ບົດລາຍງານຊີ້ໃຫ້ເຫັນວ່າ: ເສດຖະກິດສະຫະລັດ ອາເມຣິກາ ຈະເຕີບໂຕ 2% ໃນປີ 2026 ຊຶ່ງສູງກວ່າ 1.9% ໃນປີ 2025 ເລັກນ້ອຍ, ດ້ວຍແຮງຂັບເຄື່ອນຈາກການຜ່ອນຄາຍທາງດ້ານການເງິນ ແລະ ງົບປະມານ. ເສດຖະກິດສະຫະພາບເອີຣົບ (EU) ຈະເຕີບໂຕ 1.3% ໃນປີ 2026, ຫຼຸດລົງຈາກ 1.5%ໃນປີ 2025 ເນື່ອງຈາກພາສີອາກອນຂອງສະຫະລັດ ອາເມຣິກາ ທີ່ສູງຂຶ້ນ ແລະ ຄວາມບໍ່ແນ່ນອນທາງພູມິສາດການເມືອງ.
ເສດຖະກິດຂອງລັດເອກກະລາດ ແລະ ຈໍເຈຍ ຄາດວ່າຈະເຕີບໂຕ 2.1% ໃນປີ 2026, ເກືອບບໍ່ປ່ຽນແປງຈາກປີ 2025, ເຖິງວ່າຈະມີຜົນກະທົບທາງເສດຖະກິດມະຫາພາກຢ່າງຕໍ່ເນື່ອງຈາກວິກິດການອູແກຣນ. ສ່ວນເສດຖະກິດອາຊີຕາເວັນອອກຄາດວ່າຈະເຕີບໂຕ 4.4% ໃນປີ 2026, ຫຼຸດລົງຈາກ 4.9% ໃນປີ 2025 ເນື່ອງຈາກການສົ່ງອອກເພື່ອກັກຕຸນສິນຄ້າລ່ວງໜ້າຫຼຸດລົງ. ໂດຍເສດຖະກິດຂອງຍີ່ປຸ່ນຄາດວ່າຈະເຕີບໂຕ 0.9% ໃນປີ 2026, ຫຼຸດລົງຈາກ 1.2% ໃນປີ 2025.
ເສດຖະກິດອາຊີໃຕ້ຄາດວ່າຈະເຕີບໂຕ 5.6% ໃນປີ 2026, ຫຼຸດລົງຈາກ 5.9% ໃນປີ 2025, ເສດຖະກິດອິນເດຍຈະຂະຫຍາຍຕົວ 6.6%. ສ່ວນເສດຖະກິດອາຊີຕາເວັນຕົກຈະເຕີບໂຕ 4.1% ໃນປີ 2026, ເພີ່ມຂຶ້ນຈາກ 3.4% ໃນປີ 2025. ໃນຂະນະດຽວກັນ, ເສດຖະກິດອາຟຣິກາທີ່ປະເຊີນກັບຄວາມສ່ຽງຈາກລະດັບໜີ້ສິນສູງ ແລະ ຜົນກະທົບຈາກສະພາບດິນຟ້າອາກາດຄາດວ່າຈະເຕີບໂຕ 4% ໃນປີ 2026, ເພີ່ມຂຶ້ນເລັກນ້ອຍຈາກ 3.9% ໃນປີ 2025.
ເສດຖະກິດອາເມຣິກາລາຕິນ ແລະ ແຄຣິບບຽນຄາດວ່າຈະເຕີບໂຕ 2.3% ໃນປີ 2026, ຫຼຸດລົງເລັກນ້ອຍຈາກ 2.4% ໃນປີ 2025, ໂດຍຄວາມຕ້ອງການຂອງຜູ້ບໍລິໂພກເພີ່ມຂຶ້ນໃນລະດັບປານກາງ ແລະ ການລົງທຶນຟື້ນຕົວເລັກນ້ອຍ.
ບົດລາຍງານລະບຸຕື່ມວ່າ: ການຄ້າໂລກມີຄວາມເຂັ້ມແຂງໃນປີ 2025, ໂດຍຂະຫຍາຍຕົວ 3.8%ຊຶ່ງໄວກວ່າທີ່ຄາດຄະເນໄວ້ກ່ອນໜ້ານີ້, ເຖິງວ່າຈະປະເຊີນກັບຄວາມບໍ່ແນ່ນອນດ້ານນະໂຍບາຍ ແລະ ພາສີທີ່ເພີ່ມຂຶ້ນ ຊຶ່ງການຂະຫຍາຍຕົວນີ້ແມ່ນໄດ້ຮັບແຮງຂັບເຄື່ອນຈາກການສະສົມສິນຄ້າທີ່ເພີ່ມຂຶ້ນໃນຕົ້ນປີ ແລະ ການເຕີບໂຕທີ່ເຂັ້ມແຂງໃນຂະແໜງການບໍລິການ. ຢ່າງໃດກໍຕາມ, ການຄ້າໂລກຄາດວ່າຈະຊ້າລົງເຫຼືອ 2.2% ໃນປີ 2026.
ຄໍາເຫັນ