ທູດລາວ ຍື່ນສານຕາຕັ້ງຕໍ່ ສົມເດັດ ພະຣາຊາ ວິນເລັມ ອາເລັກຊານເດີແຫ່ງ ຣາຊະອານາຈັກ ໂຮນລັງ

ທ່ານ ກິ່ງໂພແກ້ວ ພົມມະຫາໄຊ ໄດ້ເຂົ້າຍື່ນສານຕາຕັ້ງຕໍ່ ສົມເດັດ ພະຣາຊາ ວິນເລັມ ອາເລັກຊານເດີແຫ່ງ ຣາຊະອານາຈັກ ໂຮນລັງ ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ຣາຊະອານາຈັກໂຮນລັງ ເມື່ອບໍ່ດົນມານີ້ ທີ່ພະຣາຊະວັງ Noordeinde Palace ນະຄອນລາຮາຍ ແຫ່ງ ຣາຊະອານາຈັກ ໂຮນລັງ.

    ໃນໂອກາດດັ່ງກ່າວ, ທ່ານກິ່ງໂພແກ້ວ ພົມມະຫາໄຊ ໄດ້ຮັບກຽດໂອ້ລົມກັບ ສົມເດັດ ພະຣາຊາ ວິນເລັມ ອາເລັກຊານເດີ ດ້ວຍບັນຍາກາດອັດທະຍາໄສໄມຕີຈິດອັນດີ ຊຶ່ງທ່ານທູດໄດ້ນໍາເອົາຄວາມຢ້ຽມຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດຂອງ ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ເຖິງ ສົມເດັດ ພະຣາຊາ ວິນເລັມ ອາເລັກຊານເດີ ແລະ ປະຊາຊົນ ໂຮນລັງ ທຸກຖ້ວນໜ້າ. ພ້ອມດຽວກັນນັ້ນ, ທ່ານທູດຍັງໄດ້ກ່າວໃນນາມຕາງໜ້າລັດຖະບານລາວວ່າ: ສປປ ລາວ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີນັບຕັ້ງແຕ່ ສປປ ລາວ ແລະ ໂຮນລັງ ໄດ້ສ້າງຕັ້ງສາຍພົວພັນການທູດນໍາກັນໃນປີ 1975 ແລະ ເຫັນໄດ້ວ່າ ການພົວພັນມິດຕະພາບ ແລະ ການຮ່ວມມືທີ່ດີດັ່ງກ່າວໄດ້ຮັບການເສີມຂະຫຍາຍຢ່າງເປັນປົກກະຕິ.ໃນໂອກາດດຽວກັນນີ້, ສົມເດັດ ພະຣາຊາ ວິນເລັມ ອາເລັກຊານເດີ ກໍໄດ້ສະແດງຄວາມຂອບໃຈ ແລະ ສົ່ງຄໍາອວຍພອນຢື້ຢາມ ຖາມຂ່າວ ເຖິງ ພະນະທ່ານ ປະທານປະເທດ ແຫ່ງ ສປປ ລາວ ເຊັ່ນດຽວກັນ, ທັງໄດ້ສະແດງຄວາມຍິນດີຕ້ອນຮັບທ່ານທູດຄົນໃໝ່ ແລະ ອວຍພອນໃຫ້ທ່ານທູດ ຈົ່ງປະສົບຜົນສໍາເລັດໃນການປະຕິບັດໜ້າທີ່ການທູດທຸກປະການ.
ທ່ານທູດກໍໄດ້ສະແດງຄວາມຂອບໃຈ ຕໍ່ຄໍາອວຍພອນອັນຈົບງາມແລະ ຢືນຢັນວ່າ ຈະປະຕິບັດໜ້າທີ່ຂອງຕົນໃຫ້ດີທີ່ສຸດ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ຣາຊະອານາຈັກ ໂຮນລັງ ໃຫ້ນັບມື້ນັບດີຂຶ້ນ. 
ຂ່າວ-ພາບ: ກະຊວງການຕ່າງປະເທດ