ທຫລ ພາກໃຕ້ແຂວງຈຳປາສັກ ສືບຕໍ່ຄຸ້ມຄອງມະຫາພາກດ້ານເງິນຕາ

ສະຫາຍ ໄຊລືຊາ ຜູຍຍະວົງ ໄດ້ຢັ້ງຢືນວ່າ: ຕະຫຼອດ 6 ເດືອນຕົ້ນປີ 2025; ທຫລ.ພຕ ໄດ້ສຸມໃສ່ນຳພາ-ຊີ້ນຳວຽກງານການເມືອງ-ແນວຄິດ, ນຳພາສະມາຊິກພັກ, ພະນັກງານຈັດຕັ້ງປະຕິບັດວຽກງານວິຊາສະເພາະປະກອບສ່ວນເຂົ້າໃນແກ້ໄຂບັນຫາຄວາມຫຍຸ້ງຍາກທາງດ້ານການເງິນ-ເງິນຕາ, ບັນຫາອັດຕາເງິນເຟີ້, ການຄຸ້ມຄອງເງິນຕາຕ່າງປະເທດ ແລະ ການສະໜອງແຫຼ່ງທຶນນະໂຍບາຍສິນເຊື່່ອ ເພື່ອກະຈາຍແຫຼ່ງທຶນສູ່ທ້ອງຖິ່ນ ຕິດພັນກັບການຈັດຕັ້ງຜັນຂະຫຍາຍວາລະແຫ່ງຊາດ, ວາລະຂອງແຂວງ ແລະ ມະຕິ 04 ຂອງກົມການເມືອງສູນກາງພັກ ກ່ຽວກັບການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່.

ໃນ 6 ເດືອນຕົ້ນປີ 2025 ທຫລ.ພຕ ສາມາດຍາດໄດ້ຜົນສຳເລັດຫຼາຍດ້ານ ເປັນຕົ້ນ ໄດ້ຈັດກອງປະຊຸມ ສະຫຼຸບຜົນການຈັດຕັ້ງປະຕິບັດວຽກງານຄຸ້ມຄອງເງິນຕາຕ່າງປະເທດ ປະຈໍາປີ 2024; ເຜີຍແຜ່ນິຕິກໍາ ທີ່ນໍາໃຊ້ໃນວຽກງານຄຸ້ມຄອງເງິນຕາຕ່າງປະເທດ; ຍົກສູງບົດບາດດ້ານການຄຸ້ມຄອງຂອງ ທຫລ.ພຕ ດ້ວຍການນໍາໃຊ້ ແລະ ປະຕິບັດນິຕິກໍາ ທີ່ຕິດພັນກັບການຄຸ້ມຄອງເງິນຕາຕ່າງປະເທດ ແລະ ການແລກປ່ຽນເງິນຕາທີ່ ທຫລ ວາງອອກ; ສ້າງຈິດສໍານຶກ ແລະ ຄ່ານິຍົມໃນການນໍາໃຊ້ເງິນ ຕາຕ່າງປະເທດໃນສັງຄົມ ໂດຍການຈັດຕັ້ງປະຕິບັດວຽກງານຄຸ້ມຄອງເງິນຕາ ໃຫ້ເປັນລະບົບຄົບຊຸດ, ທັນສະໄໝ ແລະ ສະກັດກັ້ນການແລກປ່ຽນ ທີ່ບໍ່ຖືກຕ້ອງ, ພ້ອມທັງຕອບສະໜອງຄວາມຕ້ອງການເງິນຕາຕ່າງປະເທດໃນສັງຄົມ ເພື່ອເຮັດໃຫ້ວຽກງານຄຸ້ມຄອງເງິນຕາ ໄດ້ຮັບການຈັດຕັ້ງປະຕິບັດມີຜົນສັກສິດຢ່າງແທ້ຈິງ.

ໃນການລະດົມເງິນຝາກຂອງທະນາຄານທຸລະກິດ (ທທກ) ແລະ ສະຖາບັນການເງິນຈຸລະພາກ 4 ແຂວງພາກໃຕ້ ມາຮອດເດືອນ 6/ 2025 ຍອດສະສົມທັງໝົດປະຕິບັດໄດ້ 20,257.55 ຕື້ກີບ ເທົ່າກັບ 81.84% ເພີ່ມຂຶ້ນ 18.52% ທຽບໃສ່ໄລຍະດຽວກັນຂອງປີຜ່ານມາ. ສະເພາະການສະໜອງສິນເຊື່ອ ມີຍອດສະສົມທັງໝົດ ປະຕິບັດໄດ້ 9,353.18 ຕື້ກີບ ເພີ່ມຂຶ້ນ 7.24% ທຽບໃສ່ໄລຍະດຽວກັນຂອງປີຜ່ານມາ. ຂະນະດຽວກັນ ຍັງຕິດຕາມກວດກາທະນາຄານນະໂຍບາຍ ທີ່ຢູ່ໃນແຂວງຂອງຕົນຮັບຜິດຊອບ ເປັນຕົ້ນການເກັບກໍາຂໍ້ມູນຖານະການເງິນ ເພື່ອລາຍງານໃຫ້ອໍານາດການປົກຄອງທ້ອງຖິ່ນ ແລະ ຊຸກຍູ້ການປະຕິບັດພາລະບົດບາດ ໃນການປະກອບສ່ວນແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ ໃນເຂດເມືອງທຸກຍາກ, ຈຸດສຸມ, ບ້ານ 3 ສ້າງ ແລະ ຊ່ວຍຕິດຕາມການແກ້ໄຂໜີ້ສິນ ຮ່ວມກັບຄະນະກໍາມະການຂັ້ນແຂວງ ແລະ ເມືອງ. ພ້ອມດຽວກັນນັ້ນ; ທຫລ.ພຕ ຍັງເປັນເຈົ້າການປະສານສົມທົບກັບອໍານາດການປົກຄອງທ້ອງຖິ່ນ ແລະ ທທກ ເພື່ອສືບຕໍ່ຜັນຂະຫຍາຍຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນ (ສິນເຊື່ອ 765) ໃຫ້ບັນລຸຕາມຈຸດປະສົງ ແລະ ລະດັບຄາດໝາຍທີ່ກໍານົດໄວ້.

ຮອດປະຈຸບັນ, ໄດ້ອະນຸມັດສິນເຊື່ອໄດ້ທັງໝົດ 188 ຫົວໜ່ວຍ ລວມວົງເງິນ 321.76 ຕື້ກີບ ກວມ 31.55% ທຽບໃສ່ແຜນໂຄງການ 3 ປີ. ໃນນີ້, ສະໜອງໃຫ້ຂະແໜງກະສິກໍາ ແລະ ປ່າໄມ້ 84 ຫົວໜ່ວຍ ກວມ 49%, ບໍລິການທ່ອງທ່ຽວ ແລະ ການຄ້າ 86 ຫົວໜ່ວຍ ກວມ 45% ແລະ ຂະແໜງ ອຸດສາຫະກໍາ ແລະ ຫັດຖະກໍາ 18 ຫົວໜ່ວຍ ກວມ 6% ຂອງວົງເງິນອະນຸມັດທັງໝົດ. ສະເພາະ 6 ເດືອນປີ 2025 ໄດ້ອະນຸມັດຈໍານວນ 63 ຫົວໜ່ວຍ ລວມວົງເງິນ 120.15 ຕື້ກີບ ກວມ 35% ຂອງແຜນການປີ.

ສຳລັບສິນເຊື່ອ ແມ່ນແຍກອອກເປັນແຕ່ລະແຂວງ ຄື: ຈໍາປາສັກ ອະນຸມັດ 78 ຫົວໜ່ວຍ ວົງເງິນ 165.11 ຕື້ກີບ, ໃນ 6 ເດືອນ 2025 ໄດ້ອະນຸມັດ ຈໍານວນ 28 ຫົວໜ່ວຍ ວົງເງິນ 56.45 ຕື້ກີບ ເທົ່າກັບ 56.45% ຂອງແຫຼ່ງທຶນຈັດສັນປະຈໍາປີ (100 ຕື້ກີບ); ສາລະວັນ ອະນຸມັດ 68 ຫົວໜ່ວຍ ວົງເງິນ 93.65 ຕື້ກີບ, ໃນ 6 ເດືອນ/2025 ໄດ້ອະນຸມັດ 17 ຫົວໜ່ວຍ ວົງເງິນ 27.90 ຕື້ກີບ ເທົ່າກັບ 34.87% ຂອງແຫຼ່ງທຶນຈັດສັນປະຈໍາປີ (80 ຕື້ກີບ); ເຊກອງອະນຸ ມັດ 29 ຫົວໜ່ວຍ ລວມ ວົງເງິນ 44.20 ຕື້ກີບ, 6 ເດືອນ/2025 ໄດ້ອະນຸມັດຈໍານວນ 13 ຫົວໜ່ວຍ ວົງເງິນ 28.20 ຕື້ກີບ ເທົ່າກັບ 35.25% ຂອງແຫຼ່ງທຶນຈັດສັນປະຈໍາປີ (80 ຕື້ກີບ); ອັດຕະປື ອະນຸ ມັດ 13 ຫົວໜ່ວຍ ວົງເງິນ 18.80 ຕື້ກີບ, ໃນ 6 ເດືອນ/2025 ໄດ້ອະນຸມັດ ຈໍານວນ 5 ຫົວໜ່ວຍ ລວມວົງເງິນ 7.60 ຕື້ກີບ ເທົ່າກັບ 9.50% ຂອງແຫຼ່ງທຶນຈັດສັນປະຈໍາປີ (80 ຕື້ກີບ);

ສະຫາຍ ໄຊລືຊາ ຜູຍຍະວົງ ໄດ້ແຈ້ງຕື່ມວ່າ: ແຜນການ 6 ເດືອນທ້າຍປີ 2025 ຍັງສືບຕໍ່ຕິດຕາມການປະຕິບັດກົນໄກການລະດົມແຫຼ່ງທຶນ ແລະ ນະໂຍບາຍສິນເຊື່ອ ໃນຂັ້ນມະຫາພາກ ໂດຍສະເພາະນະໂຍບາຍສິນເຊື່ອ 765, ພ້ອມທັງຊຸກຍູ້ໃຫ້ບັນດາ ທທກ ແລະ ສະຖາບັນການເງິນຈຸລະພາກ ປະກອບສ່ວນສ້າງຄວາມເຂັ້ມແຂງດ້ານແຫຼ່ງທຶນ ແລະ ແກ້ໄຂບັນຫາໜີ້ສິນ ທີ່ບໍ່ເກີດດອກອອກຜົນ, ພ້ອມທັງຕິດຕາມ ແລະ ຊຸກຍູ້ວຽກງານການສ້າງຄວາມເຂັ້ມແຂງ ໃຫ້ແກ່ສະຖາບັນການເງິນ ທີ່ຢູ່ພາຍໃຕ້ການຄຸ້ມຄອງຂອງ ທຫລ.ພຕ; ລົງຕິດຕາມ ຊຸກຍູ້ການສ້າງເສດຖະກິດຕາມແນວທາງ ສອຈ ຂອງປະຊາຊົນພາຍໃນເມືອງຕ່າງໆ ຂອງແຂວງຈໍາປາສັກ ຜ່ານບັນດາກອງທຶນ, ສະຫະກອນສິນເຊື່ອ ໂດຍການຊຸກຍູ້ ໃຫ້ກອງທຶນ ແລະ ສະຫະກອນສິນເຊື່ອເງິນ ແລະ ຝາກປະຢັດເປັນໃຈກາງ ທາງດ້ານການເງິນ ຕອບສະໜອງໃຫ້ການຜະລິດໃນທ້ອງຖິ່ນ, ຊຸມຊົນ ຊຸກດັນໃຫ້ສະຫາກອນສິນເຊື່ອ ແລະ ເງິນຝາກປະຢັດ ຫາທາງຂະຫຍາຍກິດຈະການຂອງຕົນໄປໃນຂະແໜງການຜະລິດ, ການຄ້າ ແລະ ບໍລິການ ທີ່ເໝາະສົມ, ສອດຄ່ອງກັບລະບຽບການກ່ຽວຂ້ອງ, ສືບຕໍ່ຊຸກຍູ້ສົ່ງເສີມວຽກງານການປົກປ້ອງຜູ້ບໍລິໂພກທາງດ້ານການເງິນ ໄປຄຽງຄູ່ກັບການພັດທະນາການບໍລິການຂອງລະບົບສະຖາບັນການເງິນ, ສົ່ງເສີມການເຂົ້າເຖິງການບໍລິການທາງດ້ານການເງິນ ເພື່ອສ້າງຮັບຮູ້ ແລະ ເຂົ້າໃຈກ່ຽວກັບວຽກງານທະນາຄານ-ລະບົບການບໍລິການດ້ານການເງິນຂອງສັງຄົມໃຫ້ທົ່ວເຖິງ. ໃນນີ້, ທຫລ.ພຕ ຈະເດີນສຳຫຼວດການເຂົ້າເຖິງການບໍລິການທາງດ້ານການເງິນຢູ່ 16 ບ້ານຢູ່ຈຳປາສັກ ແລະ ອັດຕະປື.

ສືບຕໍ່ຈັດຕັ້ງປະຕິບັດ, ຜັນຂະຫຍາຍ, ເຜີຍແຜ່ບັນດາກົດໝາຍ ແລະ ນິຕິກຳໃຕ້ກົດໝາຍ ທີ່ ທຫລ ວາງອອກ; ສືບຕໍ່ຕິດຕາມບັນດາຮ້ານແລກປ່ຽນເງິນຕາ ແລະ ຮ້ານໂອນເງິນທີ່ບໍ່ໄດ້ຮັບອະນຸຍາດ ຮ່ວມກັບເຈົ້າໜ້າທີ່ຕໍາຫຼວດເສດຖະກິດ ປກສ ແຂວງ ເພື່ອຕິດຕາມການເຄື່ອນໄຫວ ແລະ ປະຕິບັດມາດ ຕະການຕໍ່ຜູ້ລະເມີດ; ຊຸກຍູ້ສົ່ງເສີມການນຳໃຊ້ເງິນກີບ ຕາມເປົ້າໝາຍສະຖາບັນການສຶກສາ ເພື່ອປູກຈິດສຳນຶກ ແລະ ຄ່ານິຍົມໃນການນຳໃຊ້ເງິນກີບຕາມແຜນການ; ເອົາໃຈໃສ່ຕິດຕາມ ແລະ ຊ່ວຍໃນການຄຸ້ມຄອງກະແສເງິນຕາຕ່າງປະເທດ ຕິດພັນກັບການນໍາເຂົ້າ-ສົ່ງອອກສິນຄ້າ ແລະ ບໍລິການຜ່ານລະບົບການບໍລິຫານເງິນຕາຕ່າງປະເທດ ຕາມສັດສ່ວນການໂອນ ແລະ ການຂາຍເງິນໃຫ້ແກ່ລະບົບທະນາຄານ ຕາມທີ່ໄດ້ກຳນົດລະບຽບການ; ສືບຕໍ່ຊຸກຍູ້ບໍລິສັດ ແລະ ປະສານກັບພາກສ່ວນກ່ຽວຂ້ອງ ເພື່ອຈັດຕັ້ງປະຕິບັດວຽກງານຄຸ້ມຄອງເງິນຕາຕ່າງປະເທດ ທີ່ຕິດພັນກັບກະແສເງິນລົງທຶນຈາກຕ່າງປະເທດ ຂອງບັນດາບໍລິ ສັດ ທີ່ມີການລົງທຶນໃນກິດຈະການສໍາປະທານ ແລະ ທົ່ວໄປ ທີ່ມີຮູ້ນເກີນ 10% ໃຫ້ເຂົ້າມາຢັ້ງຢືນການນໍາເຂົ້າທຶນນໍາ ທຫລ.ພຕ ເພື່ອຕິດຕາມບໍລິມາດທຶນ ທີ່ເປັນເງິນຕາຕ່າງປະເທດຕົວຈິງ ທີ່ໄດ້ນໍາເຂົ້າມາ ສປປ ລາວ; ເຄື່ອນໄຫວຊຸກຍູ້ການຊໍາລະສະສາງ ເປັນເງິນກີບກັບບັນດາຫ້າງຮ້ານ, ບໍລິສັດ, ຕະຫຼາດ, ດ່ານປະເພນີ-ດ່ານສາກົນ ແລະ ບັນດາທຸລະກິດຕ່າງໆ ທີ່ຕິດພັນກັບການຮັບຊໍາລະ ແລະ ໂຄສະນາລາຄາສິນຄ້າເປັນເງິນຕາຕ່າງປະເທດ ເພື່ອໃຫ້ເຂົ້າມາຂໍອະນຸຍາດຈາກ ທຫລ (ສໍາລັບຫົວໜ່ວຍ ທີ່ເປັນເປົ້າໝາຍນໍາໃຊ້ເງິນຕາຕ່າງປະເທດ).