຍ ໃນທຸກຂົງເຂດທີ່ມີທ່າແຮງຮ່ວມກັນ, ບໍ່ວ່າຈະເປັນດ້ານການເມືອງ, ການປ້ອງກັນຊາດ-ປ້ອງກັນຄວາມສະຫົງບ, ເສດຖະກິດ-ການຄ້າ, ການລົງທຶນ, ການສຶກສາ, ວັດທະນະທໍາ, ການທ່ອງທ່ຽວ ແລະ ການຮ່ວມມືເວທີພາກພື້ນ ແລະ ສາກົນ. ພວກຂ້າພະເຈົ້າສະແດງຄວາມຂອບໃຈຕໍ່ລັດຖະບານ ແລະ ປະຊາຊົນຣັດເຊຍ ສໍາລັບການສະໜັບສະໜູນ ແລະ ຊ່ວຍເຫຼືອ ສປປ ລາວ ຕະຫຼອດມາ, ໂດຍສະເພາະໃນການພັດທະນາຊັບພະຍາກອນມະນຸດ, ການຊ່ວຍເຫຼືອດ້ານເຕັກນິກ-ການທະຫານ, ລວມທັງການຊ່ວຍເຫຼືອເກັບກູ້ລະເບີດບໍ່ທັນແຕກຢູ່ ສປປ ລາວ.
ຈາກນັ້ນ, ທ່ານ ທອງລຸນ ສີສຸລິດ ຍັງໄດ້ອວຍພອນໃຫ້ທ່ານ ອິກໍ ວິກຕໍຣໍຈ ກຣາສນົບ ພ້ອມດ້ວຍຄະນະ ຈົ່ງປະສົບຜົນສໍາເລັດຢ່າງຈົບງາມ ໃນການມາເຮັດວຽກຢູ່ ສປປ ລາວ ໃນຄັ້ງນີ້, ພ້ອມທັງຝາກຄວາມຢື້ຢາມຖາມຂ່າວອັນອົບອຸ່ນ ແລະ ຄໍາອວຍພອນອັນປະເສີດໄປຍັງ ທ່ານ ວາລາດີເມຍ ປູຕິນ ແລະ ບັນດາການນໍາຂັ້ນສູງຂອງ ສະຫະພັນ ຣັດເຊຍ ອີກດ້ວຍ.
ທ່ານຫົວໜ້າອົງການໄອຍະການສູງສຸດ ແຫ່ງ ສະຫະພັນ ຣັດເຊຍ ໄດ້ສະແດງຄວາມຂອບໃຈຢ່າງສູງຕໍ່ກັບການຕ້ອນຮັບອັນອົບອຸ່ນຂອງ ທ່ານປະທານປະເທດ ແຫ່ງ ສາທາລະນະລັດ ປະຊາທິປະໄຕປະຊາຊົນລາວ ໃນຄັ້ງນີ້, ໂອກາດດັ່ງກ່າວ ທ່ານຫົວໜ້າອົງການໄອຍະການສູງສຸດ ສ ຣັດເຊຍ ໄດ້ລາຍງານການມາຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້ ໃຫ້ທ່ານ ທອງລຸນ ສີສຸລິດ ໄດ້ຮັບຊາບ ເປັນຕົ້ນ ສະພາບການຮ່ວມມື ແລະ ການເຄື່ອນໄຫວວຽກງານ ອົງການໄອຍະການຂອງສອງປະເທດ ຣັດເຊຍ - ລາວ ໃນໄລຍະຜ່ານມາແມ່ນໄດ້ຮັບການພັດທະນາດີຂຶ້ນຢ່າງບໍ່ຢຸດຢັ້ງ, ສໍາຄັນແມ່ນການຜັດປ່ຽນຄະນະຜູ້ແທນຂັ້ນສູງໄປຢ້ຽມຢາມ ແລະ ແລກປ່ຽນບົດຮຽນຮ່ວມກັນ. ແນໃສ່ການພັດທະນາຂົງເຂດວຽກງານໄອຍະການຂອງສອງປະເທດໃຫ້ເຂົ້າສູ່ລວງເລິກ.
(ຂ່າວ: ວົງເດືອນ)
ຄໍາເຫັນ