ຖວທ ເຊກອງ ປາຖະກະຖາວັນກຳມະກອນສາກົນ ຄົບຮອບ 138 ປີ

ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງເຊກອງ ໄດ້ຈັດພິທີປາຖະກະຖາວັນກຳມະກອນສາກົນ ຄົບຮອບ 138 ປີ (1/5/1886-1/5/2024) ຂຶ້ນໃນວັນທີ 16 ພຶດສະພາຜ່ານມາ ໂດຍການປາຖະກະຖາຂອງທ່ານ ສົມພອນ ສີລາສັກ ຄະນະບໍລິຫານງານສະຫະພັນກໍາມະບານແຂວງ ປະທານກຳມະ ບານຮາກຖານພະແນກ ຖວທ ແຂວງ, ມີຫົວໜ້າ-ຮອງຂະແໜງ ແລະ ພະນັກງານກ່ຽວຂ້ອງເຂົ້າຮ່ວມ.
     ທ່ານ ສົມພອນ ສີລາສັກ ໄດ້ຍົກໃຫ້ເຫັນປະຫວັດຄວາມເປັນມາຂອງວັນກຳມະກອນສາກົນ ກໍຄືປະຫວັດ ສາດຂອງການຕໍ່ສູ້ຂອງກຳມະກອນ ຊາວຜູ້ອອກແຮງງານ ເພື່ອທວງເອົາສິດຜົນປະໂຫຍດຂອງຕົນ ເພື່ອທວງໃຫ້ພວກນາຍທຶນຕ້ອງຍອມປະຕິບັດໂມງເວລາເຮັດວຽກມື້ໜຶ່ງບໍ່ໃຫ້ເກີນ 8 ຊົ່ວໂມງ ແລະ ພັກຜ່ອນ 8 ຊົ່ວໂມງໄດ້ມີໂອກາດຮໍ່າຮຽນຍົກລະດັບຄວາມຮູ້ຂອງຕົນເອງ ພ້ອມທັງທວງໃຫ້ເພີ່ມເງິນເດືອນ, ເອົາໃຈໃສ່ເບິ່ງແຍງດູແລຊີວິດການເປັນຢູ່ຂອງຊາວຜູ້ອອກແຮງງານໃຫ້ດີກວ່າເກົ່າ, ຕໍ່ສະພາບການດັ່ງກ່າວໃນປີ 1889 ກອງປະຊຸມພັກກອມມູນິດສາກົນຄັ້ງທີ 2 ໄດ້ໄຂຂຶ້ນທີ່ນະຄອນຫຼວງປາຣີ (ປະເທດຝຣັ່ງ) ພາຍໃຕ້ຄໍາຂວັນ: ມື້ໜຶ່ງເຮັດວຽກ 8 ຊົ່ວໂມງ ແລະ ກໍານົດເອົາວັນທີ 1 ພຶດສະພາ 1886 ເປັນວັນກໍາມະກອນສາກົນ; ໃນໄລຍະຜ່ານມາຊົນຊັ້ນກຳມະກອນລາວ ກໍຄືກຳມະກອນໃນທົ່ວໂລກ ຊຶ່ງຊົນຊັ້ນກຳມະກອນລາວໄດ້ກຳເນີດ ແລະ ເຕີບໃຫຍ່ພາຍໃຕ້ການນຳພາຂອງພັກປະຊາຊົນ ປະຕິວັດລາວ ກາຍເປັນກຳລັງຫຼັກແຫຼ່ງໃນການຕໍ່ສູ້ປົດປ່ອຍປະເທດຊາດຢ່າງສົມບູນໃນວັນທີ 2 ທັນວາ 1975 ແລະ ສືບຕໍ່ເປັນກໍາລັງແຮງອັນໃຫຍ່ຫຼວງແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດຕະຫຼອດມາຈົນເຖິງປັດຈຸບັນ.
    ໂອກາດນີ້, ທ່ານ ສົມພອນ ສີລາສັກ ຍັງໄດ້ຮຽກຮ້ອງມາຍັງສະມາຊິກກຳມະບານທຸກສະຫາຍ ຕ້ອງເປັນເຈົ້າການສຶກສາອົບຮົມການເມືອງແນວຄິດ, ເຊື່ອມຊຶມກຳແໜ້ນແນວທາງນະໂຍບາຍຂອງພັກໃຫ້ຮັບຮູ້ເຂົ້າໃຈຢ່າງທົ່ວເຖິງ, ເອົາໃຈໃສ່ກະກຽມກອງປະຊຸມໃຫຍ່ 3 ຂັ້ນ, ການສ້າງຂະບວນການຂໍ່ານັບຮັບຕ້ອນວັນສຳຄັນຕ່າງໆ, ການພົວພັນຮ່ວມມືກັບຕ່າງປະເທດ ແລະ ຕິດຕາມກວດກາ ການເຄື່ອນໄຫວຈັດຕັ້ງປະຕິບັດໜ້າທີ່ວຽກງານຂອງພັກ, ພະນັກງານໃນກົມກອງ ເພື່ອເຮັດໃຫ້ວຽກງານມີຜົນສຳເລັດເທື່ອລະກ້າວ. ຂ່າວ: ອັດສະວິນ