ທູດຫວຽດນາມ ພົບປະບັນດາອົງການສື່ມວນຊົນລາວ ແລະ ຫວຽດນາມ ປະຈໍາລາວ

ເຂົ້າຮ່ວມການພົບປະຄັ້ງນີ້, ຝ່າຍຫວຽດນາມມີ ສະຫາຍ ຫງວຽນ ມິງ ເຕີມ ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສສ ຫວຽດນາມ ປະຈໍາ ສປປ ລາວ ພ້ອມດ້ວຍສະຫາຍການນໍາຂອງບັນດາອົງການອ້ອມຂ້າງສະຖານທູດ, ຫົວໜ້າສຳນັກງານຜູ້ຕາງໜ້າ ແລະ ນັກຂ່າວຂອງບັນດາສຳນັກງານຜູ້ຕາງໜ້າສື່ມວນຊົນຫວຽດນາມ ປະຈໍາລາວ ມີ 4 ສຳນັກຄື: ໜັງສືພິມ ເຢິນເຢິນ, ຂ່າວສານຫວຽດນາມ, ວິທະຍຸກະຈາຍສຽງແຫ່ງຊາດ ຫວຽດນາມ (VOV) ແລະ ໂທລະພາບແຫ່ງຊາດ ຫວຽດນາມ (VTV). ຝ່າຍລາວມີ ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ ຮອງເລຂາຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ (ຄອສພ), ທ່ານ ວັນໄຊ ຕະວິນຍານ ກຳມະການຄະນະພັກ ຮອງຫົວໜ້າ ຄອສພ ເລຂາຄະນະໜ່ວຍພັກ ຫົວໜ້າບັນນາທິການໃຫຍ່ ໜັງສືພິມປະຊາຊົນ, ມີສະຫາຍການນໍາຈາກສະມາຄົມນັກຂ່າວ ແຫ່ງ ສປປ ລາວ, ກົມສື່ມວນຊົນ, ບັນນາທິການ, ອຳນວຍການ ແລະ ນັກຂ່າວອົງການສື່ທາງການຂອງ ສປປ ລາວ.

ສະຫາຍ ຫງວຽນ ມິງ ເຕີມ ໄດ້ວ່າ: ການພົບປະ ແລະ ເຮັດວຽກໃນມື້ນີ້ມີຄວາມໝາຍຄວາມສຳຄັນທີ່ສຸດ, ທັງເປັນໂອກາດເພື່ອໃຫ້ພວກເຮົາແລກປ່ຽນ, ພົບປະສ້າງສັນ, ເພື່ອເພີ່ມທະວີຄວາມເຂົ້າອົກເຂົ້າໃຈຊຶ່ງກັນ ແລະ ກັນ, ຈາກນັ້ນຈະປະກອບສ່ວນຮັດແໜ້ນນໍ້າໃຈ, ການພົວພັນສະໜິດຕິດແໜ້ນລະຫວ່າງສະຖານທູດ, ບັນດາອົງການອ້ອມຂ້າງສະຖານທູດ ແລະ ບັນດາສຳນັກງານຜູ້ຕາງໜ້າສື່ມວນຊົນຫວຽດນາມປະຈຳ ສປປ ລາວ ກັບບັນດາອົງການຄຸ້ມຄອງວຽກງານສື່ມວນຊົນ ແລະ ອົງການສື່ມວນຊົນຂອງລາວ; ທັງເປັນໂອກາດເພື່ອໃຫ້ພວກເຮົາປຶກສາຫາລືບັນດາມາດຕະການສືບຕໍ່ປະສານສົມທົບຢ່າງແໜ້ນແຟ້ນກວ່າເກົ່າ ໃນວຽກງານໂຄສະນາ, ກໍານົດທິດຫາງສຽງ, ປະກອບສ່ວນຊ່ວຍໃຫ້ປະຊາຊົນສອງປະເທດເຂົ້າໃຈຢ່າງເລິກເຊິ່ງກວ່າກ່ຽວກັບປະເທດ ແລະ ປະຊາຊົນຂອງແຕ່ລະປະເທດ ແລະ ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານຫວຽດນາມ - ລາວ, ລາວ - ຫວຽດນາມ.

ສະຫາຍ ລາວປາວຊົ່ງ ນະວົງໄຊ ໄດ້ກ່າວວ່າ: ໄລຍະທີ່ຜ່ານມາພັກ - ລັດຖະບານຫວຽດນາມ ໄດ້ຊ່ວຍເຫຼືອກໍ່ສ້າງບຳລຸງຊັບພະຍາກອນມະນຸດຂອງ ສປປ ລາວ, ຈັດຝຶກອົບຮົມໄລຍະສັ້ນ, ໄລຍະຍາວໃຫ້ພະນັກງານວິຊາການແລະ ການນຳນັບຕັ້ງແຕ່ຂັ້ນສູນກາງຮອດທ້ອງຖິ່ນ; ໃນນັ້ນ, ກໍໄດ້ຊ່ວຍເຫຼືອກໍ່ສ້າງສື່ມວນຊົນຂອງ ສປປ ລາວ ດ້ານຄວາມຮູ້ຄວາມສາມາດ, ດ້ານເຕັກນິກ ແລະ ວັດຖຸອຸປະກອນຮັບໃຊ້ຕ່າງໆ. ບັນດາອົງການສື່ມວນຊົນລາວ ແລະ ຫວຽດນາມ ໄດ້ເສີມຂະຫຍາຍສາຍພົວພັນມິດຕະພາບ, ການຮ່ວມມືຮອບດ້ານ, ເຂົ້າສູ່ລວງເລິກ ແລະ ຊ່ວຍເຫຼືອຊຶ່ງກັນແລະ ກັນ ເພື່ອການພັດທະນາຂອງສອງຝ່າຍໃຫ້ນັບມື້ມີປະສິດທິຜົນຍິ່ງຂຶ້ນ; ສອງຝ່າຍໄດ້ແລກປ່ຽນຄະນະຜູ້ແທນ, ແລກປ່ຽນບົດຮຽນວິຊາການ, ຂໍ້ມູນຂ່າວສານທີ່ກ່ຽວຂ້ອງເຖິງວຽກງານສອງຝ່າຍຕາມແຜນການຮ່ວມມືຂອງສອງກົມການເມືອງສອງພັກໄດ້ຕົກລົງຮັບຮອງເອົາ. ອົງການສື່ມວນຊົນຂອງລາວ ແລະ ຫວຽດນາມ ກໍໄດ້ມີການພົວພັນກັນຢ່າງສະໜິດແໜ້ນ ເຊັ່ນ: ໜັງສືພິມປະຊາຊົນ ຮ່ວມມືກັບ ໜັງສືພິມ ເຢິນເຢິນ; ວາລະສານອະລຸນໃໝ່ ຮ່ວມມືກັບ ວາລະສານກົງສ້ານ (ວາລະສານກອມມູນິດ) ຫວຽດນາມ; ສຳນັກຂ່າວສານປະເທດລາວ ຮ່ວມມືກັບ ສຳນັກຂ່າວສານຫວຽດນາມ; ໂທລະພາບແຫ່ງຊາດລາວ ຮ່ວມມືກັບ VTV ແລະ ວິທະຍຸກະຈາຍສຽງແຫ່ງຊາດລາວ ຮ່ວມມືກັບ VOV .

ສະຫາຍ ວັນໄຊ ຕະວິນຍານ ກໍໄດ້ກ່າວວ່າ: ໜັງສືພິມປະຊາຊົນ ແລະ ໜັງສືພິມເຢິນເຢິນ ໄດ້ມີການພົວພັນຮ່ວມມືກັນຢ່າງສະໜິດສະໜົມ ພ້ອມນີ້ໜັງສືພິມປະຊາຊົນ ຍັງໄດ້ພົວພັນແລກປ່ຽນຂໍ້ມູນຂ່າວສານກັບອົງການສື່ມວນຊົນຫວຽດນາມປະຈໍາລາວ; ໂອກາດນີ້, ກໍສະເໜີໃຫ້ມີການສືບຕໍ່ຮ່ວມມື ແລະ ສ້າງເງື່ອນໄຂໃຫ້ມີກິດຈະກຳຕ່າງໆ ເພື່ອໃຫ້ການພົວພັນຮ່ວມມືເປັນຂະບວນຟົດຟື້ນກວ່າເກົ່າ ເປັນຕົ້ນ ສືບຕໍ່ແລກປ່ຽນຂໍ້ມູນຂ່າວສານ, ບົດນໍາ-ບົດຄວາມ ແລະ ບົດຂຽນຕ່າງໆ ໃນໂອກາດສຳຄັນຂອງສອງພັກ, ສອງລັດ ເພື່ອສືບຕໍ່ໂຄສະນາເຜີຍແຜ່ ສູ່ປະຊາຊົນສອງຊາດໄດ້ຮັບຮູ້; ສ້າງເງື່ອນໄຂໃຫ້ມີການພົວພັນກັບ ຄະນະກຳມະການຮ່ວມມືລາວ-ຫວຽດນາມ ແລະ ບັນດາສະມາຄົມຕ່າງໆຂອງຫວຽດນາມ ປະຈໍາ ສປປ ລາວ ເພື່ອສະໜອງຂໍ້ມູນຕ່າງໆ ສ້າງຜະລິດຕະພັນສື່ມວນຊົນເພື່ອໂຄສະນາຜົນງານ ກໍຄືຜົນສຳເລັດຕ່າງໆ ໄດ້ຢ່າງຕໍ່ເນື່ອງ ແນໃສ່ໃຫ້ປະຊາຊົນສອງຊາດ ລາວ -ຫວຽດນາມ ແລະ ບັນດາປະເທດໃນໂລກ ໄດ້ຮັບຮູ້ເຖິງໝາກຜົນຂອງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານຂອງສອງປະເທດເຮົາ.

ໃນການພົບປະຄັ້ງນີ້, ຍັງໄດ້ຈັດພິທີມອບ-ຮັບໃບຍ້ອງຍໍຂອງທ່ານລັດຖະມົນຕີກະຊວງການຕ່າງປະເທດຫວຽດນາມ ໃຫ້ກົມກອງຄື: ສໍານັກງານຜູ້ຕາງໜ້າໜັງສືພິມເຢິນເຢິນ ປະຈໍາລາວ ແລະ ສຳນັກງານຜູ້ຕາງໜ້າ VOV ປະຈໍາລາວ; ບຸກຄົນແມ່ນ ສະຫາຍ ຫງວຽນຫງອກເຟືອງ ຫົວໜ້າສຳນັກງານຜູ້ຕາງໜ້າ VTV ປະຈໍາລາວ ແລະ ສະຫາຍ ໂດ້ບ໋າແທ່ງ ນັກຂ່າວສຳນັກງານຜູ້ຕາງໜ້າສຳນັກຂ່າວສານຫວຽດນາມປະຈຳລາວ. ພ້ອມກັນນັ້ນ, ກໍຈະມອບໃບຍ້ອງຍໍຂອງທ່ານເອກອັກຄະລັດຖະທູດແຫ່ງ ສສ ຫວຽດນາມ ປະຈຳ ສປປ ລາວ ໃຫ້ແກ່ 4 ກົມກອງຄືສໍານັກງານຜູ້ຕາງໜ້າຂອງອົງການສື່ມວນຊົນຫວຽດນາມປະຈຳ ສປປ ລາວ ເນື່ອງຈາກຜົນງານໃນການປະສານສົມທົບຢ່າງມີປະສິດທິຜົນກັບສະຖານທູດຫວຽດນາມປະຈໍາລາວໃນວຽກງານຂໍ້ມູນຂ່າວສານການຕ່າງປະເທດອີກດ້ວຍ.

(ຂ່າວ-ພາບ: ສຸກສະຫວັນ)