ທຫລ ຈັດຫຼາຍກິດຈະກຳຕ້ອນຮັບວັນສ້າງຕັ້ງ ຄົບຮອບ 55 ປີ

ໂດຍ: ວັນເພັງ
ອີກບໍ່ພໍເທົ່າໃດວັນຂ້າງໜ້າ ກໍຈະຮອດວັນສ້າງຕັ້ງທະນາຄານແຫ່ງສປປ ລາວ (ທຫລ) ຄົບຮອບ 55 ປີ (7 ຕຸລາ 1968-7 ຕຸລາ 2023) ຊຶ່ງເປັນປີທີ່ມີຄວາມໝາຍ-ຄວາມສໍາຄັນ ເປັນປີທີ່ມີການເຕີບໃຫຍ່ຂະຫຍາຍຕົວ ເຂັ້ມແຂງຂຶ້ນໄປເລື້ອຍໆ ຊຶ່ງຂະແໜງການທະນາຄານໃນຂອບເຂດທົ່ວປະເທດໄດ້ພ້ອມກັນສ້າງຂະບວນການຕ່າງໆ ເພື່ອຂໍ່ານັບຮັບຕ້ອນສະເຫຼີມສະຫຼອງວັນສຳຄັນດັ່ງກ່າວຢ່າງມີຄວາມໝາຍເລິກເຊິ່ງ, ກວ້າງຂວາງ ແລະ ມີບັນຍາກາດເບີກບານມ່ວນຊື່ນຟົດຟື້ນເປັນຢ່າງດີ.
ທ່ານ ບຸນທະວີ ສຸກດາວົງ ເລຂາຄະນະບໍລິຫານງານຊາວໜຸ່ມ ທຫລ ໄດ້ໃຫ້ສໍາພາດຕໍ່ນັກຂ່າວໜັງສືພິມ ປະຊາຊົນ ໃນໂອກາດເຂົ້າຮ່ວມພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງ ທຫລ ຄົບຮອບ 55 ປີ ເມື່ອບໍ່ດົນມານີ້ວ່າ:ເນື່ອງໃນໂອກາດວັນສ້າງຕັ້ງ ທຫລ ຄົບຮອບ 55 ປີທີ່ໃກ້ຈະໜູນວຽນມາອີກວາລະໜຶ່ງໃນປີ 2023 ນີ້,ໃນນາມສ່ວນຕົວມີຄວາມຮູ້ສຶກດີໃຈພາກພູມໃຈເປັນຢ່າງຍິ່ງ.ສໍາລັບຊາວໜຸ່ມ ທຫລ ກໍຄືຊາວໜຸ່ມຂະແໜງການທະນາຄານກໍຄືໃນໄລຍະຜ່າມມາເຖິງປັດຈຸບັນໄດ້ປະກອບສ່ວນໃນການສ້າງສາພັດທະນາຂະແໜງການທະນາຄານໄດ້ຮັບຜົນສຳເລັດໃນຫຼາຍໆດ້ານເປັນກ້າວໆມາ.ໂດຍສະເພາະຊາວໜຸ່ມໄດ້ປະກອບສ່ວນເຂົ້າໃນຂະບວນການດ້ານວິຊາສະເພາະ, ຂະບວນການຊ່ວຍເຫຼືອສັງຄົມ ແລະ ຂະບວນການດ້ານອື່ນໆຊຶ່ງເປັນຂະບວນການປິ່ນອ້ອມ, ຖືໄດ້ວ່າຊາວໜຸ່ມໄດ້ຄຽງບ່າຄຽງໄຫຼ່ກັບການນຳ ທຫລ. ສຳລັບກິດຈະກຳເພື່ອສ້າງຂະບວນການຂໍ່ານັບຮັບຕ້ອນວັນສ້າງຕັ້ງ ທຫລ ຄົບຮອບ 55 ປີນີ້, ຄະນະບໍລິຫານງານຊາວໜຸ່ມ ທຫລ ຮ່ວມກັບ 3 ອົງການຈັດຕັ້ງມະຫາຊົນຂອງ ທຫລ ໄດ້ຈັດໃຫ້ມີຫຼາຍກິດຈະກໍາເປັນຕົ້ນຂະບວນການດ້ານວິຊາສະເພາະ, ຂະບວນການກິລາແລ່ນ-ຍ່າງເພື່ອຮັດແໜ້ນຄວາມສາມັກຄີພາຍໃນ, ເພື່ອສຸຂະພາບ, ຂະບວນການຊ່ວຍເຫຼືອສັງຄົມ, ບໍລິຈາກເລືອດ, ສ້າງຂະບວນການອອກແຮງງານແລະ ຂະບວນການອື່ນໆ.
ໃນໂອກາດວັນສ້າງຕັ້ງ ທຫລ ຄົບຮອບ 55 ປີທີ່ຈະມາເຖິງນີ້ ຂໍອວຍພອນໃຫ້ຊາວໜຸ່ມ ທຫລກໍຄືສະມາຊິກຊາວໜຸ່ມໃນທົ່ວຂະແໜງການທະນາຄານຈົ່ງເພີ່ມທະວີປຸມລຸມຄວາມສາມັກຄີ ເຂົ້າຮ່ວມໃນຂະບວນການຕ່າງໆທີ່ການຈັດຕັ້ງວາງອອກ, ອວຍພອນໃຊ້ໃຫ້ການນຳພັກ-ລັດ, ພະນັກງານອາວຸໂສບຳນານ, ພະນັກງານທົ່ວຂະແໜງການທະນາຄານ ຈົ່ງມີສຸຂະພາບພາລານາໄມແຂງແຮງ, ພັດທະນາວຽກງານທະນາຄານໃຫ້ມີຄວາມກ້າວໄກຂຶ້ນໄປເລື້ອຍໆ, ເຊື່ອໝັ້ນວ່າພາຍໃຕ້ການນຳພາຂອງຄະນະພັກ-ຄະນະນຳຂອງ ທຫລຈະເຮັດໃຫ້ຂະແໜງການທະນາຄານໄດ້ຮັບການພັດທະນາກ້າວຂຶ້ນຢ່າງບໍ່ຢຸດຢັ້ງ.
ຊົມເຊີຍວັນສ້າງຕັ້ງ ທຫລ ຄົບຮອບ 55 ປີ ຢ່າງສຸດໃຈ!