 |
ໃນໂອກາດດັ່ງກ່າວ, ທ່ານເອກອັກຄະລັດຖະທູດໄດ້ສະແດງຄວາມຮູ້ສຶກເປັນກຽດຢ່າງສູງທີ່ໄດ້ຍື່ນສານຕາຕັ້ງຕໍ່ທ່ານປະທານາທິບໍດີ ໃນຄັ້ງນີ້ ແລະ ໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດ ຈາກທ່ານທອງລຸນ ສີສຸລິດ ປະທານປະເທດແຫ່ງ ສປປ ລາວ ເຖິງທ່ານນາງ ກາຣິນ ແຄເລີ ຊຸດເຕີ ພ້ອມທັງສົ່ງຄໍາອວຍພອນມາຍັງລັດຖະບານ ແລະ ປະຊາຊົນສະວິດ. ພ້ອມກັນນັ້ນ, ທ່ານ ດາວວີ ວົງໄຊ ຍັງໄດ້ຕີລາຄາສູງຕໍ່ຜົນສຳເລັດ ແລະ ຄວາມຄືບໜ້າໃນການພົວພັນຮ່ວມມືສອງຝ່າຍລາວ-ສະວິດ ໃນໄລຍະຜ່ານມາ ແລະ ໄດ້ສະແດງຄວາມຂອບໃຈຢ່າງຈິງໃຈຕໍ່ລັດຖະບານ ແລະ ປະຊາຊົນສະວິດ ທີ່ໄດ້ສະໜັບສະໜູນຊ່ວຍເຫຼືອ ສປປ ລາວ ໃນການພັດທະນາເສດຖະກິດ-ສັງຄົມ ໃນໄລຍະຜ່ານມາຈົນເຖິງປັດຈຸບັນ ກໍຄືຄວາມພະຍາຍາມໃນການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ໂດຍສະເພາະໃນຂົງເຂດການສຶກສາ ລວມທັງການຝຶກອົບຮົມວິຊາຊີບ ແລະ ທັກສະ, ສາທາລະນະສຸກ, ພະລັງງານ ແລະ ອື່ນໆ. ນອກຈາກນັ້ນ, ທ່ານເອກອັກຄະລັດຖະທູດກໍໄດ້ສະແດງຄວາມໝາຍໝັ້ນທີ່ຈະສືບຕໍ່ຮັດແໜ້ນການພົວພັນຮ່ວມມືສອງຝ່າຍລະຫວ່າງສອງປະເທດ ໃນໄລຍະທີ່ດຳລົງຕໍາແໜ່ງເປັນເອກອັກຄະລັດຖະທູດ.
ໃນໂອກາດດຽວກັນນີ້, ທ່ານປະທານາທິບໍດີໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍທ່ານ ດາວວີ ວົງໄຊ ທີ່ໄດ້ຮັບການແຕ່ງຕັ້ງໃຫ້ດຳລົງຕໍາແໜ່ງເປັນ ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສປປ ລາວ ຄົນໃໝ່ ປະຈຳສະມາພັນທະລັດສະວິດ ພ້ອມທັງໄດ້ສະແດງຄວາມສົນໃຈຕໍ່ຜົນສຳເລັດຂອງການຮ່ວມມືໃນໄລຍະຜ່ານມາ ແລະ ຂົງເຂດບຸລິມະສິດໃນການພັດທະນາຂອງ ສປປ ລາວ ໂດຍສະເພາະການສຶກສາ ແລະ ການຝຶກອົບຮົມວິຊາຊີບໃຫ້ແກ່ໄວໜຸ່ມ. ໃນຕອນທ້າຍ, ທ່ານປະທານາທິບໍດີໄດ້ອວຍພອນໃຫ້ທ່ານເອກອັກຄະລັດຖະທູດ ຈົ່ງປະສົບຜົນສໍາເລັດໃນການປະຕິບັດໜ້າທີ່ການທູດໃນຄັ້ງນີ້.
ສະມາພັນທະລັດສະວິດ ໄດ້ໃຫ້ການຊ່ວຍເຫຼືອໃນຂອບສອງຝ່າຍ ແລະ ຫຼາຍຝ່າຍ ແກ່ ສປປ ລາວ ນັບແຕ່ປີ 2006-2021 ລວມມູນຄ່າທັງໝົດ ປະມານ 242 ລ້ານໂດລາ. ປັດຈຸບັນ, ຍັງໄດ້ໃຫ້ການຊ່ວຍເຫຼືອແກ່ ສປປ ລາວ ສໍາລັບສົກປີ 2022-2025 ມູນຄ່າປະມານ 65 ລ້ານໂດລາ ໂດຍສຸມໃສ່ 3 ຂົງເຂດຄື: 1) ຂົງເຂດພັດທະນາເສດຖະກິດແບບມີສ່ວນຮ່ວມ, 2) ຂົງເຂດການປ່ຽນແປງດິນຟ້າອາກາດ ແລະ ການຄຸ້ມຄອງຊັບພະຍາກອນທໍາມະຊາດ, 3) ຂົງເຂດການປົກຄອງ ແລະ ການມີສ່ວນຮ່ວມຂອງປະຊາຊົນ ຊຶ່ງມີເປົ້າໝາຍແນໃສ່ເພື່ອຫຼຸດຜ່ອນຄວາມທຸກຍາກ, ສະໜັບສະໜູນການພັດທະນາແບບຍືນຍົງ ແລະ ສົ່ງເສີມການຄຸ້ມຄອງພາກລັດໃນ ສປປ ລາວ. ສະມາພັນທະລັດສະວິດ ແລະ ສປປ ລາວ ໄດ້ສ້າງຕັ້ງສາຍພົວພັນການທູດຮ່ວມກັນ ໃນວັນທີ 4 ກັນຍາ 1963 ເປັນຕົ້ນມາ.
(ຂ່າວ-ພາບ: ກະຊວງການຕ່າງປະເທດ)
ຄໍາເຫັນ