ໂດຍ: ຕະວິນຍານ
ໄປພ້ອມກັບຜົນສໍາເລັດໃນການຮັກສາສະຖຽນລະພາບທາງດ້ານການເມືອງມີຄວາມໝັ້້ນຄົງ, ປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ, ການພັດທະນາວຽກງານເສດຖະກິດແລ້ວ, ເມືອງພຽງ ແຂວງໄຊຍະບູລີ ຍັງເອົາໃຈໃສ່ ຊຸກຍູ້ສົ່ງເສີມ ວຽກງານວັດທະນາທໍາ-ສັງຄົມ ໃຫ້ຂະຫຍາຍຕົວ ຊຶ່ງສະແດງອອກໃນ ປີ 2023 ຜ່ານມາ, ເມືອງໄດ້ສຸມໃສ່ປັບປຸງວຽກງານການສຶກສາມີຄຸນນະພາບດີຂຶ້ນ ໂດຍເລັ່ງໃສ່ການຊັບຊ້ອນບຸກຄະລາກອນຄູໃຫ້ສອດຄ່ອງກັບຄວາມຮຽກຮ້ອງຕ້ອງການຕົວຈິງ ໂດຍເນັ້ນໃສ່ ໂຮງຮຽນຢູ່ເຂດຫ່າງໄກສອກຫຼີກ ໄປພ້ອມໆກັບການຕິດຕາມຊຸກຍູ້ການຮຽນ-ການສອນທັງໃນລະບົບ ແລະ ນອກລະບົບໃນຂອບເຂດທົ່ວເມືອງ. ສຸມໃສ່ປະຕິບັດຄາດໝາຍດ້ານການສຶກສາຈໍານວນ 16 ຄາດໝາຍ ມີ 20 ຕົວຊີ້ວັດ. ຜ່ານການປະຕິບັດ 1 ປີຜ່ານມາບັນລຸແລ້ວ 14 ຕົວຊີ້ວັດ, ໃກ້ບັນລຸ 2 ຕົວຊີ້ວັດ ແລະ ມີລັກສະນະທົດຖອຍ 4 ຕົວຊີ້ວັດ. ເມືອງໄດ້ເອົາໃຈໃສ່ຊຸກຍູ້ການຈັດຕັ້ງປະຕິບັດບັນດຄາດໝາຍສູ້ຊົນທາງດ້ານສາທາລະນະສຸກຈໍານວນ 11 ຕົວຊີ້ວັດ, ບັນລຸແລ້ວ 10 ຕົວຊີ້ວັດ, ຍັງບໍ່ບັນລຸ 1 ຕົວຊີ້ວັດ, ສ້າງບ້ານສາທາລະນະສຸກຕົວແບບໄດ້ 4 ບ້ານ ທຽບໃສ່ແຜນການປີປະຕິບັດໄດ້ 100%, ປະກາດຮັບຮອງບ້ານຢຸດຕິການຖ່າຍຊະຊາຍ ໄດ້ 51 ບ້ານທຽບໃສ່ແຜນການປີປະຕິບັດໄດ້ 100% ທັງຮັບຮອງເປັນເມືອງຢຸດຕິການຖ່າຍຊະຊາຍສໍາເສັດ; ທົ່ວເມືອງໄດ້ຊົມໃຊ້ນໍ້າສະອາດ ກວມ 97.37%, ຊົມໃຊ້ວິດຖ່າຍ ກວມ 97,26%, ອາຍຸຍືນສະເລ່ຍ 67 ປີ.
ສໍາລັບວຽກງານຖະແຫຼງຂ່າວ-ວັດທະນະທໍາ ແລະ ທ່ອງທ່ຽວ ເມືອງໄດ້ປັບປຸງລະບົບຂ່າວສານໃຫ້ມີຄວາມທັນສະໄໝຂຶ້ນ ລົງເກັບກໍາຂ່າວ-ຂຽນຂ່າວ, ສົ່ງສູນກາງໄດ້ທັງໝົດ 195 ຂ່າວ, ຂ່າວສົ່ງໃຫ້ແຂວງ ແລະ ຈັດລາຍການຂ່າວຜ່ານລະບົບໂທລະໂຄ່ງພາຍໃນເມືອງໄດ້ 85 ຄັ້ງ, ຖ່າຍພາບປະກອບເຂົ້າບົດຄວາມໂຄສະນາກ່ຽວກັບເສັ້ນທາງຫຼວງແຫ່ງຊາດ. ສໍາເລັດການແບ່ງຂັ້ນຄຸ້ມຄອງລະຫວ່າງສູນກາງ ແລະ ທ້ອງຖິ່ນ, ພ້ອມທັງສ້າງຄິບໂຄສະນາກົດໝາຍສື່ມວນຊົນ; ສ້າງບ້ານວັດທະນະທໍາໄດ້ 2 ບ້ານ ທຽບໃສ່ແຜນການປີປະຕິບັດໄດ້ 100% ແລະ ກົມກອງວັດທະນະທໍາໄດ້ 8 ກົມກອງ ທຽບໃສ່ແຜນການປີປະຕິບັດໄດ້ 100%. ສ່ວນວຽກງານແຮງງານ ແລະ ສະຫວັດດີການສັງຄົມ ເມືອງໄດ້ຫາງານໃຫ້ແຮງງານທີ່ຫວ່າງງານໄດ້ 190 ແຮງງານ ທຽບໃສ່ແຜນປີປະຕິບັດໄດ້ 95%, ຄັດເລືອກແຮງງານລາວໄປເຮັດວຽກຕາມລະດູການຢູ່ ສ ເກົາຫຼີ ໄດ້ 12 ຄົນ, ຂຶ້ນທະບຽນແຮງງານລາວ ແລະ ຕ່າງປະເທດໄດ້ 20 ຫົວຫນ່ວຍແຮງງານ ທຽບໃສ່ແຜນການປີປະຕິບັດໄດ້ 108%. ພ້ອມກັນນັ້ນ, ຍັງໄດ້ສ້າງຕັ້ງກອງທຶນພັດທະນາສີມືແຮງງານຂັ້ນເມືອງ ມີເງິນທັງໝົດ 20,9 ລ້ານກີບ, ລະດົມທຶນເຂົ້າກອງທຶນແຮສຸກເສີນຂັ້ນເມືອງໄດ້ທັງໝົດ 61,8 ລ້ານກີບ ທຽບໃສ່ແຜນປີປະຕິບັດໄດ້ 75%, ປະຕິບັດນະໂຍບາຍຕໍ່ຜູ້ທີ່ໄດ້ຮັບເຄາະຮ້າຍໄດ້ທັງໝົດ 18 ຄອບຄົວ, ເປັນເງິນທັງ 48,28 ລ້ານກີບ, ຮັບບໍລິຈາກເລືອດໄດ້ 64 ຖົງ.
ຄໍາເຫັນ