ທົບທວນການຈັດຕັ້ງປະຕິບັດໂຄງການ ແກ້ໄຂລະເບີດບໍ່ທັນແຕກ ໄລຍະເຄິ່ງໂຄງການ

ກອງປະຊຸມທົບທວນການຈັດຕັ້ງປະຕິບັດໂຄງການສະໜັບສະໜູນດ້ານປະສິດທິພາບ ແລະ ປະສິດທິຜົນ ໃນການແກ້ໄຂລະເບີດບໍ່ທັນແຕກ ໄລຍະເຄິ່ງໂຄງການໄດ້ຈັດຂຶ້ນໃນວັນທີ 12 ມີນາຜ່ານມາ ທີ່ໂຮງແຮມ ຣີເວີເຣ່ຍ ເມືອງທ່າແຂກ ແຂວງຄຳມ່ວນ ໂດຍມີທ່ານ ນາງ ກຽນຕາ ວັນມະນາ ຫົວໜ້າພະແນກການຕ່າງປະເທດແຂວງຄຳມ່ວນ, ມີຜູ້ຕາງໜ້າຈາກສະຖານທູດ ລຸກຊຳບວກ ປະຈຳລາວ, ອົງການສະຫະປະຊາຊາດເພື່ອການພັດທະນາ ປະຈຳ ລາວ, ຕາງໜ້າຈາກພາກສ່ວນທີ່ກ່ຽວຂ້ອງເຂົ້າຮ່ວມ.
    ໂຄງການສະໜັບສະໜູນດ້ານປະສິດທິພາບ ແລະ ປະສິດທິຜົນ ໃນຂະແໜງການແກ້ໄຂບັນຫາ ລະເບີດບໍ່ທັນແຕກ ເພື່ອປະກອບສ່ວນເຂົ້າໃນຜົນສໍາເລັດຂອງເປົ້າໝາຍການພັດທະນາແບບຍືນຍົງທີ 18, ແຜນຍຸດທະສາດ ວ່າດ້ວຍເສັ້ນທາງກ້າວສູ່ຄວາມປອດໄພ ໄລຍະທີ III ໂດຍການສະໜັບສະໜູນຈາກ ລັດຖະບານ ລຸກຊໍາບວກ ຜ່ານອົງການສະຫະປະຊາຊາດ ເພື່ອການພັດທະນາ ປະຈຳລາວ ໃນການສະໜັບສະໜູນການປະຕິບັດງານຂອງ ຄກລ ເຂົ້າໃນພື້ນທີ່ການພັດທະນາຂອງທ້ອງຖິ່ນ ປະກອບສ່ວນເຂົ້າໃນວຽກງານແກ້ໄຂຄວາມທຸກຍາກ, ມີໄລຍະການຈັດຕັ້ງປະຕິບັດ 24 ເດືອນ (1 ທັນວາ 2022 ຫາ 30 ພະຈິກ 2024) ລວມມູນຄ່າ 1.004.016 ໂດລາສະຫະລັດ ຊຶ່ງມີ 4 ເມືອງ ເປົ້າໝາຍຄື: ບົວລະພາ, ມະຫາໄຊ, ໄຊບົວທອງ ແລະ ເຊບັ້ງໄຟ ລວມມີ 59 ບ້ານເປົ້າໝາຍ. ສໍາລັບຜົນການຈັດຕັ້ງປະຕິບັດໃນໄລຍະເຄິ່ງໂຄງການ (ປີ 2023) ໃນຈຳນວນ 3 ໜ້າວຽກຫຼັກຄື: ວຽກງານໂຄສະນາສຶກສາຄວາມສ່ຽງ ປະຕະບັດໄດ້ 30 ບ້ານ ເທົ່າກັບ 100%, ວຽກງານສຳຫຼວດດ້ານວິຊາການ ປະຕິບັດໄດ້ 317 ເຮັກຕາ ເທົ່າກັບ 127% ແລະ ວຽກງານເກັບກູ້ ປະຕິບັດໄດ້ 28 ເຮັກຕາ ເທົ່າກັບ 48%, ສາມາດກວດພົບລະເບີດ ແລະ ສຳພາວຸດອື່ນໆ ລວມມີ 763 ອັນ/ລູກ. ໃນນັ້ນ ລະເບີດລູກຫວ່ານ (ບົມບີ) ຈໍານວນ 641 ລູກ, ສຳພະວຸດອື່ນໆ 122 ອັນ.
    ກອງປະຊຸມ ບັນດາຜູ້ເຂົ້າຮ່ວມຍັງໄດ້ປຶກສາຫາລືປະກອບຄຳຄິດຄຳເຫັນເຖິງບັນຫາສິ່ງທ້າທາຍ, ວິທີການແກ້ໄຂ ລວມເຖິງທິດທາງແຜນການໃນຕໍ່ໜ້າ ເພື່ອສ້າງຄວາມເປັນເອກະພາບໃນການຮັບຮອງ ແລະ ຈັດຕັ້ງປະຕິບັດໃນຕໍ່ໜ້າ ທັງເປັນບ່ອນອີງໃນການປັບປຸງວຽກງານດັ່ງກ່າວໃຫ້ດີຂຶ້ນ ພ້ອມທັງລົງຕິດຕາມເບິ່ງສະໜາມເກັບກູ້ ເພື່ອຮັບຟັງການລາຍງານສະພາບການຈັດຕັ້ງປະຕິບັດວຽກງານພາກສະໜາມ ແລະ ຮັບຊົມການທຳລາຍ ລະເບີດບໍ່ທັນແຕກ ຢູ່ສະໜາມເກັບກູ້ຕົວຈິງ ຢູ່ເມືອງມະຫາໄຊ.
(ຂ່າວ: ກອງຄໍາ)