 |
ກອງປະຊຸມຄັ້ງນີ້, ໄດ້ຮັບຟັງບົດສະຫຼຸບຕີລາຄາຜົນສຳເລັດການຕ້ອນຮັບພີ່ນ້ອງຄົນເຊື້ອຊາດລາວຢູ່ຕ່າງ ປະເທດ ທີ່ມາເຂົ້າຮ່ວມສະເຫຼີມສະຫຼອງວັນຊາດ ຄົບຮອບ 50 ປີ (2 ທັນວາ 1975-2 ທັນວາ 2025) ຍົກໃຫ້ເຫັນສະພາບລວມ ຈຸດປະສົງ ແຜນການເຄື່ອນໄຫວ (ກ່ອນມື້ງານໂຮມຊຸມນຸມໃຫຍ່, ມື້ງານໂຮມຊຸມນຸມໃຫຍ່ ແລະ ຫຼັງມື້ງານໂຮມຊຸມນຸມໃຫຍ່) ໃນນີ້, ໄດ້ຍົກໃຫ້ເຫັນຜົນໄດ້ຮັບ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ຈຳນວນໜຶ່ງ ແລະ ຂໍ້ສະ ເໜີເພື່ອຜັນຂະຫຍາຍໃນຕໍ່ໜ້າ. ການມາຮ່ວມງານຄັ້ງນີ້ມີທັງໝົດ 486 ທ່ານ ທີ່ມາຈາກ 11 ປະເທດ, ຝຣັ່ງ 180 ທ່ານ, ອັງກິດ 6 ທ່ານ, ສະຫະລັດ ອາເມຣິກາ ແລະ ການາດາ 97 ທ່ານ, ອົສຕຣາລີ ແລະ ນິວຊີແລນ 48 ທ່ານ ແບນຊິກ 30 ທ່ານ, ຍີ່ປຸ່ນ 9 ທ່ານ, ເຢຍລະມັນ 10 ທ່ານ, ສະວິດ 5 ທ່ານ, ສະວີເດັນ 4 ທ່ານ. ໃນນີ້, ມີພີ່ນ້ອງເຊື້ອຊາດລາວທີ່ມາດໍາລົງຊີວິດຢູ່ ສປປ ລາວ ຢ່າງຖາວອນ 19 ທ່ານ ແລະ ອີກຈຳນວນ 78 ທ່ານມາລົງທະບຽນເຂົ້າຮ່ວມງານ ແຕ່ບໍ່ໄດ້ຜ່ານສະຖານທູດ ແລະ ມີພະສົງລາວຈາກຕ່າງປະເທດຈໍານວນ 5 ອົງ.
 |
ການມາຮ່ວມສະເຫຼີມສະຫຼອງວັນຊາດທີ 2 ທັນວາ ຄົບຮອບ 50 ປີຄັ້ງນີ້, ມີຄວາມໝາຍສຳຄັນ ແຕກຕ່າງກັບການມາຮ່ວມກອງປະຊຸມພົບປະຄັ້ງທີ 1 ກໍຄືການມາຢ້ຽມຢາມຂອງພີ່ນ້ອງເຊື້ອຊາດລາວທີ່ຜ່ານມາ ເພາະເປັນການກັບມາຮ່ວມສະຫຼອງວັນສໍາຄັນຂອງຊາດ ເປັນເຫດການ ການເມືອງທາງປະຫວັດສາດ ແລະ ເປັນວັນໜຶ່ງທີ່ໃນເມື່ອກ່ອນພີ່ນ້ອງເຊື້ອຊາດລາວເຫຼົ່ານັ້ນໄດ້ອອກຈາກປະເທດໄປ ໃນເວລາສ້າງຕັ້ງລະບອບໃໝ່. ດັ່ງນັ້ນ, ການຕ້ອນຮັບຄັ້ງນີ້ໄດ້ສ້າງບັນຍາກາດໃຫ້ເຂົາເຈົ້າມີຄວາມສະບາຍໃຈ ມີຄວາມພາກພູມໃຈຕໍ່ຜົນສໍາເລັດຂອງການສ້າງສາພັດທະນາປະເທດຊາດຕະຫຼອດໄລຍະ 50 ປີຜ່ານມາ ແລະ ໃຫ້ເຂົາເຈົ້າມີຄວາມສະໝັກໃຈຢາກປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດໃນຕໍ່ໜ້າ.
ຂ່າວ-ພາບ: ສນຊ
ຄໍາເຫັນ