ຕົວແທນຈໍາໜ່າຍແລະທົດລອງນຳໃຊ້ປຸ໋ຍກາຫົວຄວາຍທີ່ແຂວງສະຫວັນນະເຂດ

ບໍລິສັດ ໄພບູນ ການຄ້າ ຂາອອກ-ຂາເຂົ້າ ຈຳກັດໄດ້ສົມທົບກັບ ບໍລິສັດ ຫຸ້ນສ່ວນ ປຸ໋ຍບິ່ງດ່ຽນ ໄດ້ເປີດພິທີເຊັນສັນຍາແຕ່ງຕັ້ງຕົວແທນຈໍ່າໜ່າຍ ປຸ໋ຍກາຫົວຄວາຍ ຢູ່ ສປປ ລາວຂຶ້ນ ໃນວັນທີ 24 ຕຸລານີ້, ທີ່ເມືອງອຸທຸມພອນ, ແຂວງສະຫວັນນະເຂດ. ໃຫ້ກຽດເຂົ້າຮ່ວມໂດຍ ທ່ານ ທອງໃສ ໄຊຍະວົງຄຳດີ ເຈົ້າເມືອງອຸທຸມພອນ, ທ່ານ ໂງ ວັນດົງ ຜູ້ອຳນວຍການໃຫຍ່ບໍລິສັດ ປຸ໋ຍບິ່ງດ່ຽນ, ທ່ານ ບຸນທອງ ພົມມະຈັນ ຫົວໜ້າຄະນະໂຄສະນາອົບຮົມ ໜ່ວຍພັກກຸ່ມບໍລິສັດພົງສະຫວັນ, ທ່ານ ນາງ ອຸໄລວັນ ຜູ້ອຳນວຍການ ໄພບູນ ການຄ້າ ຂາອອກ-ຂາເຂົ້າ ຈຳກັດ, ຕາງໜ້າ ກະຊວງກະສິກຳ ແລະ ປ່າໄມ້, ຕາງໜ້າ ສະພາແຫ່ງຊາດ, ຕາງໜ້າ ແລະ ພະແນກການອ້ອມຂ້າງແຂວງສະຫວັນນະເຂດ ແລະ ພາກສ່ວນກ່ຽວຂ້ອງເຂົ້າຢ່າງພ້ອມພຽງ; ຈຸດປະສົງແມ່ນ ເພື່ອໂຄສະນາເຜີຍແຜ່ຜົນໄດ້ຮັບ ຂອງການນຳໃຊ້ປຸ໋ຍກາຫົວຄວາຍ ໃຫ້ວິຊາການ ແລະ ຊາວກະສິກອນໄດ້ຮັບຊາບ ແລະ ເຫັນຕົວຈິງ ໝາກຜົນຂອງການໃສ່ປຸ໋ຍກາຫົວຄວາຍໃນທົ່ງນາທຽບໃສ່ການຜະລິດທົ່ວໄປ ໃນເຂດອ້ອມຂ້າງ ແລະ ຊ່ວຍຊາວກະສິກອນໃຫ້ເຂົ້າເຖິງເຕັກໂນໂລຊີ ປຸ໋ຍກາຫົວຄວາຍ ທີ່ຜະລິດໂດຍ ບໍລິສັດ ຫຸ້ນສ່ວນ ປຸ໋ຍ ບິງດ່ຽນ ຊຶ່ງແມ່ນປຸ໋ຍທີ່ຄອງຕະຫຼາດອັນດັບໜຶ່ງ ແລະ ໄດ້ຮັບໂລ້ກຽດຕິຍົດ ຫຼາຍປີຊ້ອນ ຂອງ ສສ ຫວຽດນາມ. ໃນງານດັ່ງກ່າວ ຜູ້ເຂົ້າຮ່ວມໄດ້ ລົງຢ້ຽມຊົມນາຕົວແບບການນໍາໃຊ້ປຸ໋ຍກາຫົວຄວາຍ ຂອງຄອບຄົວ ທ່ານ ທອງເຄືອ ຊາວນາບ້ານນາຫົວຂົວ, ຊຶ່ງເປັນຕົວແທນ ຂອງຊາວນາເຂົ້າຮ່ວມໂຄງການ ໄດ້ລາຍງານກ່ຽວກັບການທົດລອງສ້າງຕົວແບບການໍາໃຊ້ຝຸ່ນກາຫົວຄວາຍ.ໃນພິທີດັ່ງກ່າວທ່ານບຸນທອງພົມມະຈັນຫົວໜ້າຄະນະໂຄສະນາອົບຮົມໜ່ວຍພັກກຸ່ມບໍລິສັດພົງສະຫວັນ, ຄະນະຊີ້ນໍາກອງທຶນສາມັກຄີສນຊ ຕາງໜ້າໃຫ້ບໍລິສັດໄພບູນການຄ້າຂາອອກ-ຂາເຂົ້າຈຳກັດໄດ້ຂຶ້ນລາຍງານສະຫຼຸບການຈັດຕັ້ງປະຕິບັດສາທິດທົດລອງການນໍາໃຊ້ປຸ໋ຍກາຫົວຄວຍໃສ່ນາເຂົ້າ,ຜູ້ອຳນວຍການໃຫຍ່ບໍລິສັດຫຸ້ນສ່ວນປຸ໋ຍບິງດ່ຽນຈໍາກັດ ໄດ້ຂຶ້ນມີຄຳເຫັນກ່ຽວການຮ່ວມມືກັບບໍລິສັດໄພບູນການຄ້າຂາອອກ-ຂາເຂົ້າຈຳກັດ, ການຜະລິດ ແລະ ຈໍາໜ່າຍປຸ໋ຍກາຫົວຄວາຍໃນພາກພື້ນອາຊີຕາເວັນອອກສ່ຽງໃຕ້, ຜະລິດຕະພັນປຸ໋ຍກາຫົວຄວາຍ, ໃນນັ້ນຍັງມີການຖາມ-ຕອບບັນຫາ ແລະ ການປະກອບຄຳເຫັນຂອງຫຼາຍພາກສ່ວນເຊັ່ນ: ພະນແນກກະສິກຳແລະ ປ່າໄມ້ແຂວງ, ບໍລິສັດສະຫວັນສົ່ງເສີມການຜະລິດກະສິກຳເປັນສິນຄ້າ, ນອກຈາກນັ້ນ ກໍໄດ້ລົງຢ້ຽມຢາມນານຳໃຊ້ປຸ໋ຍກາຫົວຄວາຍ ຂອງ ທ່ານ ທອງເຄືອ, ຮັບຊົມວິດີໂອ, ຮູບພາບການເຄື່ອນໄຫວເຮັດນາຕົວແບບການນຳໃຊ້ຝຸ່ນກາຫົວຄວາຍ ແລະ ມີການວາງສະແດງຕົວຢ່າງສູດປຸ໋ຍກາຫົວຄວາຍຂອງບໍລິສັດຫຸ້ນສ່ວນປຸ໋ຍບິງດ່ຽນຈຳກັດ.
ທ່ານ ບຸນທອງ ພົມມະຈັນໄດ້ກ່າວວ່າ: ການສ້າງຕົວແບບທົດລອງນໍາໃຊ້ຝຸ່ນກາຫົວຄວາຍ ສໍາລັບການປູກເຂົ້າ ໃນລະດູນາປີ 2023 ໄດ້ດຳເນີນ ຢູ່ ບ້ານໂພນທອງ ເມືອງຈຳພອນ, ບ້ານ ຕົ້ນແຫນ ເມືອງໄຊບູລີ, ບ້ານນາຫົວຂົວ ແລະ ບ້ານອາຮົງ ເມືອງອຸທຸມພອນ ຊຶ່ງເປັນເຂດຊົນລະປະທານ ແລະ ນາໂນນ ນານໍ້າຝົນ ຕົວແທນໃຫ້ແກ່ທົ່ງພຽງອູ່ເຂົ້າອູ່ປາຂອງແຂວງສະຫວັນນະເຂດ. ການທົດລອງດັ່ງກ່າວໃຊ້ເນື້ອທີ່ທັງໝົດ 4,3 ເຮັກຕາ ຫຼື ປະມານ 1 ເຮັກຕາຕໍ່ຈຸດ, ໃຊ້ແນວພັນເຂົ້າໜຽວ 4 ແນວພັນ ເຊັ່ນ: ທ່າດອກຄຳ 8, ຫອມທ່າດອກຄຳນໍ້າຕານ ແລະ ທ່າສະໂນ 11 ແລະ ເຂົ້າຈ້າວຫອມສະຫວັນ ຊຶ່ງເປັນເຂົ້າພັນປັບປຸງທີ່ນິຍົມປູກຢ່າງກວ້າງຂວາງ ຂອງ ສປປ ລາວ ແລະ ມີຊາວນາເຂົ້າຮ່ວມ 7 ຄອບຄົວ. ສຳລັບ ຢູ່ເມືອງອຸທຸມພອນ ມີ 2ບ້ານຄື: ບ້ານນາຫົວຂົວ ແລະ ບ້ານອາຮົງ ມີຊາວກະສິກອນເຂົ້າຮ່ວມ 2 ຄອບຄົວ, ໃຊ້ເນື້ອທີ່ທັງມົດ 2 ເຮັກຕາ ຫຼື 1 ເຮັກຕາ/ບ້ານ, ໃຊ້ແນວພັນເຂົ້າຈ້າວຫອມສະຫວັນ ແລະ ເຂົ້າໜຽວທ່າສະໂນ 11 ຊຶ່ງເປັນແນວພັນເຂົ້າ ຂອງແຂວງສະຫວັນນະເຂດ ແລະ ນໍາໃຊ້ຢ່າງກວ້າງຂວາງຂອງຊາວກະສິກອນ. ຊຶ່ງການສ້າງຕົວແແບບດັ່ງກ່າວ ຊາວນາໄດ້ ສະມັກໃຈປະຕິບັດຕາມ ການແນະນຳທາງດ້ານເຕັກນິກ ຂອງບໍລິສັດ ແລະ ຝ່າຍບໍລິສັດ ໄດ້ໃຫ້ການສະໜັບສະໜູນດັ່ງນີ້: ບໍລິສັດ ຫຸ້ນສ່ວນ ປຸ໋ຍ ບິ່ງດ່ຽນ ສາຂາກວາງຈີ ໄດ້ສະໜອງຝຸ່ນເຄມີກາຫົວຄວາຍ ເພື່ອຮັບໃຊ້ການສ້າງຕົວແບບການນຳໃຊ້ ມີທັງ 39 ເປົາ, ນໍ້າໜັກ 1.950 ກິໂລ, ໃຫ້ 7 ຄອບຄົວທີ່ເຂົ້າຮ່ວມໂຄງການ. ສຳລັບ ເມືອງອຸທຸມພອນ ມີ 16 ເປົາ 800 ກິໂລ, ໃນນັ້ນ ມີຝຸ່ນເຄມີ ສູດ 19-12-6-8+ທາດອາຫານເສີມ ຈຳນວນ 12 ເປົາ ແລະ ສູດ 16-6-18+ທາດອາຫານເສີມ 4ເປົາ. ການນໍາໃຊ້ແມ່ນໄດ້ຄິດໄລຕາມເນື້ອທີ່ນາແຕ່ລະໄຮ່ ດ້ວຍອັດຕາຝຸ່ນປະມານ 400 ກິໂລ/ເຮັກຕາ (ໃສ່ຮອງພື້ນ 150 ກິໄລ/ເຮັກຕາ, ໃສ່ເລັ່ງຄັ້ງທີ 1 ຈຳນວນ 150 ກິໂລ ແລະ ເລັ່ງຄັ້ງທີ 2 ຈຳນວນ 100 ກິໂລ) ແລະ  ບໍລິສັດ ໄພບູນ ການຄ້າ ໄດ້ສະໜອງແນວພັນເຂົ້າ ທ່າດອກຄຳ 8 ໃຫ້ຊາວກະສິກອນ 120 ກິໂລ ຊຶ່ງທັງ 2 ຝ່າຍ ໄດ້ສົ່ງວິຊາການລົງສົມທົບ ແນະນໍາວິທີການໃສ່ຝຸ່ນໃຫ້ຊາວກະສິກອນ ແຕ່ລະຈຸດແມ່ນ 3 ຄັ້ງຄື: ໄລຍະໃສ່ຝຸ່ນຮອງພື້ນ ກ່ອນປັກດຳ ຫຼັງຄາດ, ໄລຍະປະມານ 25-35 ວັນຫຼັງປັກດຳ ແລະ ໄລຍະຈໍ່ຮວງ ແລະ ຕິດຕາມໃຫ້ຄໍາແນະນໍາ ນອກຈາກນັ້ນ ຫ້ອງການກະສິກໍາ ແລະ ປ່າໄມ້ ເມືອງ ໄຊບູລີ ແລະ ເມືອງຈຳພອນ ກໍໄດ້ແຕ່ງຕັ້ງວິຊາການປູກຝັງ ເມືອງລະ 2 ທ່ານ ລົງຕິດຕາມຊຸກຍູ້ ແລະ ເຂົ້າຮ່ວມໃສ່ຝຸ່ນຕາມແຜນວຽກ ຂອງການທົດລອງ. ສຳລັບເມືອງອຸທຸມພອນ ແມ່ນ ບໍລິສັດສະຫວັນສົ່ງເສີມການຜະລິດເປັນສິນຄ້າຈຳກັດເປັນຜູ້ລົງຕິດຕາມຊຸກຍູ້.ໃນວັນທີ 5-6 ຕຸລາ 2023 ຜ່ານມາ ໄດ້ຈັດພິທີສະຫຼຸບ ແລະ ຢ້ຽມຢາມ ນາຕົວແບບການນໍາໃຊ້ຝຸ່ນກາຫົວຄວາຍຢູ່ເມືອງ ຈຳພອນ ແລະ ເມືອງໄຊບູລີ ປັດຈຸບັນໄດ້ເກັບກ່ຽວສຳເລັດແລ້ວເຫັນວ່າ ເຂົ້າແຕ່ລະສາຍພັນ ມີການເຕີບໂຕແຂງແຮງດີ, ຂຽວງາມ, ແຕກກໍສູງ. ທຽບໃສ່ການຜະລິດຜ່ານມາ ແລະ ຊາວນາອ້ອມຂ້າງເຫັນວ່າໄດ້ຮັບຜົນຜະລິດສູງ ເມັດເຕັມບໍ່ລີບ ເມັດສວຍງາມກວ່າຫຼາຍ, ໄດ້ຜົນຜະລິດ ລື່ນປີຜ່ານມາ ປະມານ 600-900 ກິໂລ/ເຕັກຕາ. ສຳລັບເຂົ້າທ່າສະໂນ 11 ແລະເຂົ້າຈ້າວຫອມສະຫວັນ ຢູ່ ເມືອງອຸທຸມພອນ ກໍເຕີບໂຕແຂງແຮງ ແລະ ເມື່ອທຽບໃສ່ 2 ເມືອງຜ່ານມາເຫັນວ່າ ງາມຫຼາຍ, ຄອບຄົວຊາວນາປະເມີນເບື້ອງຕົນຈະໄດ້ເຂົ້າຫຼາຍກ່ວາປີຜ່ານມາ; ໃນພິທີເຊັນສັນຍາແຕ່ງຕັ້ງຕົວແທນຈໍ່າໜ່າຍປຸ໋ຍກາຫົວຄວາຍຢູ່ ສປປ ລາວຝ່າຍບໍລິສັດໄບູນການຄ້າຂາອອກ-ຂາເຂົ້າຈໍາກັດ ລົງນາມໂດຍ ທ່ານ ນາງ ອຸໄລວັນ ຜູ້ອຳນວຍການບໍລິສັດ, ຝ່າຍບໍລິສັດຫຸ້ສ່ວນປຸ໋ຍບິງດ່ຽນຈຳກັດ ລົງນາມໂດຍ ທ່ານ ດົງຫົງຫ໋ຽນ ຜູ້ອຳນວຍການບໍລິສັດຫຸ້ສ່ວນປຸ໋ຍບິງດ່ຽນຈຳກັດສາຂາກວາງຈີ. (ຂ່າວ-ພາບ:ພັດລໍວັນໄຊ)