ການສຶກສາໃໝ່ ທີ່ພິມໃນວາລະສານໂພຊະນາການ ໄດ້ສຳຫຼວດນັກສຶກສາ 317 ຄົນ ທີ່ມີອາຍຸສະເລ່ຍ 20 ປີ, ຈາກ 5 ມະຫາວິທະຍາໄລທົ່ວປະເທດອົສຕຣາລີ. ໂດຍຜູ້ເຂົ້າຮ່ວມໄດ້ຖືກແບ່ງອອກເປັນ 3 ກຸ່ມຄື: ກຸ່ມຜູ້ຫຼິ້ນເກມໜ້ອຍ (0-5 ຊົ່ວໂມງຕໍ່ອາທິດ), ກຸ່ມຜູ້ຫຼິ້ນເກມປານກາງ (5-10 ຊົ່ວໂມງຕໍ່ອາທິດ) ແລະ ກຸ່ມຜູ້ຫຼິ້ນເກມຫຼາຍ (ຫຼາຍກວ່າ 10 ຊົ່ວໂມງ).
ນັກຄົ້ນຄວ້າພົບວ່າ: ກຸ່ມຜູ້ຫຼິ້ນເກມໜ້ອຍ ແລະ ປານກາງ ມີລາຍງານຜົນໄດ້ຮັບດ້ານສຸຂະພາບທີ່ຄ້າຍຄືກັນ, ແຕ່ຜູ້ທີ່ຫຼິ້ນເກມຫຼາຍກວ່າ 10 ຊົ່ວໂມງຕໍ່ອາທິດມີຜົນໄດ້ຮັບດ້ານສຸຂະພາບທີ່ຮ້າຍແຮງກວ່າເກົ່າຢ່າງຫຼວງຫຼາຍ.
ທ່ານສາດສະດາຈານ ມາຣິໂອ ເຊຍໂວ ຈາກມະຫາວິທະຍາໄລ Curtin ກ່າວວ່າ: ການຄົ້ນພົບເຫຼົ່ານີ້ຊີ້ບອກວ່າບັນຫາຫຼັກແມ່ນຢູ່ໃນພຶດຕິກຳການຫຼິ້ນເກມຫຼາຍເກີນໄປ, ຫຼາຍກວ່າຕົວເກມເອງ. ໂດຍກຸ່ມນັກສຶກສາທີ່ຫຼິ້ນເກມໜ້ອຍກວ່າ 10 ຊົ່ວໂມງຕໍ່ອາທິດມີຮູບແບບການບໍລິໂພກອາຫານ, ການນອນຫຼັບ ແລະ ນ້ຳໜັກທີ່ຄ້າຍຄືກັນ, ແຕ່ຄວາມແຕກຕ່າງນັ້ນຈະເລີ່ມປະກົດໃຫ້ເຫັນຫຼັງຈາກຫຼິ້ນເປັນເວລາຫຼາຍກວ່າ 10 ຊົ່ວໂມງ.
ຜົນການສຶກສາດັ່ງກ່າວສະແດງໃຫ້ເຫັນວ່າ: ກຸ່ມນັກສຶກສາທີ່ຫຼິ້ນເກມຫຼາຍກວ່າ 10 ຊົ່ວໂມງຕໍ່ອາທິດມີຄຸນນະພາບການບໍລິໂພກອາຫານທີ່ບໍ່ດີ ແລະ ມີອັດຕາການເປັນໂຣກຕຸ້ຍສູງຂຶ້ນ. ໂດຍມີຄ່າດັດຊະນີມວນສານຮ່າງກາຍສະເລ່ຍ (BMI) ຢູ່ທີ່ 26.3 ເມື່ອທຽບກັບຜູ້ທີ່ຫຼິ້ນເກມໜ້ອຍລົງ ແລະ ປານກາງ ແມ່ນ 22.2 ແລະ 22.8 ຕາມລຳດັບ.
ນັກຄົ້ນຄວ້າກ່າວວ່າ: ຜູ້ເຂົ້າຮ່ວມທັງໝົດມີລາຍງານຄຸນນະພາບການນອນຫຼັບໂດຍລວມບໍ່ດີ, ແຕ່ຊົ່ວໂມງການຫຼິ້ນເກມທີ່ເພີ່ມຂຶ້ນຍັງກ່ຽວຂ້ອງກັບການລົບກວນການນອນຫຼັບອີກດ້ວຍ.
ທັງນີ້, ຜົນການສຶກສາຊີ້ໃຫ້ເຫັນວ່າການປັບພຶດຕິກຳສູ່ກິດຈະວັດທີ່ດີຕໍ່ສຸຂະພາບເຊັ່ນ: ການຈຳກັດການຫຼິ້ນເກມຈົນຮອດເວລາກາງຄືນ ແລະ ການເລືອກຮັບປະທານອາຫານວ່າງທີ່ມີປະໂຫຍດຕໍ່ສຸຂະພາບ ອາດຈະຊ່ວຍຫຼຸດຜ່ອນຄວາມສ່ຽງດ້ານສຸຂະພາບໄດ້.
ຄໍາເຫັນ