 |
ໃນນັ້ນ, ໂຄງການທຶນຕ່າງປະເທດ 20 ໂຄງການມູນຄ່າການລົງທຶນທັງໝົດ 2 ຕື້ 560 ລ້ານໂດລາ. ນອກນີ້, ກອງປະຊຸມຄັ້ງນີ້ຍັງໄດ້ປະສົບຜົນສຳເລັດ “ຄັ້ງທຳອິດ” ຫຼາຍຢ່າງເຊັ່ນ: ຈັດກິດຈະກຳລົດພະລັງງານໃໝ່, ການສະສົມພະລັງງານແບບໃໝ່, ກະສິກຳອັດສະລິຍະແລະ ກິດຈະກຳໃນຫົວຂໍ້ອື່ນໆເປັນຄັ້ງທຳອິດ, ຈັດກອງປະຊຸມນະໂຍບາຍແບບປິດປະຕູເປັນຄັ້ງທຳອິດທີ່ສຸມໃສ່ການຂະຫຍາຍ ແລະ ເປີດກວ້າງຂະແໜງການບໍລິການ ເພື່ອຕອບສະໜອງກັບຄວາມຕ້ອງການວິສາຫະກິດຢ່າງມີປະສິດທິພາບສູງ ແລະ ອື່ນໆ.
ຄຳສັບທີ່ຜູ້ບໍລິຫານຂັ້ນສູງຂອງບໍລິສັດຂ້າມຊາດກ່າວເຖິງຫຼາຍກວ່າໝູ່ໃນກອງປະຊຸມດັ່ງກ່າວແມ່ນ “ການປະດິດສ້າງຮ່ວມກັນ” ຊຶ່ງໄດ້ສະແດງໃຫ້ເຫັນເຖິງການຜັນແປຢ່າງເລິກເຊິ່ງຂອງການພົວພັນລະຫວ່າງທຶນຕ່າງປະເທດກັບຈີນ ນັ້ນກໍຄືຈາກການຈຳໜ່າຍ ແລະ ຜະລິດໃນເບື້ອງຕົ້ນກ້າວເຂົ້າສູ່ໄລຍະໃໝ່ແຫ່ງການປະສານງານກັນປະດິດສ້າງໃໝ່ ແລະ ຮ່ວມກັນສ້າງລະບົບນິເວດ.
“ການປະດິດສ້າງຮ່ວມກັນ” ເລີ່ມຕົ້ນດ້ວຍການຊອກຄົ້ນຫາໂອກາດໃໝ່. ຕະຫຼາດຂອງຈີນທີ່ມີຂະໜາດໃຫຍ່ພິເສດ ແລະ ຍົກລະດັບຂຶ້ນຢ່າງບໍ່ຢຸດຢັ້ງ ໄດ້ສ້າງພື້ນທີ່ອັນກວ້າງຂວາງໃຫ້ແກ່ທຶນຕ່າງປະເທດເພື່ອຄົ້ນຫາໂອກາດໃໝ່. ຂະນະດຽວກັນ, ການຍົກລະດັບຄວາມສາມາດດ້ານການປະດິດສ້າງໃໝ່ຂອງຈີນ ໄດ້ເພີ່ມພະລັງຂັບເຄື່ອນໃຫ້ແກ່ການປະດິດສ້າງຮ່ວມກັນຢ່າງເລິກເຊິ່ງ. ບົດລາຍງານທີ່ເຜີຍແຜ່ໃນກອງປະຊຸມຄັ້ງນີ້ສະແດງໃຫ້ເຫັນວ່າ: ຈີນໄດ້ກາຍເປັນຕະຫຼາດການປະຍຸກໃຊ້ທີ່ໃຫຍ່ກວ່າໝູ່, ລະບົບນິເວດອຸດສາຫະກຳທີ່ຄົບຖ້ວນກວ່າໝູ່ ແລະ ສະຖານະການການປະດິດສ້າງໃໝ່ທີ່ອຸດົມສົມບູນກວ່າໝູ່ໃນໂລກ, ພະລັງການດຶງດູດຂອງຈີນໃນທົ່ວໂລກໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ. ເມື່ອເບິ່ງໃນໄລຍະຍາວ, ການເປີດປະຕູສູ່ພາຍນອກນັບມື້ນັບກວ້າງອອກຂອງຈີນ ໄດ້ສ້າງຄາດໝາຍດ້ານນະໂຍບາຍທີ່ໝັ້ນທ່ຽງໃຫ້ແກ່ວິສາຫະກິດຕ່າງປະເທດເພື່ອຕັ້ງຮາກຖານ ກໍຄືພັດທະນາຢູ່ຈີນ. ຈີນບໍ່ພຽງແຕ່ແມ່ນເຄື່ອງຈັກທີ່ສ້າງຄວາມໝັ້ນທ່ຽງໃຫ້ແກ່ເສດຖະກິດໂລກເທົ່ານັ້ນ, ຍັງແມ່ນສະຖານທີ່ທີ່ຕ້ອງເລືອກສຳລັບການວາງແຜນຍຸດທະສາດໃນອະນາຄົດອີກດ້ວຍ.
ຈາກ “ເຂົ້າສູ່ຈີນ” ຮອດ “ຝັງຮາກຖານຢູ່ຈີນ” ຈົນຮອດ “ປະດິດສ້າງຮ່ວມກັບຈີນ”, ການພັດທະນາຂອງວິສາຫະກິດຂ້າມຊາດຢູ່ຈີນທຸກບາດກ້າວ ລ້ວນແຕ່ສອດຄ່ອງກັບການພັດທະນາເສດຖະກິດຂອງຈີນ. ຍ້ອນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 15 ຂອງຈີນ, ວິສາຫະກິດຂ້າມຊາດຈະໄດ້ຮັບໂອກາດຫຼາຍກວ່າເກົ່າ ແລະ ມີຄວາມຮູ້ສຶກຢ່າງເລິກເຊິ່ງກວ່າເກົ່າວ່າ: “ເຊື່ອໝັ້ນປະເທດຈີນກໍຄືເຊື່ອໝັ້ນອະນາຄົດ, ລົງທຶນຢູ່ຈີນກໍຄືລົງທຶນເພື່ອອະນາຄົດ”.
ຄໍາເຫັນ