ວິທະຍຸກະຈາຍສຽງກອງທັບມີບົດບາດສຳຄັນໃນການເປັນກະບອກສຽງອັນແຫຼມຄົມຂອງພັກ ກໍຄືກຳລັງປ້ອງກັນຊາດ

 ເສດຖະກິດ-ສັງຄົມ, ວິທະຍາສາດ, ເຕັກໂນໂລຊີ, ສາລະຄວາມຮູ້, ສາລະບັນເທີງໃຫ້ແກ່ສັງຄົມປະກອບສ່ວນຕ້ານປະກົດການຫຍໍ້ທໍ້ໃນສັງຄົມ ແລະ ຖ້ອຍທຳນອງທີ່ບິດເບືອນຄວາມຈິງ. ໃນນີ້, ສຳລັບສື່ມວນຊົນກອງທັບເວົ້າລວມ, ເວົ້າສະເພາະແມ່ນສື່ເອເລັກໂຕຣນິກວິທະຍຸກະຈາຍສຽງກອງທັບປະຊາຊົນລາວ ແມ່ນພາກສ່ວນໜຶ່ງທີ່ມີບົດບາດສຳຄັນໃນການເປັນປາກກະບອກສຽງອັນແຫຼມຄົມຂອງພັກ, ລັດກໍຄືຂອງກະຊວງປ້ອງກັນປະເທດ ປະກອບສ່ວນເຂົ້າໃນການເຄື່ອນໄຫວໂຄສະນາສຶກສາອົບຮົມ, ປຸກລະດົມເຜີຍແຜ່ແນວທາງການເມືອງ, ການທະຫານ, ພະລາທິການ, ເຕັກນິກ ແລະ ມະຕິຄຳສັ່ງຕ່າງໆຂອງພັກ-ລັດ, ທາດແທ້ມູນເຊື້ອຂອງຊາດ, ຂອງກອງທັບ, ປຸກລະດົມຂະບວນການລວມໝູ່ ແລະ ວຽກດີຄົນເດັ່ນ, ຕໍານິວິຈານປະກົດການຫຍໍ້ທໍ້ທີ່ເກີດຂຶ້ນໃນກອງທັບ. ນອກນີ້, ຍັງເຮັດໜ້າທີ່ຕອບຕ້ານທຸກຖ້ອຍທຳນອງການໂຄສະນາບິດເບືອນໃສ່ຮ້າຍປ້າຍສີຂອງພວກອິດທິກໍາລັງປໍລະປັກ ແລະ ກຸ່ມຄົນບໍ່ຫວັງດີໄດ້ຢ່າງທັນການ.

ສະຫາຍ ພັນໂທ ໜູມາດ ອູ່ນໃຈດີ ຫົວໜ້າການທະຫານ ກອງວິທະຍຸກະຈາຍສຽງກອງທັບໄດ້ໃຫ້ສຳພາດເນື່ອງໃນໂອກາດວັນສື່ມວນຊົນ ແລະ ການພິມຈຳໜ່າຍ ຄົບຮອບ 74 ປີ (13 ສິງຫາ 1950-13 ສິງຫາ 2024) ກ່າວວ່າ: ຕະຫຼອດໄລຍະຜ່ານມາ, ວິທະຍຸກະຈາຍສຽງກອງທັບໄດ້ມີການປັບປຸງ ແລະ ພັດທະນາຕົນເອງໃຫ້ທຽບທັນກັບສະພາບການໃນຍຸກປັດຈຸບັນ, ຈາກການໂຄສະນາອອກອາກາດທາງສະຖານີວິທະຍຸກະຈາຍສຽງແລ້ວ ຍັງໄດ້ໂຄສະນາອອກທາງສື່ອອນລາຍ Facebook, Youtube...ຕື່ມອີກດ້ວຍພາບ ແລະ ສຽງ, ສ່ວນບັນດາລາຍການວິທະຍຸ ກໍໄດ້ມີການປັບປຸງຫຼາກຫຼາຍຮູບແບບເພື່ອກະຈາຍຄື້ນສຽງສະໜອງຂໍ້ມູນຂ່າວສານ, ສາລະໜ້າຮູ້, ສາລະບັນເທີງໄປທົ່ວທຸກພື້ນທີ່ໃນທົ່ວປະເທດສາມາດດຶງດູດຜູ້ຟັງໄດ້ເຂົ້າເຖິງແຫຼ່ງຂໍ້ມູນຂ່າວສານຕ່າງໆໄດ້ຢ່າງວ່ອງໄວ ແລະ ໄດ້ຮັບຄວາມນິຍົມຊົມຊອບໄວ້ເນື້ອເຊື່ອໃຈຈາກພະນັກງານ-ນັກຮົບ ກໍຄືປະຊາຊົນລາວບັນດາເຜົ່າ, ດ້ານເນື້ອໃນລາຍການວິທະຍຸລ້ວນແລ້ວແຕ່ສ່ອງແສງໃຫ້ເຫັນເຖິງການປົກປັກຮັກສາ ແລະ ສ້າງສາພັດທະນາປະເທດຊາດ ແລະ ການປົກປັກຮັກສາມູນມໍລະດົກວັດທະນະທຳອັນດີງາມຂອງຊາດລາວທັງເປັນການໂຄສະນາປຸກລະດົມຊຸກຍູ້ຂະບວນການປັບປຸງກໍ່ສ້າງກົມກອງໃຫ້ມີລະບຽບແບບ ແລະ ທັນສະໄໝໄປຕາມທິດນຳຂອງກະຊວງປ້ອງກັນປະເທດວາງອອກ ວ່າດ້ວຍ 4 ໜ້າທີ່ໃຫຍ່ 26 ແຜນງານໃຫ້ສອດຄ່ອງກັບສະພາບຄວາມເປັນຈິງຂອງແຕ່ລະກົມກອງ.

ເນື່ອງໃນໂອກາດວັນສື່ມວນຊົນ ແລະ ການພິມຈໍາໜ່າຍ ຄົບຮອບ 74 ປີທີ່ໝູນວຽນມາບັນຈົບຄົບຮອບອີກວາລະໜຶ່ງ, ສະຫາຍ ພັນໂທ ໜູມາດ ອູ່ນໃຈດີ ໄດ້ອວຍພອນໄຊອັນປະເສີດມາຍັງທ່ານການນຳພັກ-ລັດ, ຄະນະນຳກະຊວງປ້ອງກັນປະເທດ, ຄະນະນຳກົມໃຫຍ່ການເມືອງກອງທັບ ກໍຄືກົມໂຄສະນາອົບຮົມ ຕະຫຼອດຮອດພະນັກງານ-ນັກຮົບຕາໜ່າງຂ່າວເພື່ອນຮ່ວມງານຢູ່ບັນດາກົມກອງກຳລັງຫຼວງ-ກຳລັງທ້ອງຖິ່ນ ທີ່ເຮັດວຽກງານສື່ມວນຊົນໃນທົ່ວກອງທັບ ຈົ່ງມີສຸຂະພາບເຂັ້ມແຂງ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ພ້ອມກັນສືບຕໍ່ເປັນກະບອກສຽງ ໂຄສະນາແນວທາງຂອງພັກ ກໍຄືຂອງກອງທັບໃຫ້ທັນສະໄໝວ່ອງໄວ ແລະ ມີປະສິດທິຜົນກວ່າເກົ່າ.