ທ່ານສີຈິ້ນຜິງ ພົບປະເຈລະຈາກັບທ່ານໂດໂນ ທຣຳ

ທ່ານ ສີຈິ້ນຜິງ ກ່າວວ່າ: ປະມຸກລັດຈີນ ແລະອາເມຣິກາໄດ້ບັນລຸການຢ້ຽມຢາມຊຶ່ງກັນ ແລະ ກັນ ພາຍໃນເວລາບໍ່ຮອດເຄິ່ງປີ, ແມ່ນເຫດການທີ່ບໍ່ເຄີຍມີມາກ່ອນໃນປະຫວັດສາດແຫ່ງການພົວພັນລະຫວ່າງຈີນ-ອາເມຣິກາ. ຂ້າພະເຈົ້າ ກັບທ່ານທຣຳໄດ້ຮັກສາການແລກປ່ຽນກັນດ້ວຍວິທີຕ່າງໆ ມາໂດຍຕະຫຼອດ ເພື່ອຮ່ວມຄວບຄຸມ ແລະບັນຊາກຳປັ່ນໃຫຍ່ແຫ່ງການພົວພັນລະຫວ່າງຈີນ-ອາເມຣິກາ. ເດືອນພຶດສະພາປີນີ້ ຂ້າພະເຈົ້າກັບທ່ານ ທຣຳ ໄດ້ເຫັນດີເປັນເອກະພາບກັນສ້າງການພົວພັນທີ່ ໝັ້ນທ່ຽງທາງຍຸດທະສາດທີ່ສ້າງສັນ ຊຶ່ງການພົວພັນອັນໃໝ່ນີ້ ໄດ້ສະທ້ອນໃຫ້ເຫັນສະພາບຄວາມເປັນຈິງຂອງສາຍພົວພັນລະຫວ່າງສອງປະເທດ, ທັງສະແດງໃຫ້ເຫັນຄວາມມຸ່ງຫວັງຂອງພວກເຮົາທີ່ມີຕໍ່ອະນາຄົດ, ເປັນບາດກ້າວສຳຄັນເພື່ອເດີນໄປສູ່ການຢູ່ຮ່ວມກັນຢ່າງຖືກຕ້ອງລະຫວ່າງສອງປະເທດ. ພວກເຮົາຕ້ອງຫັນວິໄສທັດດັ່ງກ່າວໃຫ້ເປັນການເຄື່ອນໄຫວຕົວຈິງ, ສຸມຄວາມພະຍາຍາມຕາມທິດທີ່ມີການຮ່ວມມືເປັນຫຼັກ, ມີການແຂ່ງຂັນທີ່ສົມເຫດສົມຜົນ, ສາມາດຄວບຄຸມຄວາມຂັດແຍ້ງ ແລະມີສັນຕິພາບທີ່ຄາດຫວັງໄດ້ ເພື່ອເປີດເສັ້ນທາງໃໝ່ທີ່ໃຫ້ສອງປະເທດໃຫຍ່ຢູ່ຮ່ວມກັນຢ່າງຖືກຕ້ອງ. ຈີນ ແລະອາເມຣິກາ ຄວນແລະມີຄວາມສາມາດໄດ້ຮັບຜົນປະໂຫຍດຮ່ວມກັນໃນການຮ່ວມມືຕົວຈິງແລະຕ່າງຊ່ວຍຊູຍູ້ໜູນກັນໃນການແຂ່ງຂັນໄປໃນແງ່ດີແລະກໍາຈັດຄວາມຂັດແຍ້ງໂດຍສະຫວງນຫາຄຳເຫັນທີ່ຄືກັນ ແລະສະຫງວນສິ່ງທີ່ຕ່າງກັນ, ທັງສ້າງສັນຕິພາບໃນທ່າມກາງຄວາມໄວ້ເນື້ອເຊື່ອໃຈຊຶ່ງກັນ ແລະ ກັນ ເພື່ອເຮັດໃຫ້ການພົວພັນທີ່ໝັ້ນທ່ຽງທາງຍຸດທະສາດທີ່ສ້າງສັນລະຫວ່າງຈີນ-ອາເມຣິກາ ນຳເອົາຜົນປະໂຫຍດມາໃຫ້ປະຊາຊົນສອງປະເທດ ກໍຄືປະຊາຊົນໃນປະເທດຕ່າງໆທົ່ວໂລກໃຫ້ດີກວ່າເກົ່າ.

ທ່ານ ສີຈິ້ນຜິງ ເນັ້ນໜັກວ່າ: ທີມງານການຄ້າຂອງສອງຝ່າຍໄດ້ຈັດການເຈລະຈາຮອບໃໝ່ ໂດຍໄດ້ບັນລຸຄວາມເປັນເອກະພາບສະບັບໃໝ່. ນີ້ເປັນຂ່າວດີໃຫ້ແກ່ວົງການອຸດສາຫະກຳການຄ້າ, ປະຊາຊົນຂອງສອງປະເທດ ກໍຄືເສດຖະກິດໂລກ. ການຮ່ວມມືເປັນເສັ້ນທາງທີ່ຕ້ອງເປັນໄປ ຊຶ່ງຄວາມໝັ້ນທ່ຽງຂອງການພົວພັນທາງດ້ານເສດຖະກິດການຄ້າລະຫວ່າງຈີນ-ອາເມຣິກາຕ້ອງເປີດກວ້າງຂົງເຂດການຮ່ວມມື, ແຕ່ກໍຕ້ອງຫຼຸດຄວາມຂັດແຍ້ງ ໃຫ້ໜ້ອຍລົງເຊັ່ນດຽວກັນ. ພຽງແຕ່ຢຶດຖືຄວາມສະເໝີພາບ, ເຄົາລົບຊຶ່ງກັນ ແລະກັນແລະຕ່າງຝ່າຍຕ່າງໄດ້ຮັບຜົນປະໂຫຍດ, ກໍສາມາດຊອກເຫັນທາງອອກ ແລະ ສາມາດແກ້ໄຂບັນຫາໄດ້. ຫວັງວ່າທັງສອງຝ່າຍຈະສາມາດເດີນໄປຕາມທິດດຽວກັນ, ຢຶດໝັ້ນເດີນສູ່ການໄດ້ຮັບຜົນປະໂຫຍດຮ່ວມກັນ ເພື່ອຊຸກຍູ້ໃຫ້ການພົວພັນທາງດ້ານເສດຖະກິດການຄ້າລະຫວ່າງຈີນ-ອາເມຣິກາຂະຫຍາຍຕົວໄປດ້ວຍດີ ແລະ ໜັກແໜ້ນ.

ທ່ານ ສີຈິ້ນຜິງ ຊີ້ອອກວ່າ: ຈີນ ແລະອາເມຣິກາ ແມ່ນປະເທດໃຫຍ່ດ້ານປັນຍະປະດິດ, ສອງຝ່າຍມີການແຂ່ງຂັນກັນ, ສະນັ້ນ ຍິ່ງຄວນຮ່ວມມືກັນ, ຄວນເສີມຂະຫຍາຍທ່າແຮງຂອງໃຜລາວ, ຫາກບໍ່ແມ່ນການສ້າງກຳແພງກັ້ນຂຶ້ນມາ. ສອງຝ່າຍຄວນດຳເນີນການສົນທະນາກັນກ່ຽວກັບປັນຍາປະດິດ ແລະແລກປ່ຽນກັນກ່ຽວກັບຄວາມສ່ຽງ ແລະຜົນປະໂດຍຂອງປັນຍາປະດິດ, ຮ່ວມກັນປ້ອງກັນບໍ່ໃຫ້ປັນຍາປະດິດຖືກນຳໃຊ້ໄປໃນທາງທີ່ບໍ່ດີ. ຕ້ອງຮັກສາການຄວບຄຸມປັນຍາປະດິດດ້ວຍມະນຸດ, ຢຶດຖືຫຼັກການຖືເອົາຄົນເປັນກົກ ເພື່ອນຳໃຊ້ປັນຍາປະດິດໄປໃນທາງທີ່ດີ ແລະ ໃຫ້ປັນຍາປະດິດຮັບໃຊ້ຄວາມກ້າວໜ້າຂອງມະນຸດ.

ທ່ານ ສີຈິ້ນຜິງ ເນັ້ນໜັກຕື່ມວ່າ: ຈີນມີຫຼກໝັ້ນທີ່ຈະແຈ້ງທີ່ສຸດໃນການປົກປັກຮັກສາຄວາມເປັນເອກະພາບແຫ່ງຊາດ ແລະຜືນແຜ່ນດິນອັນຄົບຖ້ວນ. ຫວັງວ່າ ອາເມຣິກາ ຈະຢຶດໝັ້ນຫຼັກໝັ້ນທີ່ຖືກຕ້ອງໃນການແກ້ໄຂບັນຫາໄຕ້ຫວັນຢ່າງລະມັດລະວັງ, ສ້າງພື້ນຖານອັນໜັກແໜ້ນໃຫ້ແກ່ການຮ່ວມມືດ້ານຍຸດທະສາດ ແລະ ຂະຫຍາຍການພົວພັນລະຫວ່າງສອງປະເທດຈີນ-ອາເມຣິກາ.

ທ່ານ ໂດໂນ ທຣຳກ່າວວ່າ: ການເດີນທາງຢ້ຽມຢາມອາເມຣິກາຂອງ ທ່ານປະທານ ສີຈິ້ນຜິງ ໃນຄັ້ງນີ້ ຖືເປັນການຢ້ຽມຢາມທີ່ຍິ່ງໃຫຍ່ຄັ້ງໜຶ່ງ. ອາເມລິກາ ແລະຈີນ ລ້ວນແຕ່ແມ່ນປະເທດໃຫຍ່, ຂ້າພະເຈົ້າກັບທ່ານປະທານສີຈິ້ນຜິງແມ່ນເພື່ອນທີ່ດີ, ໄດ້ຮັກສາການຕິດຕໍ່ພົວພັນ ແລະແລກປ່ຽນກັນຢ່າງເລິກເຊິ່ງ. ການພົວພັນອາເມຣິກາ-ຈີນ ຍ່ອມຈະດີຂຶ້ນພາຍໃຕ້ການນຳພາຂອງພວກເຮົາ. ທີມງານເສດຖະກິດການຄ້າຂອງສອງປະເທດໄດ້ເຈລະຈາກັນຮອບໃໝ່ ແລະໄດ້ຮັບໝາກຜົນໃໝ່. ສອງຝ່າຍຈະສືບຕໍ່ເຈລະຈາກັນ ເພື່ອບັນລຸສັນຍາທີ່ດີກວ່າເກົ່າ. ປັນຍາປະດິດພົວພັນເຖິງອະນາຄົດຂອງມວນມະນຸດ, ອາເມຣິກາ ແລະຈີນຄວນຮັກສາການສົນທະນາກັນ ເພື່ອເພີ່ມທະວີການຮ່ວມມືກັນ.

ປະມຸກລັດສອງປະເທດຈີນ-ອາເມຣິກາ ຍັງໄດ້ແລກປ່ຽນຄຳເຫັນກັນກ່ຽວກັບສະຖານະການໃນຕາເວັນອອກກາງ,ວິກິດການອູແກຣນ, ບັນຫາແຫຼມເກົາຫຼີ ກໍຄືບັນຫາສາກົນ ແລະທ້ອງຖີ່ນທີ່ສຳຄັນອື່ນໆ.

ນອກນີ້, ປະມຸກລັດສອງປະເທດຍັງໄດ້ຕົກລົງກັນວ່າ ຈະຕ່າງຊ່ວຍເຫຼືອຊຶ່ງກັນແລະກັນ ເພື່ອຈັດກອງປະຊຸມບໍ່ເປັນທາງການຂອງຜູ້ນຳອົງການເອເປັກປີ 2026 ແລະກອງປະຊຸມສຸດຍອດຜູ້ນຳ G20 ໃຫ້ດີ.