ສູນກາງການບິນສຳຄັນຫຼາຍແຫ່ງໄດ້ປະສົບກັບການຊັກຊ້າ ຫຼື ການຢຸດຖ້ຽວບິນຢ່າງກວ້າງຂວາງ, ເຮັດໃຫ້ຜູ້ໂດຍສານຫຼາຍສິບພັນຄົນຕິດຄ້າງ, ໂດຍສະເພາະຢູ່ສະໜາມບິນໃນນະຄອນດູໄບ. ນີ້ແມ່ນຜົນກະທົບທີ່ຮ້າຍແຮງທີ່ສຸດຕໍ່ຂະແໜງການບິນນັບຕັ້ງແຕ່ວິກິດການໂຄວິດ-19.
ບົດລາຍງານຊີ້ໃຫ້ເຫັນວ່າ: ສະໜາມບິນ ແລະ ໂຮງແຮມຫຼູເຊັ່ນ: Burj Al Arab ໄດ້ຮັບຄວາມເສຍຫາຍ ແລະ ສ້າງຄວາມວິຕົກກັງວົນແກ່ບັນດານັກທ່ອງທ່ຽວສາກົນ ຊຶ່ງໃນປີຜ່ານມາໄດ້ໃຊ້ຈ່າຍໃນພາກພື້ນນີ້ປະມານ 194 ຕື້ໂດລາ, ອີງຕາມຂໍ້ມູນຂອງສະພາການເດີນທາງ ແລະ ການທ່ອງທ່ຽວໂລກ (WTTC).
ຂໍ້ມູນຈາກ AirDNA ຜູ້ໃຫ້ບໍລິການຂໍ້ມູນທີ່ພັກເຊົາສຳລັບພັກຜ່ອນວັນພັກ ລະບຸວ່າ: ການຍົກເລີກທີ່ພັກໄລຍະສັ້ນໃນ ສະຫະລັດ ອາຣັບ ເອມິເຣດ (UAE) ເພີ່ມຂຶ້ນຫຼາຍກວ່າສອງເທົ່າໃນວັນທີ 28 ກຸມພາ ຜ່ານມາ, ບັນລຸປະມານ 8,450 Unit, ໂດຍສ່ວນໃຫຍ່ແມ່ນການຈອງສຳລັບເດືອນມີນາ, ຫຼັງຈາກການໂຈມຕີໃນຮອບທຳອິດ.
ໃນຂະນະດຽວກັນ, ທ່ານ ໄມເຄິລ ໂອລີຣີ ຫົວໜ້າຜູ້ບໍລິຫານບໍລິສັດ ສາຍການບິນ Ryanair ກ່າວວ່າ: ການຈອງຖ້ຽວບິນໄປຕາເວັນອອກກາງໄດ້ຫຼຸດລົງຢ່າງຫຼວງຫຼາຍ, ແຕ່ຄວາມຕ້ອງການສຳລັບການເດີນທາງໄລຍະສັ້ນໄປຍັງບັນດາປະເທດເອີຣົບເຊັ່ນ: ປັອກຕຸຍການ, ອີຕາລີ ແລະ ເກຣັກ ໄດ້ເພີ່ມຂຶ້ນໃນໄລຍະກ່ອນວັນພັກ Easter.
ອົງການທ່ອງທ່ຽວດູໄບ ໄດ້ລະບຸໃນຖະແຫຼງຂ່າວວ່າ: ຄວາມປອດໄພຂອງນັກທ່ອງທ່ຽວແມ່ນສິ່ງສຳຄັນທີ່ສຸດ ແລະ ໄດ້ຂໍໃຫ້ໂຮງແຮມຊ່ວຍດູແລນັກທ່ອງທ່ຽວທີ່ໄດ້ຮັບຜົນກະທົບ, ໂດຍກ່າວຕື່ມວ່າ: ດູໄບ ມີປະສົບການໃນການຮັບມືກັບວິກິດການທົ່ວໂລກມາກ່ອນ.
ໃນເວລາດຽວກັນ, Tourism Economics ບໍລິສັດທີ່ປຶກສາດ້ານເສດຖະກິດການທ່ອງທ່ຽວທົ່ວໂລກ ໄດ້ຄາດຄະເນວ່າ: ຈຳນວນນັກທ່ອງທ່ຽວໄປຕາເວັນອອກກາງໃນປີນີ້ອາດຈະຫຼຸດລົງ 23-38 ລ້ານຄົນ ຈາກການຄາດຄະເນກ່ອນໜ້ານີ້, ຂຶ້ນກັບໄລຍະເວລາຂອງການຂັດແຍ້ງ.
ທັງນີ້, ຫຼັງຈາກການຕໍ່ສູ້ໄດ້ລະເບີດຂຶ້ນ ມີປະຊາຊົນຫຼາຍພັນຄົນໄດ້ຟ້າວເດີນທາງອອກຈາກພາກພື້ນ, ໂດຍລັດຖະບານ ສະຫະລັດ ອາເມຣິກາ ໄດ້ອອກຄໍາແນະນໍາ ໃນວັນທີ 2 ມີນາຜ່ານມາ, ໂດຍຮຽກຮ້ອງໃຫ້ພົນລະເມືອງອາເມຣິກາ ອອກຈາກພື້ນທີ່ພຽງແຕ່ສອງສາມມື້ຫຼັງຈາກເກີດການໂຈມຕີເປົ້າໝາຍໃນອີຣານຮອບທຳອິດ.
ຄໍາເຫັນ