ຖືວຽກງານກະສິກໍາເປັນສໍາຄັນ ຄໍ້າປະກັນສະບຽງອາຫານ

ທ່ານ ນາງ ສອນທິດາ ອຸນາພົມ ປະທານບໍລິສັດພັດທະນາແຫຼ່ງທ່ອງທ່ຽວນໍ້າຕົກຕາດເຢືອງຫຼັກ 40 ເມືອງປາກຊ່ອງ ແຂວງຈໍາປາສັກ ແລະ ແຫຼ່ງທ່ອງທ່ຽວນໍ້າຕົກຕາດເລາະ-ຕາດຮັງ ແຂວງສາລະວັນ ໄດ້ເລົ່າຕໍ່ຜູ້ຂຽນຟັງ ວ່າ: ຄຽງຄູ່ກັບວຽກງານທ່ອງທ່ຽວແລ້ວ ຍັງໄດ້ແນະນໍາປະຊາຊົນປູກຝັງ-ລ້ຽງສັດ ເພື່ອ ຄໍ້າສະບຽງອາຫານພາຍໃນຄອບຄົວ ແລະ ຂາຍສົ່ງອອກພາຍໃນແຂວງ ຮັບປະກັນແກ່ນັກທ່ອງທ່ຽວ ໂດຍໄດ້ສົ່ງເສີມກຸ່ມລ້ຽງ ເມືອງລະຄອນເພັງ ຊຶ່ງໄດ້ມອບຕູ້ຟັກໄຂ່, ແນວພັນໄກ່, ຊຸກຍູ້ສົ່ງເສີມເຕັກນິກວິຊາການ, ສົ່ງເສີມການຂາຍ ເພື່ອເຮັດໃຫ້ບ້ານມີກອງທຶນ, ມາເຖິງປັດຈຸບັນ ຄອບຄົວທີ່ລ້ຽງໄກ່ ກໍບໍ່ໄດ້ຖືກເອົາປຽບ, ແຕ່ລະຄອບຄົວພາກັນລ້ຽງ ເວລາຕ້ອງການເງິນ ແມ່ນຂາຍອອກ. ມາເຖິງປັດຈຸບັນ ການຊື້-ຂາຍ ແມ່ນເປັນລະບົບດີ ແລະ ມີທຶນໝູນວຽນໃຫ້ຜູ້ປະກອບການ, ເພື່ອກູ້ຢືມນໍາໄປຊື້ວັກຊິນ ຮັກສາສຸຂະພາບໄກ່ ໃນນັ້ນ ກໍແມ່ນໜຶ່ງວຽກງານ ເຮັດໃຫ້ຂະບວນການຜະລິດປີ້ງໄກ່ນາປົ່ງ ສາມາດຂັບເຄື່ອນໄປໄດ້ດ້ວຍຄວາມດຸ່ນດ່ຽງ.

ກ່ອນໜ້ານີ້ ທີ່ຍັງບໍ່ທັນມີຟາມໄກ່ ແລະ ພາຍຫຼັງທີ່ໄດ້ເຂົ້າໄປສົ່ງເສີມທຸລະກິດພາຍໃນບ້ານ, ເມືອງ ທີ່ລົງຊຸກຍູ້ ມີຫຼາຍຈຸດ ຊຶ່ງໃນຕໍ່ໜ້າ ຈະບໍ່ໄດ້ສັ່ງຊື້ໄກ່ຈາກຕ່າງປະເທດເຂົ້າມາບໍລິໂພກ. ສະເພາະ ບ້ານນາປົ່ງ ເມືອງຄົງເຊໂດນ ແຂວງສາລະວັນ ເອົາໄກ່ໃນພື້ນທີ່ ແລະ ຂາຍກັບທີ່ ເງິນຕາຈຶ່ງບໍ່ຮົ່ວໄຫຼ ແລະ ຈະຊຸກຍູ້ສົ່ງເສີມເມືອງ ເພື່ອວາງແຜນ ເມືອງຄົງເຊໂດນເຮັດວຽກງານປຸງແຕ່ງຂາຍ, ເມືອງລະຄອນເພັງເພາະພັນໄກ່, ແນວພັນ ແມ່ນນໍາມາຈາກເມືອງຕຸ້ມລານ ເພາະວ່າ ເມືອງຕຸ້ມລານ ແມ່ນເມືອງທີ່ມີພໍ່, ແມ່ພັນໄກ່ທີ່ອອກລູກຫຼາຍ, ຊີ້ນໄກ່ແຊບ-ຫອມ, ສ່ວນເມືອງເລົ່າງາມ ຜະລິດຫົວອາຫານ ສະໜອງໃຫ້ບັນດາເມືອງທີ່ລ້ຽງໄກ່ ຄື: ເມືອງວາປີ, ສ່ວນເມືອງສາລະວັນ ກໍຈະຮ່ວມມືລ້ຽງຕື່ມ, ເມືອງຕະໂອ້ຍ, ເມືອງສະໝ້ວຍ, ມາເຖິງປັດຈຸບັນ ມີຈໍານວນ 6 ເມືອງ ທີ່ເຂົ້າຮ່ວມໃນວຽກງານລ້ຽງໄກ່ລາດ ສະໜອງວຽກງານບໍລິການແຂກທີ່ເຂົ້າມາທ່ຽວຊົມ ຊຶ່ງມາເຖິງປັດຈຸບັນ ເວົ້າໄດ້ວ່າ ວຽກງານສົ່ງເສີມການລ້ຽງໄກ່ລາດຢ່າງກວ້າງຂວາງຫຼາຍ ຊຶ່ງບໍ່ລວມການຂາຍທາງອອນລາຍ, ແຕ່ລະຮ້ານໄດ້ຮັບການສັ່ງຈອງ-ສົ່ງໄກ່ປີ້ງດິບ ສົ່ງອອກໄປນະຄອນຫຼວງວຽງຈັນ ແລະ ແຂວງອື່ນໆ, ໄດ້ລະດົມການຊ່ວຍເຫຼືອຕູ້ເກັບຄວາມເຢັນ ຈາກກົງສູນໄທທີ 2 ແຂວງສະຫວັນນະເຂດ ພ້ອມທັງເອົາເຕັກນິກວິຊາການມາຊ່ວຍປະຊາຊົນ, ໄກ່ປີ້ງນາປົ່ງ ມີມາດ ຕະຖານສົ່ງໄປທົ່ວປະເທດ.

ປັດຈຸບັນ ມີຄວາມພ້ອມສົ່ງເສີມປະຊາຊົນແຂວງສາລະວັນທຸກຄອບຄົວລ້ຽງໄກ່ລາດ, ໃນແຜນຕໍ່ໜ້າ ຈະສ້າງໃຫ້ມີກິດຈະກໍາການທ່ອງທ່ຽວຄົບວົງຈອນການລ້ຽງໄກ່ ນັບແຕ່ຂັ້ນຕອນການລ້ຽງ, ຄົວ, ປຸງແຕ່ງ, ຂາຍ, ແນວພັນ ແລະ ອື່ນໆ ແບບຕ່ອງໂສ້, ພ້ອມນັ້ນບໍລິສັດ ຍັງຈະໄດ້ໄປເປີດຮ້ານອາຫານທີ່ຕ່າງປະເທດ ໂດຍສະເພາະ ມົສກູ ຣັດເຊຍ, ສປ ຈີນ, ກໍາປູເຈຍ ເພື່ອເປັນການໂຄສະນາເລື່ອງອາຫານ, ການກິນຂອງລາວ ແລະ ຈະນໍາເອົາປານໍ້າຂອງນໍາໄປປຸງແຕ່ງ ເປັນເອກະລັກ ແລະ ຫວັງຢ່າງຍິ່ງວ່າ ບັນດາທ່ານແຂກທີ່ໄດ້ກິນອາຫານລາວແລ້ວ ຄິດຢາກຈະມາທ່ອງທ່ຽວຖິ່ນກໍາເນີດວັດຖຸດິບຂອງອາຫານລາວຕື່ມອີກ ຊຶ່ງບໍ່ພຽງແຕ່ອາຫານພາກໃຕ້ຂອງລາວເທົ່ານັ້ນ ແຕ່ຍັງຈະນໍາເອົາອາຫານ ພ້ອມການປຸງແຕ່ງຂອງທຸກໆພາກ ນໍາສະເໜີໃນຮ້ານອາຫານ ທີ່ຕ່າງປະເທດ ແລະ ໃນຕອນທ້າຍ ທ່ານນາງ ສອນທິດາ ອຸນາພົມ ຍັງໄດ້ກ່າວວ່າ: ເວລາໃດ ການເຮັດທຸລະກິດຂອງພວກຂ້າພະເຈົ້າ ຍັງໄດ້ຮັບການຊຸກຍູ້, ສົ່ງເສີມ ແລະ ອໍານວຍຄວາມສະດວກຈາກພາກລັດຕະຫຼອດມາ ນັບແຕ່ຂັ້ນສູນກາງ ຈົນຮອດຂັ້ນທ້ອງຖິ່ນ, ພໍ່, ແມ່, ປະຊາຊົນ ກໍປຽບສະເໝືອນໝາກຫົວໃຈອັນດຽວ, ເມື່ອຍາມວິກິດ ກໍໄດ້ຮັບຄວາມເອື້ອອໍານວຍ, ຝາກເຖິງຂະແໜງການທີ່ກ່ຽວຂ້ອງ ລົງຊຸກຍູ້ ໄປຕາມແລວທາງຢ່າງແຂງແຮງຂຶ້ນກວ່າເກົ່າ ບໍ່ສະເພາະແຕ່ແຂວງສາລະວັນເທົ່ານັ້ນ ໃຫ້ຂະຫຍາຍໄປສູ່ແຂວງອື່ນໆໃນຂອບເຂດທົ່ວປະເທດຕື່ມອີກ.

 ດັ່ງນັ້ນ, ປະຊາຊົນລາວທຸກຄົນ ຈົ່ງເອົາໃຈໃສ່ ໃນການປູກຝັງ-ລ້ຽງສັດ ໃຫ້ຫຼາຍໆ ຖ້າເຫຼືອກິນ ກໍສົ່ງອອກຂາຍ ສ້າງລາຍຮັບເຂົ້າສູ່ຄອບຄົວໃຫ້ນັບມື້ຫຼາຍເປັນທະວີຄູນ ເພື່ອປະກອບສ່ວນເຂົ້າໃນການພັດ ທະນາເສດຖະກິດ-ສັງຄົມພາຍໃນປະເທດໃຫ້ເຂັ້ມແຂງ.