ວັດທຽນຖານມໍຣະດົກໂລກມີຄຸນຄ່າທາງປະຫວັດສາດຂອງຈີນ

ຄະນະຮັບຜິດຊອບໄດ້ລາຍງານໃຫ້ຟັງວ່າ: ວັດທຽນຖານແມ່ນກຸ່ມສະຖາປັດຕະຍາກຳສັກສິດ ແລະ ສວນສາທາລະນະບູຮານຂະໜາດໃຫຍ່ສ້າງຂຶ້ນໃນສະໄໝຣາຊະວົງໝິງ ຄສ 1420, ໃນໄລຍະຕົ້ນສະຕະວັດທີ 15 ແລະ ເຄີຍເປັນສະຖານທີ່ທີ່ຈັກກະພັດຣາຊະວົງໝິງ ແລະ ຣາຊະວົງຊິງນໍາໃຊ້ເປັນສະຖານທີ່ປະກອບພິທີບູຊາຟ້າເພື່ອອະທິຖານໃຫ້ພືດຜົນລະປູກອຸດົມສົມບູນ.

ວັດທຽນຖານມີເນື້ອທີ່ປະມານ 273 ເຮັກຕາຖືກອ້ອມຮອບດ້ວຍກຳແພງ 2 ຊັ້ນແບ່ງເປັນເນື້ອທີ່ວັດຊັ້ນໃນແລະຊັ້ນນອກ, ສ້າງສຳເລັດໃນສະໄໝຣາຊະວົງໝິງສະໄໝຈັກກະພັດຢົ່ງເຈິ້ນ (Yongle); ຄສ 1530, ມີການແຍກພິທີບູຊາ “ ຟ້າ ” ແລະ “ ໂລກ ” ອອກຈາກກັນ ແລະ ສ້າງແທ່ນບູຊາເພື່ອບູຊາຟ້າ. ຕໍ່ມາສະຖານທີ່ນີ້ຈຶ່ງໄດ້ຊື່ວ່າວັດທຽນຖານ(Temple of Heaven).

ການກໍ່ສ້າງ ແລະ ປັບປຸງສຳຄັນໆເກີດຂຶ້ນໃນສະໄໝຣາຊະວົງຊິງເຮັດໃຫ້ຮູບແບບໂດຍລວມຂອງວັດທີ່ເຫັນໃນປັດຈຸບັນມີຄວາມສົມບູນຂຶ້ນ. ເປັນອາຄານທີ່ມີຊື່ສຽງທີ່ສຸດເປັນຮູບວົງມົນມີຫຼັງຄາ 3 ຊັ້ນເຊື່ອມຕໍ່ກັນ. ແທ່ນບູຊາຟ້າເປັນຮູບວົງມົນຢູ່ພາກໃຕ້ເປີດສູ່ທ້ອງຟ້າໃຊ້ສຳລັບພິທີບູຊາຟ້າ. ພາຍໃນມີອາຄານບູຮານ 92 ຫຼັງລວມ 600 ຫ້ອງ.

ຈຸດເດັ່ນຂອງວັດທຽນຖານບໍ່ພຽງຄວາມງາມຂອງອາຄານແຕ່ຍັງສະທ້ອນແນວຄິດຈີນບູຮານກ່ຽວກັບ “ ຟ້າ - ດິນ - ມະນຸດ ”. ຮູບແບບຂອງວັດມີທັງຮູບວົງມົນ ແລະ ຮູບສີ່ຫຼ່ຽມເຊື່ອມໂຍງກັບຄວາມເຊື່ອບູຮານທີ່ວ່າ “ ຟ້າກົມແຜ່ນດິນສີ່ຫຼ່ຽມ ”. ການວາງຜັງ, ໂຕເລກ, ຮູບຊົງ ແລະ ທິດທາງຂອງອາຄານລ້ວນແລ້ວແຕ່ເຊື່ອມໂຍງກັບຄະຕິຄວາມເຊື່ອເລື່ອງຟ້າ ແລະໂລກ.

ວັດທຽນຖານໄດ້ຮັບການຂຶ້ນທະບຽນເປັນມໍຣະດົກໂລກໃນປີ 1998ເປັນຜົນງານຊັ້ນເອກຂອງສະຖາປັດຕະຍະກຳແລະການອອກແບບທີ່ສະທ້ອນໂລກະທັດຂອງອາລະຍະທຳຈີນໄດ້ຢ່າງຈະແຈ້ງ.