ຖວທ ສະຫຼຸບການປະຕິບັດວຽກງານ ແລະ ເຜີຍແຜ່ແຈ້ງການກ່ຽວກັບການປັບປຸງກົງຈັກ - ບຸກຄະລາກອນ

ໃນໂອກາດນີ້, ທ່ານ ວັນສີ ກົວມົວ ຮອງລັດຖະມົນຕີກະຊວງ ຖວທ ໄດ້ສະຫຼຸບຕີລາຄາການຈັດຕັ້ງປະຕິບັດ ວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃນໄລຍະຜ່ານມາ, ສາມາດຍາດໄດ້ຜົນສຳເລັດຫຼາຍດ້ານ ເປັນຕົ້ນວຽກງານຖະແຫຼງຂ່າວ-ສື່ມວນຊົນ ໄດ້ຮັບການປັບປຸງ ແລະ ຂະຫຍາຍຕົວຢ່າງຕໍ່ເນື່ອງ, ເນັ້ນໃສ່ການພັດທະນາຊັບພະຍາກອນມະນຸດ ດ້ານສື່ມວນຊົນ ແລະ ຫັນສູ່ລະບົບດີຈີຕອນ, ປັດຈຸບັນສາມາດຂະຫຍາຍຕາໜ່າງຂ່າວສານ ຜ່ານລະບົບອິນເຕີເນັດໄດ້ຢ່າງທັນສະໄໝ, ພ້ອມທັງໄດ້ເອົາໃຈໃສ່ຕ້ານປະກົດການຫຍໍ້ທໍ້ ໃນສັງຄົມໄດ້ດີສົມຄວນ, ເອົາໃຈໃສ່ຕໍ່ການໂຄສະນາການແກ້ໄຂຄວາມຫຍຸ້ງຍາກທາງດ້ານເສດຖະກິດ, ວຽກດີຄົນເດັ່ນ, ຄອບຄົວຕົວແບບການປູກຝັງ-ລ້ຽງສັດ ຊຶ່ງສາມາດສ້າງຄວາມເຂົ້າໃຈ ແລະ ຄວາມເຊື່ອໝັ້ນໃຫ້ແກ່ປະຊາຊົນລາວບັນດາເຜົ່າ ລວມທັງຄົນເຊື້ອຊາດລາວທີ່ອາໄສຢູ່ຕ່າງປະເທດຕໍ່ການນຳພາຂອງພັກ ແລະລັດ. ສຳລັບວຽກງານວັດທະນະທຳ ກາຍເປັນກຳລັງແຮງສຳຄັນ ໃນການຍູ້ດັນການເຕີບໂຕ ແລະ ສ້າງສາພັດທະນາເສດຖະກິດ-ສັງຄົມ, ມູນເຊື້ອອັນດີງາມຂອງຊາດ ແລະ ຄຸນຄ່າມໍລະດົກວັດທະນະທຳອັນລ້ຳຄ່າໄດ້ຮັບການອະນຸລັກ, ສືບທອດ ແລະ ຂະຫຍາຍຕົວຢ່າງຕໍ່ເນື່ອງ, ສຸມໃສ່ການສົ່ງເສີມ, ປົກປັກຮັກສາ, ບູລະນະຮັກສາບັນດາປູສະນີຍະສະຖານ, ພິພິທະພັນ, ອະນຸສອນສະຖານ ແລະ ວັດຖຸບູຮານທີ່ເປັນມໍລະດົກວັດທະນະທຳ ແລະ ປະຫວັດສາດຂອງຊາດ, ມໍລະດົກວັດທະນະທຳຂອງຊາດຫຼາຍແຫ່ງໄດ້ຮັບການຮັບຮອງ ແລະ ຂຶ້ນທະບຽນເປັນມໍລະດົກໂລກຈາກອົງການ UNESCO. ສ່ວນວຽກງານທ່ອງທ່ຽວ ໄດ້ກ້າວຂຶ້ນເປັນຂະແໜງເສດຖະກິດປາຍແຫຼມ ຫຼື ທີ່ເອີ້ນວ່າ: ອຸດສາຫະກຳການທ່ອງທ່ຽວ, ສະຖານທີ່ທ່ອງທ່ຽວຫຼາຍບ່ອນໄດ້ຮັບການປັບປຸງ ແລະ ອຳນວຍຄວາມສະດວກຫຼາຍຂຶ້ນ, ທຸລະກິດການທ່ອງທ່ຽວໄດ້ຮັບການປັບປຸງໃຫ້ສອດຄ່ອງ ກັບມາດຕະຖານການທ່ອງທ່ຽວຂອງອາຊຽນ ແລະ ສາກົນ, ໄດ້ສຳເລັດໃນການຈັດຕັ້ງປະຕິບັດ ປີທ່ອງທ່ຽວລາວປີ 2024 ຢ່າງຈົບງາມ.

ໃນໂອກາດດຽວກັນນີ້, ທ່ານ ຄຳເຜີຍ ພິລາພາ ຫົວໜ້າກົມຈັກຕັ້ງ-ພະນັກງານ ກະຊວງ ຖວທ ໄດ້ເຜີຍແຜ່ແຈ້ງການກ່ຽວກັບ ການໂອນວຽກສື່ມວນຊົນ (ວຽກຖະແຫຼງຂ່າວ) ພ້ອມທັງຍົກຍ້າຍບຸກຄະລາກອນໄປຂຶ້ນກັບ ຄະນະໂຄສະນາອົບຮົມສູນກາງພັກ ໂດຍມີເນື້ອວ່າ: ກອງປະຊຸມຄະນະເລຂາທິການສູນກາງພັກ ໄດ້ຮັບຮອງການຍົກຍ້າຍບຸກຄະລາກອນ ແລະ ການໂອນວຽກສື່ມວນຊົນ ຈຳນວນ 5 ກົມ ແລະ ທຽບເທົ່າ ພ້ອມດ້ວຍບຸກຄະລາກອນທີ່ສັງກັດໃນກົງຈັກການຈັດຕັ້ງດັ່ງກ່າວ ໄປຂຶ້ນກັບຄະນະໂຄສະນາອົບຮົມສູນກາງພັກຄື: ກົມສື່ມວນຊົນ, ສຳນັກຂ່າວສານປະເທດລາວ, ໂທລະພາບແຫ່ງຊາດລາວ, ວິທະຍຸກະຈາຍສຽງແຫ່ງຊາດລາວ ແລະ ໜັງສືພິມ ພາສາຕ່າງປະເທດ.

ໂອກາດດຽວກັນ, ກໍໄດ້ມີພິທີໄດ້ປະກາດພະນັກງານອອກພັກການ-ຮັບອຸດໜູນບຳນານ ໂດຍປະຕິບັດຕາມແນວທາງນະໂຍບາຍຂອງພັກ, ລະບຽບກົດໝາຍຂອງລັດ ເມື່ອເຖິງອາຍຸກະສຽນອອກພັກຜ່ອນ-ຮັບອຸດໜູນບໍານານ ຄະນະບໍລິຫານງານພັກ, ຄະນະພັກ - ຄະນະນໍາຂອງກະຊວງ ຖວທ ໄດ້ຄົ້ນຄວ້າພິຈາລະນາຕົກລົງອະນຸມັດໃຫ້ ທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງ ຖວທ, ທ່ານ ນາງ ມະນີພັນ ຫຼວງສີສົງຄາມ ຮອງຫົວໜ້າກົມແຜນການ ແລະ ການຮ່ວມມືສາກົນ, ທ່ານ ວໍລະສັກ ປຣະວົງວຽງຄໍາ ຮອງຜູ້ອໍານວຍການໃຫຍ່ ວິທະຍຸກະຈາຍສຽງແຫ່ງຊາດ, ທ່ານ ພູປະສົງ ພຸດທະວົງ ຮອງຜູ້ອຳນວຍການໃຫຍ່ ໂທລະພາບແຫ່ງຊາດລາວ ອອກພັກການ-ຮັບອຸດໜູນບຳນານ.

ໃນໂອກາດນີ້, ທ່ານ ນາງ ສວນສະຫວັນ ວິຍະເກດ ໄດ້ກ່າວວ່າ: ເຖິງວຽກຖະແຫຼງຂ່າວ ຖືກໂອນໄປຂຶ້ນກັບ ຄະນະໂຄສະນາອົບຮົມສູນກາງພັກກໍຕາມ ຮຽກຮ້ອງໃຫ້ 5 ພາກສ່ວນສື່ມວນຊົນ ຈົ່ງສືບຕໍ່ມູນເຊື້ອ, ສືບຕໍ່ເສີມຂະຫຍາຍຜົນງານທີ່ຍາດມາໄດ້ໃນໄລຍຜ່ານມາ, ອັນສຳຄັນແມ່ນເຕົ້າໂຮມຄວາມສາມັກຄີ, ຄວາມເປັນເອກະພາບ, ເຮັດພາລະບົດບາດໜ້າທີ່ຂອງຕົນໃຫ້ດີທີ່ສຸດ, ມີຄວາມຮັບຜິດຊອບການເມືອງທີ່ພັກ, ລັດຖະບານ, ປະຊາຊົນມອບໝາຍໃຫ້ໄດ້ຮັບຜົນສຳເລັດ. ນອກຈາກນີ້, ຍັງໄດ້ສະແດງຊົມເຊີຍຕໍ່ກັບບັນດາທ່ານ ທີ່ໄດ້ຮັບນະໂຍບາຍ ພັກຜ່ອນ-ຮັບອຸດໜູນບຳນານ ທີ່ເຮັດສຳເລັດໜ້າທີ່ອັນມີກຽດ ທີ່ພັກ, ລັດ ແລະ ປະຊາຊົນມອບໝາຍໃຫ້, ໄດ້ທຸ່ມເທເຫື່ອແຮງ, ສຸມສະຕິປັນຍາ, ຄວາມຮູ້ຄວາມສາມາດຜ່ານຜ່າຄວາມຫຍຸ້ງຍາກ ປະຕິບັດໜ້າທີ່ວຽກງານທີ່ການຈັດຕັ້ງຂອງຕົນມອບໝາຍໃຫ້ຈົນສາມາດຍາດໄດ້ຜົນງານອັນໃຫຍ່ຫຼວງ ອັນໄດ້ເປັນການປະກອບສ່ວນໃຫ້ຜົນສຳເລັດລວມຂອງກະຊວງ ຖວທ ຕະຫຼອດມາ.

(ຂ່າວ: ກິດຕາ -ພາບ: ອ່າຍຄຳ)