ທົບທວນ ແຜນດໍາເນີນງານແຫ່ງຊາດ ເພື່ອສ້າງຄວາມເຂັ້ມແຂງລະບົບປົກປ້ອງເດັກຢູ່ຫຼວງພະບາງ

ທ່ານ ສຸພອນໄຊ ລໍແພງສີ ກ່າວວ່າ: ກອງປະຊຸມຄັ້ງນີ້, ຈັດຂຶ້ນເພື່ອເປັນການຕິດຕາມ, ປະເມີນຜົນ ສຳເລັດ ແລະ ສິ່ງທ້າທາຍໃນການຈັດຕັ້ງປະຕິບັດແຜນດໍາເນີນງານແຫ່ງຊາດ ເພື່ອສ້າງຄວາມເຂັ້ມແຂງລະບົບປົກປ້ອງເດັກ 2022-2026 ຊຶ່ງຈະມີການຄົ້ນຄວ້າໃຫ້ຮູ້ເຖິງຜົນສໍາເລັດ ແລະ ສິ່ງທ້າທາຍໃນການຈັດຕັ້ງປະຕິ ບັດວຽກງານໃນໄລຍະ 5 ປີຜ່ານມາ, ເຂົ້າເປັນຂໍ້ມູນພື້ນຖານທີ່ສໍາຄັນ ໃນການວາງແຜນດໍາເນີນງານແຫ່ງຊາດ ສະບັບ 2026-2031 ໃຫ້ມີຄວາມສອດຄ່ອງ ແລະ ມີປະສິດທິພາບຍິ່ງຂຶ້ນ.

ຈາກນັ້ນ, ຜູ້ເຂົ້າຮ່ວມໄດ້ຮັບຟັງການສະເໜີພາບລວມ ຂອງແຜນດໍາເນີນງານແຫ່ງຊາດ ເພື່ອສ້າງຄວາມເຂັ້ມແຂງລະບົບປົກປ້ອງເດັກ 2022-2026 ເປັນການຈັດຕັ້ງຜັນຂະຫຍາຍເປົ້າໝາຍທີ 3 ແລະ ແຜນວຽກຈຸດສຸມທີ 5 ຂອງແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX ແລະ ແຜນພັດທະນາແຮງງານ ແລະ ສະຫວັດດີການສັງຄົມ 5 ປີ ຄັ້ງທີ V ໄລຍະ (2021-2025) ເປັນວຽກລະອຽດ ເພື່ອໃຫ້ບັນດາຂະແໜງ ການທີ່ກ່ຽວຂ້ອງ, ສັງຄົມ, ອົງການຈັດຕັ້ງພາຍໃນ ແລະ ຕ່າງປະເທດ ເປັນບ່ອນອີງໃນການລະດົມຊັບພະຍາ ກອນ ປະກອບສ່ວນເຂົ້າໃນການພັດທະນາ, ຊ່ວຍເຫຼືອເດັກທີ່ຕ້ອງການປົກປ້ອງພິເສດ ໂດຍບໍ່ປະຖິ້ມໃຜໄວ້ຂ້າງຫຼັງ. ໂດຍສຸມໃສ່ການສ້າງຄວາມເຂັ້ມແຂງໃຫ້ຂອບນິຕິກຳ, ວາງແຜນ, ປະສານງານ, ການຄຸ້ມຄອງ ແລະ ການສົ່ງຕໍ່ກໍລະນີ, ຕິດຕາມກວດກາລະບົບປົກປ້ອງເດັກ, ການພັດທະນາ, ການສ້າງຄວາມເປັນມືອາຊີບ, ການບໍລິການແກ້ໄຂບັນຫາການປົກປ້ອງເດັກ ເພື່ອປ້ອງກັນການໃຊ້ແຮງງານເດັກ, ການເກັບກໍາຂໍ້ມູນ ແລະ ການສ້າງຖານຂໍ້ມູນວຽກງານປົກປ້ອງເດັກ. ປັດຈຸບັນຢູ່ໃນໄລຍະທ້າຍຂອງການຈັດຕັ້ງປະຕິບັດ. ດັ່ງນັ້ນ, ຈຶ່ງໄດ້ມີການທົບທວນຄືນບັນດາຜົນສຳເລັດ ແລະ ຂໍ້ຄົງຄ້າງຂອງບັນດາກິດຈະກໍາທີ່ກໍານົດໄວ້ໃນແຜນ ເພື່ອວາງແຜນສືບຕໍ່ບັນດາກິດຈະກຳໃນຕໍ່ໜ້າ, ພ້ອມນັ້ນບັນດາຜູ້ເຂົ້າຮ່ວມໄດ້ແລກປ່ຽນຄໍາເຫັນ ຕໍ່ສະພາບການປະຕິບັດວຽກງານຕົວຈິງ ເພື່ອເປັນບົດຮຽນໃນການສືບຕໍ່ປັບປຸງແກ້ໄຂໃຫ້ດີຂຶ້ນໃນຕໍ່ໜ້າ. ຂ່າວ-ພາບ: ອາພຸດເດດ ບຸບຜາ