ທຫລ ແລະ ມຊ ຮ່ວມມືດ້ານວິຊາການ ສ້າງຄວາມເຂັ້ມແຂງໃຫ້ບຸກຄະລາກອນ

ພິທີເຊັນບົດບັນທຶກຄວາມເຂົ້າໃຈ ລະຫວ່າງ ກົມນະໂຍບາຍເງິນຕາ ທະນາຄານແຫ່ງ ສປປ ລາວ (ທຫລ) ແລະ ຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດ (ມຊ) ວ່າດ້ວຍການຮ່ວມມືທາງດ້ານວິຊາການ ແລະ ສ້າງຄວາມເຂັ້ມແຂງໃຫ້ແກ່ບຸກຄະລາກອນ ຂຶ້ນໃນວັນທີ 5 ຕຸລາ ນີ້ ທີ່ ທຫລ  ໂດຍມີຈຸດປະສົງເພື່ອການແລກປ່ຽນຂໍ້ມູນຂ່າວສານຊຶ່ງກັນ ແລະ ກັນ; ສ້າງບົດຄົ້ນຄວ້າຮ່ວມກັນ ແລະ ສ້າງຄວາມເຂັ້ມແຂງດ້ານບຸກຄະລາກອນ ເພື່ອເພີ່ມທະວີຄວາມຮູ້-ຄວາມສາມາດໃຫ້ແກ່ບຸກຄະລາກອນ ຂອງທັງສອງຝ່າຍ.           ການລົງນາມໃນບົດບັນທຶກໃນຄັ້ງນີ້ ລະຫວ່າງ ທ່ານ ສຸລິສັກ ທຳນຸວົງ ຫົວໜ້າກົມນະໂຍບາຍເງິນຕາ ທຫລ ແລະ ທ່ານ ພູເພັດ ກ້ຽວພິລາວົງ ຄະນະບໍດີຄະນະເສດຖະສາດ ແລະ ບໍລິຫານທຸລະກິດ ມຊ, ໃຫ້ກຽດເຂົ້າຮ່ວມຂອງທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ, ມີພາກສ່ວນທີ່ກ່ຽວຂ້ອງເຂົ້າຮ່ວມ. ໃນການຮ່ວມມືຄັ້ງນີ້ ຖືເປັນໂອກາດດີ ສະເຫຼີມສະຫຼອງ ວັນສ້າງຕັ້ງ ທຫລ ຄົບຮອບ 55 ປີ ແລະ ເປັນການຮ່ວມມືກັນຄັ້ງທຳອິດຂອງ ທັງສອງຝ່າຍ ເພື່ອເພີ່ມພູນສ້າງການຮ່ວມມືທາງດ້ານວິຊາການ ແລະ ການສ້າງຄວາມເຂັ້ມແຂງໃຫ້ແກ່ການພັດທະນາຊັບພະຍາກອນມະນຸດ ເວົ້າລວມ, ເວົ້າສະເພາະແມ່ນພະນັກງານຂະແໜງການທະນາຄານ ໃຫ້ມີທັກສະວິຊາການໃນການຄົ້ນຄວ້າ, ວິໄຈໃຫ້ເປັນວິທະຍາສາດຫຼາຍຂຶ້ນກວ່າເກົ່າ. ໃນສະພາບເສດຖະກິດ-ການເງິນ ໃນປັດຈຸບັນທີ່ຮຽກຮ້ອງໃຫ້ມີການຄົ້ນຄວ້າ, ວິໄຈຢ່າງມີວິທະຍາສາດ ເພື່ອແກ້ໄຂບັນຫາເສດຖະກິດຢ່າງພາວະວິໄສ ແລະ ທັນກັບສະພາບການ.
ຂ່າວ: ຕຸໄລເພັດ