ທ່າພະບາດສືບຕໍ່ກໍ່ສ້າງຮາກຖານການເມືອງ

ໃນປີ 2023 ນີ້,ເມືອງທ່າພະບາດ ແຂວງບໍລິຄໍາໄຊ ໄດ້ສືບຕໍ່ລົງສ້າງຮາກຖານການເມືອງ ພັດທະນາຊົນນະບົດ ແລະ ລຶບລ້າງຄວາມທຸກຍາກ ໂດຍຫັນເອົາພະນັກງານລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ຕາມ 4 ເນື້ອໃນ 4 ຄາດໝາຍ ຈໍານວນ 39 ສະຫາຍ, ຍິງ 11 ສະຫາຍ, ໃນນັ້ນ ພະນັກງານຫຼັກແຫຼ່ງຂອງແຂວງ 4 ສະຫາຍ, ຍິງ 1 ສະຫາຍ ແລະ ໄດ້ແບ່ງອອກເປັນ 6 ຈຸ ໂດຍໄດ້ກໍານົດ 6 ໜ້າວຽກໃຫຍ່ ແລະ 26 ວຽກຈຸດສຸມ;ປັບປຸງກົງຈັກການຈັດຕັ້ງຂັ້ນບ້ານທີ່ຮອດວາລະເປີດກອງປະຊຸມໃຫຍ່ໄດ້ 11 ບ້ານ ມາຮອດປັດຈຸບັນ,ປັບປຸງສໍາເລັດແລ້ວ 24 ບ້ານ, ໃນນັ້ນ ໄດ້ບໍາລຸງສິດພາລະບົດບາດ 5 ໜ່ວຍງານໃນຈໍານວນ 12 ບ້ານ; ສົມທົບກັບຄະນະກຳມະການທີ່ກ່ຽວຂ້ອງຂັ້ນແຂວງ ແລະ ເມືອງ ລົງກວດກາປະເມີນຄືນກ່ຽວກັບ 16 ມາດຖານເງື່ອນໄຂ ທີ່ສາມາດສ້າງບ້ານໃຫຍ່ໃຫ້ກາຍເປັນສີສັນຕົວເມືອງນ້ອຍໃນຊົນນະບົດ ໂດຍກໍານົດເອົາບ້ານປາກທວາຍເປັນບ້ານເປົ້າໝາຍ ຊຶ່ງຜ່ານການປະເມີນເຫັນວ່າ ສາມາດບັນລຸ 15 ມາດຕະຖານ ແລະ ບໍ່ບັນລຸ 1 ມາດຕະຖານ; ສ້າງເມືອງເປັນຫົວໜ່ວຍເຂັ້ມແຂງຮອບດ້ານຕາມ 5 ດ້ານ ບັນລຸ 3 ດ້ານ; ສ້າງບ້ານເປັນຫົວໜ່ວຍພັດທະນາຕາມ 4 ດ້ານ ບັນລຸໄດ້ 23 ບ້ານ ເທົ່າກັບ 88,46%;  ປະເມີນຄອບຄົວພັດທະນາໄດ້ 30 ຄອບຄົວ ປັດຈຸບັດທົ່ວເມືອງມີຄອບຄົວພັດທະນາ  5.382 ຄອບຄົວ ກວມເອົາ 99,81.%.
ໃນປີ 2024 ທີ່ຈະມາເຖິງນີ້,ເມືອງທ່າພະບາດຈະສືບຕໍ່ລົງກໍ່ສ້າງຮາກຖານການເມືອງຕາມ 4 ເນື້ອໃນ 4  ຄາດໝາຍ,  ສືບຕໍ່ເປີດກອງປະຊຸມໃຫຍ່ບ້ານ ທີ່ຍັງເຫຼືອ 2 ບ້ານໃຫ້ສໍາເລັດ, ຊຸກຍູ້ການສ້າງບ້ານໃຫຍ່ເປັນສີສັນຕົວເມືອງນ້ອຍຢູ່ ບ້ານປາກທວາຍ ໃຫ້ບັນລຸມາດຖານ, ສຸມໃສ່ແກ້ໄຂຄວາມທຸກຍາກຂອງປະຊາຊົນທີ່ຍັງເຫຼືອ ຈໍານວນ 2 ຄອບຄົວ ໃຫ້ສໍາເລັດ, ສ້າງຄອບຄົວພັດທະນາໃຫ້ໄດ້ເພີ່ມຂຶ້ນ 10 ຄອບຄົວ. (ໂດຍ: ຕະວິນຍານ)