ທາບທາມບຸກຄະລາກອນ ສະໝັກເລືອກຕັ້ງຄະນະບໍລິຫານງານພັກແຂວງອັດຕະປື

ໃນກອງປະຊຸມ, ສະຫາຍ ສອນໄຊ ສີພັນດອນ ໄດ້ມີຄໍາເຫັນວ່າ: ບັ້ນດຳເນີນຊີວິດການເມືອງທາບທາມ 2 ຮອບຜ່ານມາ ໄດ້ສ່ອງແສງໃຫ້ເຫັນຄວາມເປັນຫ່ວງເປັນໃຍຂອງສັງຄົມ ທີ່ມີຕໍ່ພະນັກງານນຳພາຂອງພວກເຮົາ ເປັນຕົ້ນແບບແຜນວິທີເຮັດວຽກ, ຄວາມຊື່ສັດໂປ່ງໃສ, ຄວາມທ່ຽງທຳ, ການຟຸ່ມເຟືອຍ, ການແກ້ໄຂປະກົດການຫຍໍ້ທໍ້ ແລະ ອື່ນໆ. ທັງໝົດເຫຼົ່ານັ້ນ ຖ້າພວກເຮົາບໍ່ພ້ອມກັນຕັດສິນໃຈ, ຄົ້ນຄວ້າຊອກຫຼາຍວິທີການແກ້ໄຂຢ່າງເຂັ້ມງວດ, ເດັດຂາດນຳກັນ ກໍຈະແກ້ໄຂໄດ້ຍາກ ໂດຍສະເພາະບັນຫາທີ່ຕ້ອງເອົາໃຈໃສ່ໃນການເລືອກເຟັ້ນຜູ້ຮັບສະໝັກເລືອກຕັ້ງເຂົ້າໃນຄະນະບໍລິຫານງານພັກ ແຕ່ລະຂັ້ນຕ້ອງຮັບປະກັນ, ຖືກຕ້ອງຕາມມາດຕະຖານ, ເງື່ອນໄຂທີ່ກຳນົດໄວ້ໃນກົດລະບຽບຂອງພັກ, ນິຕິກຳຂອງພັກ, ເອົາໃຈໃສ່ດ້ານໂຄງປະກອບຮັບປະກັນທັງ 3 ຮຸ່ນ (ອາວຸໂສ, ກາງ, ໜຸ່ມ) ເພດ, ເຜົ່າ. ພ້ອມ ນີ້, ທ່ານຍັງໄດ້ຮຽກຮ້ອງໃຫ້ບັນດາສະຫາຍຜູ້ແທນສົມບູນຈົ່ງໄດ້ຄົ້ນຄ້ວາ, ຄິດຫງຳຢ່າງຮອບຄອບເລິກເຊິ່ງ ເພື່ອເລືອກເອົາຄະນະບໍລິຫານງານພັກແຂວງຄັ້ງທີ XII ໃຫ້ໄດ້ຕາມມາດຖານ, ເງື່ອນໄຂທີ່ລະບຸໄວ້ໃນກົດລະບຽບຂອງພັກປະຊາຊົນ ປະຕິວັດລາວ ສະໄໝທີ XI ແລະ ມະຕິຂອງກົມການເມືອງສູນກາງພັກ, ເງື່ອນໄຂທີ່ລະບຸໃນຄຳສັ່ງ ເລກທີ 411 ຂອງຄະນະເລຂາທິການສູນກາງພັກ, ຄຳແນະນຳເລກທີ 211 ຂອງຄະນະຈັດຕັ້ງສູນກາງພັກ.

ໂອກາດດຽວກັນ, ສະຫາຍ ດາວບົວລະພາ ບາວົງເພັດ ຮອງປະທານຄະນະກວດກາສູນກາງພັກ ກໍໄດ້ຂຶ້ນຜ່ານ ເນື້ອໃນມາດຖານ, ເງື່ອນໄຂຂອງຜູ້ທີ່ຈະລົງສະໝັກທາບທາມ ຮອບທີ III ຄັ້ງນີ້ ຊຶ່ງມີຜູ້ສະໝັກທັງໝົດ 47 ສະຫາຍ ຍິງ 7 ສະຫາຍ. ພ້ອມນີ້, ຜູ້ແທນສົມບູນ ກໍໄດ້ພ້ອມກັນໃຊ້ສິດປະຊາທິປະໄຕ ປ່ອນບັດທາບທາມເອົາບຸກຄະລາກອນປະກອບເຂົ້າໃນໂຄງປະກອບຄະນະບໍລິຫານງານພັກແຂວງ ສະໄໝທີ XII ຢ່າງເປັນທາງການ.

ແຫຼ່ງຂ່າວ: ຂປລ