ເວທີຄັດເລືອກນາງແບບ-ຊາຍແບບ

ໃນງານດັ່ງກ່າວ ໄດ້ປະກອບມີ ຄະນະກຳມະການຕັດສິນ 9 ທ່ານ ຈາກຫ້ອງເສື້ອຊື່ດັງ ແລະ ນາງແບບ - ຊາຍແບບ ຂອງ ລາວ ແລະ ຕ່າງປະເທດ.

ທ່ານນາງ ວຽງຄໍາ ນັນທະວົງດວງສີ ນັກອອກແບບ ຜູ້ກໍ່ຕັ້ງບໍລິສັດຄັ່ງ ແລະ ທັງແມ່ນຄະນະກໍາມະການໃນເວທີຄັດເລືອກນາງແບບ-ຊາຍແບບ ໃຫ້ສໍາພາດວ່າ: ລາວແຟຊັນວີກ ຢາກໂຄສະນາສິນຄ້າລາວ (ແຜ່ນແພລາວ) ເມື່ອເຫັນນ້ອງໆທັງຍິງ-ຊາຍ ສະໝັກເຂົ້າຮ່ວມ ມີຈໍານວນຫຼາຍ ແມ່ນມີຄວາມພູມໃຈ ເພາະວ່າພວກເຂົາເຈົ້າມີຄວາມງາມ ທັງກ້າສະແດງອອກ ແລະ ໃນຕໍ່ໜ້າຖ້ານ້ອງໆມີໂອກາດ ກ່ອນຈະເຂົ້າຮ່ວມຄັດເລືອກ ໃຫ້ດຸໝັ່ນຝຶກຊ້ອມຫຼາຍໆ ໂດຍສະເພາະ ແມ່ນເນັ້ນໃສ່: 1. ສະລິລະ (ຮຸ່ນ), 2. ຄວາມໝັ້ນໃຈ ແລະ 3.ໜ້າຕາ.

ທ່ານນາງ ພອນເທວາ ໄຊສົງຄາມ ໜຶ່ງໃນຄະນະກໍາມະການຕັດສິນໃຫ້ສໍາພາດວ່າ: ເວທີໃນມື້ນີ້ ແມ່ນຄັດເລືອກເອົານາງແບບ-ຊາຍແບບ ຈໍານວນ ເກືອບ 200 ຄົນ, ເລືອກເອົາ 60 ຄົນ ໃນນີ້ ຜູ້ຍິງຈະເອົາຫຼາຍກວ່າຜູ້ຊາຍ, ຜູ້ທີ່ໄດ້ຮັບຄັດເລືອກ ທີມງານຈະຕິດຕໍ່ຫາ ຫຼື ຕິດຕາມທາງ ເພສລາວແຟຊັນວີກ (ປະກາດຜົນ ແມ່ນປະມານກາງເດືອນສິງຫາ).

ນາງ ພອນໄພລິນ ວົງສິນນະສອນ ແລະ ທ້າວ ສິດທິສັກ ທະລົງແສງຈັນ ນັກສຶກສາ ມຊ ຄະນະທັນຕະແພດ, ທ້າວ ອຸດົມວິໄລ ຄໍາປານ ນັກສຶກສາ ມຊ ຄະນະເສດຖະສາດ ຜັດປ່ຽນກັນໃຫ້ສໍາພາດວ່າ: ພວກນ້ອງມີຄວາມຕື່ນເຕັ້ນ ແລະ ປະທັບໃຈຫຼາຍ ທີ່ໄດ້ເຂົ້າຮ່ວມງານ, ເປັນຄັ້ງທໍາອິດຂອງພວກນ້ອງ, ການເຂົ້າຮ່ວມແມ່ນມີຄວາມໝັ້ນໃຈຢ່າງເຕັມສ່ວນ ແລະ ມີຄວາມຄາດຫວັງວ່າ ຈະໄດ້ຜ່ານເຂົ້າຮອບຄັດເລືອກຢ່າງແນ່ນອນ.

(ຂ່າວ: ແສງຈັນ)