ບົດລາຍງານສະຖານະການອາຄານ ແລະ ການກໍ່ສ້າງທົ່ວໂລກ ສະບັບທີ 10 ປະຈຳປີ 2025-2026 ຊຶ່ງເຜີຍແຜ່ໂດຍໂຄງການສິ່ງແວດລ້ອມສະຫະປະຊາຊາດ (UNEP) ແລະ ພັນທະມິດອາຄານ ແລະ ການກໍ່ສ້າງໂລກ (GlobalABC), ຮຽກຮ້ອງໃຫ້ເລັ່ງການຫຼຸດຜ່ອນການປ່ອຍກາກບອນໃນຂະແໜງການນີ້ ເພື່ອຫຼຸດຜ່ອນວິກິດການສະພາບດິນຟ້າອາກາດ ແລະ ປົກປ້ອງຊຸມຊົນຈາກຄວາມຜັນຜວນຂອງລາຄາພະລັງງານ.
ບົດລາຍງານດັ່ງກ່າວໄດ້ປະເມີນຂະແໜງການກໍ່ສ້າງຜ່ານຫຼາຍຕົວຊີ້ວັດສຳຄັນເຊັ່ນ: ນະໂຍບາຍ, ການເງິນ, ເຕັກໂນໂລຊີ ແລະ ການລົງທຶນທີ່ສອດຄ່ອງກັບຄວາມພະຍາຍາມ ເພື່ອບັນລຸເປົ້າໝາຍການປ່ອຍອາຍພິດເຮືອນແກ້ວສຸດທິເປັນສູນພາຍໃນປີ 2050, ທ່າມກາງວິກິດການທີ່ຢູ່ອາໄສ ແລະ ພະລັງງານທົ່ວໂລກ.
ທ່ານ ອິງເກີ ແອນເດີເຊນ ຜູ້ອຳນວຍການບໍລິຫານໂຄງການ UNEP ກ່າວວ່າ: ລັດຖະບານຂອງປະເທດຕ່າງໆມີໂອກາດທີ່ສຳຄັນໃນການຊຸກຍູ້ການກໍ່ສ້າງທີ່ມີການປ່ອຍອາຍພິດເປັນສູນຜ່ານນະໂຍບາຍ, ລະບຽບການ ແລະ ການລົງທຶນທີ່ດີຂຶ້ນ, ຍ້ອນວ່າອາຄານເຄິ່ງໜຶ່ງຂອງໂລກຍັງບໍ່ໄດ້ຖືກສ້າງຂຶ້ນ ຫຼື ປັບປຸງໃໝ່ພາຍໃນປີ 2050. ທ່ານຍັງໄດ້ຊີ້ໃຫ້ເຫັນວ່າ ຂະແໜງການກໍ່ສ້າງໃຊ້ຊັບພະຍາກອນທຳມະຊາດ ແລະ ວັດຖຸດິບທີ່ສະກັດອອກມາເກືອບເຄິ່ງໜຶ່ງຂອງໂລກ.
ບົດລາຍງານລະບຸຕື່ມວ່າ: ພາກສ່ວນອາຄານ ແລະ ການກໍ່ສ້າງກວມເອົາ 11-13% ຂອງ GDP ທົ່ວໂລກ ແລະ ມີພະນັກງານປະມານ 9% ຂອງກຳລັງແຮງງານຂອງໂລກ ຊຶ່ງກວມເອົາການກໍ່ສ້າງ, ການປັບປຸງ, ການຮື້ຖອນ ແລະ ວຽກງານວິສະວະກຳໂຍທາ.
ຄໍາເຫັນ