ທ່ານ ຄຳນ້ອງ ຮວງຊະນະໄຊ ຜູ້ອຳນວຍການບໍລິສັດລາວຣສູເທັກຄອມ ຈຳກັດ ໄດ້ສະແດງທັດສະນະຕໍ່ວັນສຳຄັນດັ່ງກ່າວວ່າ: ພາຍຫຼັງປະເທດຊາດໄດ້ຮັບການປົດປ່ອຍກ້າວ ເຂົ້າສູ່ພະລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເສດຖະກິດ - ສັງ ຄົມ ກໍໄດ້ຮັບການປັບປຸງດີຂຶ້ນເປັນກ້າວໆມາ ເພື່ອໃຫ້ຕອບສະໜອງກັບຄວາມຮຽກຮ້ອງຕ້ອງການຂອງສະພາບການໃນໄລຍະໃໝ່ ໂດຍສະເພາະແມ່ນການຈັດຕັ້ງປະຕິບັດໜ້າທີ່ການເມືອງຂອງຕົນ ໃນການພັດທະນາເສດຖະກິດ ໃຫ້ໄດ້ຮັບຜົນສຳເລັດຕາມຄາດໝາຍຕາມວາລະເສດຖະກິດຂອງຊາດ.
ໄປຄຽງຄູ່ກັບການພັດທະນາເສດຖະກິດຂອງຊາດ, ບໍລິສັດລາວຣສູເທັກຄອມ ກໍໄດ້ດຳເນີນກິດຈະການຕາມເເຜນການມອບໝາຍຂອງຂັ້ນເທິງ ເປັນຕົ້ນແມ່ນສ້າງຄວາມໜັ້ນຄົງທາງດ້ານພະລັງງານ, ຄຸ້ມຄອງຄວາມປອດໄພທາງໄຊເບີ ແລະ ຂົງເຂດວຽກງານແຮ່ທາດ ຊຶ່ງບໍລິສັດໄດ້ສຸມໃສ່ຮ່ວມມືກັບເພື່ອນມິດຍຸດທະສາດ ດ້ານການຂຸດຄົ້ນແຮ່ທາດຕ່າງໆ.
ໃນໂອກາດຂໍ່ານັບຮັບຕ້ອນບັນດາວັນສຳຄັນປະຫວັດສາດສຳຄັນຕ່າງໆຂອງພັກ, ຂອງຊາດ ບໍລິສັດ ຍັງໄດ້ປະກອບສ່ວນຊຸກຍູ້ວັດຖຸປັດໄຈ ເຂົ້າໃນການເຄື່ອນໄຫວວຽກງານດ້ານຕ່າງໆ ຂອງກະຊວງປ້ອງກັນປະເທດ ແລະ ຈະສືບຕໍ່ໃຫ້ການສະໜັບສະໜູນ ວຽກງານດ້ານຕ່າງຂອງກອງທັບ ໃຫ້ຟົດຟື້ນຕໍ່ເນື່ອງ.
ໃນໂອກາດວັນຊາດທີ 2 ທັນວາ ຄົບຮອບ 50 ປີ ທີ່ຈະມາເຖິງນີ້, ທ່ານ ຄຳນ້ອງ ຮວງຊະນະໄຊ ໄດ້ຕາງໜ້າໃຫ້ຄະນະອຳນວຍການ, ພະນັກງານທົ່ວບໍລິສັດລາວຣູສເທັກຄອມຈຳກັດ ສະແດງຄວາມຮູ້ບຸນຄຸນ ມາຍັງພັກປະຊາຊົນ ປະຕິວັດລາວ ທີ່ໄດ້ກໍ່ຕັ້ງ, ສຶກສາອົບຮົມ ແລະ ນໍາພາ-ຊີ້ນໍາເຮັດໃຫ້ປະເທດຊາດໄດ້ຮັບການພັດທະນາເຕີບໃຫຍ່ເຂັ້ມເເຂງ, ຂໍອວຍພອນໄຊອັນປະເສີດ ມາຍັງການນໍາພັກ-ລັດ, ຈົ່ງມີສຸຂະພາບເຂັ້ມແຂງ, ມີພະລານາໄມສົມບູນ, ສືບຕໍ່ນໍາພາ - ຊີ້ນໍາປະເທດຊາດກ້າວຂຶ້ນສູ່ສັງຄົມນິຍົມຢ່າງບໍ່ຢຸດຢັ້ງ, ອວຍພອນຄະນະນໍາກະຊວງປ້ອງກັນປະເທດ ຈົ່ງມີສຸຂະພາບເຂັ້ມແຂງ ສືບຕໍ່ຊີ້ນຳ-ນຳພາກອງທັບ ໃຫ້ມີຄວາມໜັກແໜ້ນເຂັ້ມແຂງໃນທຸກດ້ານ ກາຍເປັນກອງທັບປະຕິວັດທີ່ມີແບບ ແຜນທັນສະໄໝ, ອວຍພອນມາຍັງນາຍ ແລະ ພົນທະຫານ, ພໍ່ແມ່ປະຊາຊົນບັນດາເຜົ່າຈົ່ງມີສຸຂະພາບແຂງແຮງ ສືບຕໍ່ປະກອບສ່ວນເຂົ້າໃນການພັດທະນາປະເທດຊາດຂອງພວເຮົາ ໃຫ້ມີການພັດທະນາກ້າວຂຶ້ນຢ່າງຕໍ່ເນື່ອງ, ພ້ອມກັນສະເຫຼີມສະຫຼອງວັນຊາດທີ 2 ທັນວາ ຢ່າງເປັນຂະບວນຟົດຟື້ນກວ້າງຂວາງ.
ຄໍາເຫັນ