ການພົບປະລະຫວ່າງ ທູດ ແລະ ອະດີດອາສາສະໝັກ JICA ຄັ້ງນີ້ມີຄວາມໝາຍສໍາຄັນ ຊຶ່ງຖືເປັນກິດຈະກໍາໜຶ່ງໃນການສະເຫຼີມສະຫຼອງ ຄົບຮອບ 70 ປີ ແຫ່ງ ການສ້າງຕັ້ງສາຍພົວພັນການທູດ ລະຫວ່າງສອງປະເທດ ແລະ ຄົບຮອບ 60 ປີ ທີ່ລັດຖະບານຍີ່ປຸ່ນໄດ້ສົ່ງອາສາສະໝັກມາປະຈໍາຢູ່ ສປປ ລາວ. ໃນໂອກາດນີ້, ທ່ານ ອໍາໄພ ກິນດາວົງ ໃນນາມຕາງໜ້າລັດຖະບານ ແລະ ປະຊາຊົນລາວ ໄດ້ສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງຕໍ່ການຊ່ວຍເຫຼືອອັນລໍ້າຄ່າຂອງລັດຖະບານ ແລະ ປະຊາຊົນຍີ່ປຸ່ນ ຊຶ່ງໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ລວມທັງບັນດາອາສາສະໝັກຍີ່ປຸ່ນ ທີ່ໄດ້ອຸທິດເຫື່ອແຮງ ແລະ ສະຕິປັນຍາໃນການຖ່າຍທອດບົດຮຽນດ້ານເຕັກນິກ-ວິຊາການ ອັນເປັນປະໂຫຍດໃຫ້ແກ່ ພະນັກງານ ແລະ ປະຊາຊົນລາວ.
ໃນໂອກາດດັ່ງກ່າວ, ທ່ານ ONISHI Norio ໄດ້ສະແດງຄວາມຂອບໃຈຕໍ່ທ່ານທູດທີ່ໄດ້ໃຫ້ການຕ້ອນຮັບຢ່າງອົບອຸ່ນ ຢູ່ ສະຖານທູດ ແລະ ໄດ້ເລົ່າເຖິງແຮງບັນດານໃຈຂອງຕົນທີ່ສະໝັກເປັນອາສາສະໝັກ JICA ມາຊ່ວຍປະເທດລາວຍ້ອນຊີວິດຕອນນ້ອຍໄດ້ເຮັດນາ ແລະ ຖາງປ່າເພື່ອຂະຫຍາຍທີ່ຢູ່ອາໄສຢູ່ ແຂວງ Hokkaido. ດັ່ງນັ້ນ, ເຫັນວ່າປະເທດມີປະໂຫຍດຕໍ່ຕົນ, ຕົນເອງຈຶ່ງຕ້ອງເຮັດປະໂຫຍດຕໍ່ປະເທດ. ພ້ອມນີ້, ຍີ່ປຸ່ນເປັນປະເທດທີ່ພັດທະນາແລ້ວຈຶ່ງມີແຮງບັນດານໃຈຢາກໄປຊ່ວຍເຫຼືອປະເທດອື່ນ ແລະ ເມື່ອໄດ້ຍິນວ່າ ອົງການ JICA ປະກາດຮັບອາສາສະໝັກໄປຊ່ວຍເຫຼືອຕ່າງປະເທດ ຈຶ່ງໄດ້ສະໝັກທັນທີ, ພ້ອມທັງຕ້ອງໄດ້ຜ່ານເງື່ອນໄຂ ແລະ ການສອບເສັງຄັດເລືອກຈາກອົງການ JICA. ໃນເວລານັ້ນ, ຕົນເອງມີຄວາມຮູ້ ແລະ ປະສົບການໃນການປູກເຂົ້າມາແຕ່ນ້ອຍຈຶ່ງແທດເໝາະກັບຄວາມຕ້ອງການຊ່ວຍເຫຼືອດ້ານການປູກເຂົ້າຂອງປະເທດລາວ ແລະ ໄດ້ຖືກສົ່ງມາປະຈໍາຢູ່ ສູນແນວພັນເຂົ້າ ບ້ານສາລາຄໍາ ເມືອງຫາດຊາຍຟອງ ນະຄອນຫຼວງວຽງຈັນ. ການມາປະຕິບັດໜ້າທີ່ຢູ່ປະເທດລາວ ໃນໄລຍະ 1965-1968 ມີທັງຂໍ້ສະດວກ ແລະ ຂໍ້ຫຍຸ້ງຍາກ ເປັນຕົ້ນແມ່ນບໍ່ໄດ້ຮຽນພາສາລາວກ່ອນມາເຮັດວຽກຢູ່ປະເທດລາວ, ໄດ້ຮຽນແຕ່ພາສາຝຣັ່ງໜ້ອຍໜຶ່ງຈຶ່ງມີຄວາມຫຍຸ້ງຍາກໃນການສື່ສານ, ການໄປ-ມາກໍຍັງບໍ່ທັນສະດວກ, ຂາດເຂີນອຸປະກອນ, ອາຫານ ແລະ ໄຟຟ້າບໍ່ພຽງພໍ, ແຕ່ກໍຮູ້ສຶກປະທັບໃຈຕໍ່ວັດທະນະທໍາ-ຮີດຄອງອັນດີງາມຂອງລາວ ແລະ ຈົດຈໍາບໍ່ລືມໃນຄວາມໃຈດີ ແລະ ເອື້ອເຟື້ອເຜື່ອແຜ່ຂອງປະຊາຊົນລາວໃນການຕ້ອນຮັບແຂກທີ່ມາຢ້ຽມຢາມເຮືອນຊານກໍຈະເຊື້ອເຊີນດື່ມນໍ້າ ແລະ ເຊີນຮັບປະທານອາຫານນໍາກັນ. ພາຍຫຼັງທີ່ເດີນທາງກັບຄືນຍີ່ປຸ່ນ, ຕົນເອງກໍບໍ່ມີໂອກາດໄດ້ກັບມາຢ້ຽມຢາມ ສປປ ລາວ ຕື່ມອີກ ແລະ ຮູ້ສຶກເປັນກຽດທີ່ໄດ້ໄປຢ້ຽມຢາມ ແລະ ຮັບປະທານອາຫານຢູ່ ສະຖານທູດລາວ ຊຶ່ງເປັນຄັ້ງທໍາອິດ ແລະ ມີຄວາມປະທັບໃຈເປັນຢ່າງຍິ່ງທີ່ໄດ້ຮັບປະທານອາຫານລາວ ໃນຮອບ 60 ປີ ໂດຍສະເພາະແມ່ນ ເຂົ້າໜຽວ ແລະ ລາບ, ເຮັດໃຫ້ຕົນເອງຫວນຄືນ ແລະ ຄິດເຖິງປະເທດລາວ ຊຶ່ງຍັງຄິດວ່ານີ້ແມ່ນເຫດການຢູ່ໃນຄວາມຝັນບໍ ແລະ ການທີ່ມີໂອກາດມາເປັນອາສາສະໝັກຢູ່ ສປປ ລາວ ແມ່ນມີຄວາມໝາຍຢ່າງຍິ່ງຕໍ່ຊີວິດຂອງຕົນທີ່ໄດ້ສຸມທຸກເຫື່ອແຮງປະກອບສ່ວນຊ່ວຍແນະນໍາວິທີການປູກເຂົ້າໃຫ້ແກ່ປະຊາຊົນລາວ. ພາຍຫຼັງທີ່ກັບຈາກເປັນອາສາສະໝັກຢູ່ປະເທດລາວແລ້ວຍັງໄດ້ສືບຕໍ່ໄປເປັນອາສາສະໝັກຂອງ JICA ຢູ່ປະເທດເນປານ, ຕັງຊານີ, ເອທິໂອປີ ແລະ ໂປໂລຍ. ພາຍຫຼັງເປັນອາສາສະໝັກແລ້ວຍັງມາເປັນຜູ້ຊ່ວຍໃນການໂຄສະນາປະກາດຮັບອາສາສະໝັກ JICA ໂດຍສະເພາະ ເປັນຜູ້ຊ່ວຍອະທິຍາຍ, ຈັດການສອບເສັງ ແລະ ຝຶກອົບຮົມ.
ພ້ອມດຽວກັນນີ້, ທ່ານ TAKAHATA Tsuneo ອະດີດອະສາສະໝັກ JICA ກໍໄດ້ເລົ່າເຖິງປະສົບປະການຂອງຕົນໃນການເປັນອາສາສະໝັກຮັບຜິດຊອບດ້ານເຄື່ອງກົນຈັກກະສິກໍາ ຢູ່ ບ້ານທ່າງອນ ນະຄອນຫຼວງວຽງຈັນ ໃນປີ 1970, ຄວາມມັກໃນວັດທະນະທໍາປະເທດລາວ ແລະ ການກັບຄືນມາປະຕິບັດໜ້າທີ່ເປັນຫົວໜ້າຫ້ອງການຜູ້ຕາງໜ້າອົງການ JICA ປະຈໍາ ສປປ ລາວ ຜູ້ທໍາອິດໃນປີ 1996.
ປະເທດລາວເປັນປະເທດທໍາອິດທີ່ລັດຖະບານຍີ່ປຸ່ນສົ່ງອາສາສະໝັກ JICA ມາປະຕິບັດໜ້າທີ່ຢູ່ ສປປ ລາວ ໃນວັນທີ 24 ທັນວາ 1965 ແລະ ຕໍ່ມາໃນປີ 1966 ລັດຖະບານຍີ່ປຸ່ນຈຶ່ງໄດ້ສົ່ງອາສາສະໝັກໄປປະເທດກໍາປູເຈຍ, ຟີລິບປິນ, ມາເລເຊຍ, ແລະ ເຄນຢາ. ອາສາສະໝັກ JICA ຊຸດທໍາອິດທີ່ສົ່ງມາປະເທດລາວມີທັງໝົດ 5 ທ່ານ ຍິງ 2 ທ່ານ ແລະ ປັດຈຸບັນຍັງມີຊີວິດຢູ່ 2 ທ່ານ ຄື: ທ່ານ ONISHI Norio ອາໄສຢູ່ ນະຄອນຫຼວງໂຕກຽວ ແລະ ທ່ານ ນາງ TAKESHITA Setsuko ອາໄສຢູ່ ແຂວງ Ishikawa, ຍີ່ປຸ່ນ. ນັບແຕ່ປີ 1965 ຈົນຮອດປັດຈຸບັນ ມີອາສາສະໝັກ JICA ມາປະຕິບັດໜ້າທີ່ຢູ່ ສປປ ລາວ ຈໍານວນ 1,098 ທ່ານ ຊຶ່ງໃນນີ້ມີ 41 ທ່ານ ກໍາລັງປະຕິບັດໜ້າທີ່ຢູ່ ສປປ ລາວ.
ຂ່າວ: ກະຊວງການຕ່າງປະເທດ
ຄໍາເຫັນ