ວິທະຍາສາດເຕັກໂນໂລຊີທີ່ທັນສະໄໝຂອງຈີນເປັ່ງປະກາຍລັດສະໝີໃໝ່ໃນດ້ານການອຸປະໂພກ-ບໍລິໂພກ

ເວທີປຶກສາຫາລືຄັ້ງນີ້ຈັດຂຶ້ນພາຍໃຕ້ຫົວຂໍ້ “ການເຊື່ອມໂຍງເຂົ້າກັນຢ່າງເລິກເຊິ່ງລະຫວ່າງການປະດິດສ້າງໃໝ່ດ້ານວິທະຍາສາດເຕັກໂນໂລຊີ ແລະ ການປະດິດສ້າງໃໝ່ດ້ານອຸດສາຫະກໍາ” ຊຶ່ງປັນຍາປະດິດໄດ້ກາຍເປັນຈຸດສຸມ ຫຼື ໄດ້ຮັບຄວາມສົນໃຈທີ່ສຸດຢູ່ເວທີປຶກສາຫາລືຄັ້ງນີ້. ການ “ສ້າງເສດຖະກິດອັດສະລິຍະຮູບແບບໃໝ່” ທີ່ສະເໜີອອກໂດຍລັດຖະບານຈີນພວມໄດ້ຮັບການຈັດຕັ້ງປະຕິບັດເປັນກ້າວໆ, ເຮັດໃຫ້ເກີດຄວາມຕ້ອງການດ້ານອຸປະໂພກ-ບໍລິໂພກອັນໃໝ່ ຊຶ່ງໄດ້ເພີ່ມແຮງຂັບເຄື່ອນເຂົ້າໃນຕະຫຼາດ. ເວທີປຶກສາຫາລືຄັ້ງນີ້ໄດ້ເຜີຍແຜ່ຜົນສໍາເລັດດ້ານວິທະຍາສາດເຕັກໂນໂລຊີສໍາຄັນ 21 ຂໍ້ ເປັນຕົ້ນແມ່ນ ລະບົບຄຸ້ມຄອງຫຸ່ນຍົນ TongBrain ແລະ ລະບົບຜ່າຕັດດ້ວຍຫຸ່ນຍົນ ຊຶ່ງລ້ວນແຕ່ໄດ້ຢັ້ງຢືນໃຫ້ເຫັນເຖິງວິທະຍາສາດເຕັກໂນໂລຊີເພີ່ມປະສິດທິພາບໃຫ້ແກ່ອຸດສາຫະກໍາ ແລະ ຊີວິດການເປັນຢູ່ຂອງປະຊາຊົນຕື່ມອີກ.

ວິທະຍາສາດເຕັກໂນໂລຊີທີ່ທັນສະໄໝຂອງຈີນບໍ່ພຽງແຕ່ໄດ້ເປັ່ງປະກາຍລັດສະໝີໃໝ່ດ້ານການອຸປະໂພກ-ບໍລິໂພກເທົ່ານັ້ນ, ຍັງໄດ້ເພີ່ມປະສິດທິພາບໃຫ້ແກ່ການພັດທະນາຂອງໂລກອີກດ້ວຍ. ບຸກຄົນຕ່າງປະເທດໄດ້ຕີລາຄາຢ່າງຕັ້ງໜ້າຕໍ່ການພັດທະນາດ້ານວິທະຍາສາດເຕັກໂນໂລຊີຂອງຈີນ. ທ່ານ ຮັນສ ດໍວິເລ ເຈົ້າໜ້າທີ່ອົງການອຸຍແນັສໂກຊີ້ໃຫ້ເຫັນວ່າ: ຈີນສາມາດຜະລິດຜິດຕະພັນປັນຍາປະດິດທີ່ມີຄຸນນະພາບສູງ ແລະ ປ້ອນສູ່ຕະຫຼາດໂລກ ໂດຍໄດ້ສະໜອງທາງເລືອກໃຫ້ແກ່ຜູ້ບໍລິໂພກຫຼາຍຂຶ້ນກວ່າເກົ່າ. ຂະນະທີ່ທ່ານ ເດນນິສ ຊິມອນ ປະທານສະຫະພັນອົງການດ້ານບຸກຄະລາກອນສາກົນເຫັນວ່າ: ຈີນໄດ້ສະໜອງຕົວແບບໃຫ້ແກ່ບັນດາປະເທດເຂດໂລກໃຕ້ໃນການພັດທະນາປັນຍາປະດິດໂດຍບໍ່ຕ້ອງອາໄສແຜ່ນຊິບທີ່ມີລາຄາສູງ.

ໃນທ່າມກາງສະພາບການຟື້ນຕົວຂອງເສດຖະກິດໂລກຂາດແຮງຂັບເຄື່ອນ, ການເມືອງພູມສາດມີຄວາມສ່ຽງເພີ່ມຂຶ້ນ ແລະ ລັດທິປົກປ້ອງການຄ້າມີທ່າອ່ຽງຟື້ນຕົວ, ຈີນໄດ້ຢຶດໝັ້ນໃນການເປີດປະຕູ ແລະ ການຮ່ວມມືດ້ານວິທະຍາສາດເຕັກໂນໂລຊີທີ່ມີລະດັບສູງຢ່າງສະເໝີຕົ້ນສະເໝີປາຍ ແລະ ກາຍເປັນແຮງຊຸກຍູ້ການປະດິດສ້າງໃໝ່ດ້ານວິທະຍາສາດເຕັກໂນໂລຊີຂອງໂລກ. ໃນເວທີປຶກສາຫາລືຄັ້ງນີ້, ຈີນໄດ້ປະກາດເປີດ 10 ໂຄງການພື້ນຖານໂຄງລ່າງດ້ານການຄົ້ນຄວ້າວິທະສາຍາດທີ່ສໍາຄັນໃຫ້ທົ່ວໂລກຊົມໃຊ້ຮ່ວມກັນ. ເຈົ້າໜ້າທີ່ຄະນະກໍາມະການຂໍ້ມູນຂ່າວສານວິທະຍາສາດເຕັກໂນໂລຊີສາກົນຊີ້ໃຫ້ເຫັນວ່າ: ຈີນມີທ່າທີເປີດກວ້າງຕໍ່ແນວຄິດການປະດິດສ້າງໃໝ່ຕ່າງໆ ຊຶ່ງການເປີດກວ້າງນັ້ນເປັນເສັ້ນທາງຕ້ອງຜ່ານຂອງການປະດິດສ້າງໃໝ່.

ສໍາລັບທົ່ວໂລກແລ້ວ, ການເລືອກຮ່ວມມືກັບຈີນໝາຍເຖິງການເລືອກໄປພ້ອມກັບປະເທດທີ່ປະຍຸກໃຊ້ການປະດິດສ້າງໃໝ່ໃຫຍ່ທີ່ສຸດ, ໄປພ້ອມກັບໂອກາດການພັດທະນາທີ່ມີຄຸນນະພາບສູງ ແລະ ໄປພ້ອມກັບອະນາຄົດທີ່ດີງາມກວ່າເກົ່າ.