ເຮັດໃຫ້ນໍ້າໄຫຼຊຸ-ອັ່ງຖ້ວມທີ່ຢູ່ອາໄສ, ພື້ນຖານໂຄງລ່າງ, ເສັ້ນທາງ, ເນື້ອທີ່ທໍາການຜະລິດ ແລະ ສັດລ້ຽງຂອງປະຊາຊົນ ຈໍານວນ 9 ເມືອງຄື: ເມືອງພຽງ, ປາກລາຍ, ແກ່ນທ້າວ, ບໍ່ແຕນ, ຫົງສາ, ໄຊຍະບູລີ, ເງີນ, ຊຽງຮ່ອນ ແລະ ເມືອງໄຊສະຖານ ລວມທັງໝົດ 42 ບ້ານ, 295 ຄອບຄົວ, 713 ຄົນ. ໃນນີ້ ຖືກນໍ້າປ່າໄຫຼພັດປະຊາຊົນບ້ານນາອອນ ເມືອງຊຽງຮ່ອນ ຈໍານວນ 2 ຄົນ (ເສຍຊີວິດ 1 ຄົນ); ເກີດເຫດຟ້າຜ່າງົວຕາຍ 5 ໂຕ, ງົວໄຫຼນໍ້າ 1 ໂຕ, ເສັ້ນທາງຖືກດິນສະໄລ້ຖົມ ແລະ ນໍ້າຍື່ງຖ້ວມທາງເສຍຫາຍຈໍານວນ 5 ເສັ້ນ, ໂຮງໝໍນ້ອຍ 2 ແຫ່ງ, ເສົາໄຟຟ້າຫັກ 1 ຕົ້ນ, ເນື້ອທີ່ນາ ແລະ ສວນເສຍຫາຍ 29,9 ເຮັກຕາ, ເຮືອນປະຊາຊົນຖືກນໍ້າພັດໄຫຼ 6 ຫຼັງ (ຢູ່ເມືອງຫົງສາ 4 ຫຼັງ, ເມືອງເງີນ 2 ຫຼັງ) ລວມມູນຄ່າເສຍຫາຍທີ່ສາມາດເກັບກໍາໄດ້ເບື້ອງຕົ້ນ 6,050,739,000 ກີບ.
ທ່ານ ໜູເກນ ພັນລັກ ຮອງປະທານຄະນະກໍາມະການຄຸ້ມຄອງໄພພິບັດຂັ້ນແຂວງ ຜູ້ປະຈໍາການລາຍງານໃຫ້ຊາບວ່າ: ຜົນເສຍຫາຍຢູ່ເມືອງໄຊຍະບູລີຕາມການລາຍງານເບື້ອງຕົ້ນປະມານ 3,761,440,000 ກີບ. ນໍ້າຖ້ວມເຮືອນ ຈໍານວນ 4 ບ້ານຄື: ບ້ານປາກຮຸ່ງ, ບ້ານຫ້ວຍຂົວຫຼວງ, ບ້ານຄົກຟາກ, ບ້ານນາຂອນແກ່ນ ຈໍານວນ 153 ຄອບຄົວ (ຍັງບໍ່ໄດ້ປະເມີນມູນຄ່າເສຍຫາຍ). ຖ້ວມເນື້ອທີ່ທໍາການຜະລິດຂອງປະຊາຊົນ ມີຈໍານວນ 4 ບ້ານຄື: ບ້ານປາກຮຸ່ງ, ຫ້ວຍຂົວຫຼວງ, ຄົກຟາກ ແລະ ບ້ານນາຂອນແກ່ນ (ຍັງບໍ່ໄດ້ປະເມີນມູນຄ່າເສຍຫາຍ). ໂຮງໝໍນ້ອຍ 2 ແຫ່ງຖືກນໍ້າຖ້ວມ (ຍັງບໍ່ໄດ້ ປະເມີນມູນຄ່າເສຍຫາຍ). ເມືອງພຽງ: ຖືກຜົນກະທົບ ຈໍານວນ 2 ບ້ານລວມມີ 50 ຄອບຄົວ, ຈໍານວນ 329 ຄົນ. ມູນຄ່າເສຍຫາຍ 985,702,000 ກີບ. ນໍ້າຖ້ວມທົ່ງນາປະຊາຊົນ 2 ບ້ານ (ບ້ານນາຊິງ, ບ້ານນໍ້າພອນ) ລວມມີ 50 ຄອບຄົວ, ຈໍານວນ 329 ຄົນ, ເນື້ອທີ່ນາທີ່ໄດ້ຮັບຄວາມເສຍຫາຍ 25,77 ເຮັກຕາ ມູນຄ່າເສຍຫາຍ 985,702,000 ກີບ. ເມືອງຫົງສາຖືກຜົນກະທົບ ຈໍານວນ 3 ບ້ານ 47 ຄອບຄົວ, 269 ຄົນ ມູນຄ່າຜົນເສຍຫາຍທັງໝົດ 764,756,000 ກີບ. ນໍ້າຖ້ວມເຮືອນຂອງປະຊາຊົນມີ 2 ບ້ານຄື: ບ້ານທ່າຊ່ວງ ແລະ ບ້ານແກ້ງແອນ ມີ 13 ຄອບຄົວ, ຈໍານວນ 60 ຄົນ. ໃນນີ້ ເຮືອນຖືກນໍ້າພັດໄຫຼ ຈໍານວນ 4 ຫຼັງ, ເຮືອນຄົວເຂື່ອນ 1 ຫຼັງ, ນໍ້າຖ້ວມເລົ່າເຂົາ 2 ຫຼັງ, ຖຽງສວນ 2 ຫຼັງ ມູນຄ່າເສຍຫາຍ 652,934,000 ກີບ. ເນື້ອທີ່ນາ ຖືກນໍ້າເຊາະເຈື່ອນ ແລະ ດີນສະໄລ້ຖົມນາ 2,396 ເຮັກຕາ, ເນື້ອທີ່ສວນ 0.258 ເຮັກຕາ ມູນຄ່າເສຍຫາຍ 111,822,000 ກີບ. ເມືອງໄຊສະຖານ: ໄດ້ຮັບຜົນກະທົບ 1 ບ້ານ 25 ຄອບຄົວ ນໍ້າຖ້ວມເນື້ອທີ່ນາ 8.50 ເຮັກຕາ ລວມມູນຄ່າເສຍຫາຍ 272,000,000 ກີບ. ເມືອງເງີນ: ໄດ້ຮັບຜົນກະທົບຈໍານວນ 2 ບ້ານຄື: ບ້ານຫ້ວຍເງີຍ ແລະ ບ້ານປາກຫ້ວຍແຄນ ມີ 10 ຄອບຄົວ, ຈໍານວນຄົນ 49 ຄົນ ມູນຄ່າຜົນເສຍຫາຍທັງຫມົດ 241,841,000 ກີບ. ນໍ້າຊຸເຮືອນໄຫຼ ຈໍານວນ 2 ຫຼັງ ມູນຄ່າເສຍຫາຍທັງໝົດ 183,841,000 ກີບ. ນໍ້າຖ້ວມເນື້ອທີ່ນາ, ສວນສາລີ 2 ເຮັກຕາກວ່າ ແລະ ອື່ນໆ ມູນຄ່າເສຍຫາຍ 58,000,000 ກີບ. ເສັ້ນທາງເສຍຫາຍ 3 ເສັ້ນ: ນໍ້າໜຶ່ງຖ້ວມບໍ່ສາມາດສັນຈອນໄດ້ (ບໍ່ທັນມີມູນຄ່າເສຍຫາຍ). ເມືອງປາກລາຍ: ໄດ້ຮັບຜົນກະທົບ 5 ບ້ານຄື: ບ້ານນໍ້າຊົ້ງ, ຫວ້ຍລາຍນ້ອຍ, ສີສະອາດຊົມພູ, ໄຊຍະມຸງຄຸນ ແລະ ບ້ານ ບຸ່ງມ່າ (ຍັງບໍ່ທັນມີຂໍ້ມູນຜົນເສຍຫາຍ). ນອກຈາກນັ້ນ, ຍັງມີເມືອງອື່ນໆ ແລະ ບ້ານຈໍານວນໜຶ່ງກໍມີຄວາມເສຍຫາຍສົມຄວນ.
ທ່ານ ໜູເກນ ພັນລັກ ກ່າວຕື່ມວ່າ: ພາຍຫຼັງເກີດໄພພິບັດ, ຄະນະກໍາມະການຄຸ້ມຄອງໄພພິບັດຂັ້ນແຂວງ, ເມືອງກໍໄດ້ສົມທົບກັບອົງການປົກຄອງບ້ານລະດົມທຸກກໍາລັງ ລົງຊ່ວຍເຫຼືອປະຊາຊົນທີ່ໄດ້ຮັບຜົນກະທົບ ຍ້າຍເຄື່ອງຂອງທີ່ຈໍາເປັນ, ສັດລ້ຽງ ແລະ ຜູ້ທີ່ຊ່ວຍເຫຼືອຕົວເອງບໍ່ໄດ້ ອອກຈາກພື້ນທີ່ໆໄດ້ຮັບຜົນກະທົບ ໄປສູ່ພື້ນທີ່ປອດໄພຊົ່ວຄາວ. ນໍາເອົາເຄື່ອງອຸປະໂພກ-ບໍລິໂພກ ໄປຊ່ວຍເຫຼືອບັນເທົາທຸກແກ່ຄອບຄົວປະຊາຊົນທີ່ໄດ້ຮັບຜົນເສຍຫາຍ ລວມເປັນມູນຄ່າ 23,840,000 ກີບ. ມອບເຄື່ອງຊ່ວຍເຫຼືອສຸກເສີນ ໃຫ້ເມືອງທີ່ຖືກຜົນກະທົບ ເປັນເຂົ້າສານ ຈໍານວນ 600 ກິໂລ ແລະ ນໍ້າດື່ມ ຈໍານວນ 130 ແພັກ. ແກ້ໄຂເສັ້ນທາງທີ່ໄດ້ຮັບຜົນກະທົບຈາກດີນເຈື່ອນຖົມທາງເມືອງຫົງສາ 2 ຈຸດ (ຊາຍແດນຫົງສາ-ໄຊຍະເຂດຫ້ວຍທອງ, ທາງໄປບ້ານທ່າຊ່ວງ), ເມືອງເງິນ 1 ຈຸດ (ທາງໄປບ້ານປາງບົງ) ໃຫ້ທຽວໄດ້ ແລະ ໄດ້ສ້ອມແປງໄຟຟ້າໃຫ້ສາມາດນໍາໃຊ້ໄດ້ເປັນປົກກະຕິ.
ປັດຈຸບັນ, ຄະນະກໍາມະການຄຸ້ມຄອງໄພພິບັດຂັ້ນແຂວງ, ເມືອງ ຍັງສືບຕໍ່ລົງເກັບກໍາຂໍ້ມູນຜົນເສຍຫາຍທີ່ເກີດຂຶ້ນຢູ່ເມືອງທີ່ຖືກຜົນກະທົບໃຫ້ສໍາເລັດ, ແກ້ໄຂ ແລະ ຟື້ນຟູຜົນເສຍຫາຍ ດ້ານຕ່າງໆ ແລະ ລົງກວດກາສຸຂະພາບຂອງປະຊາຊົນບ້ານທີ່ໄດ້ຮັບຜົນກະທົບ ເຝົ້າລະວັງຕໍ່ກັບພະຍາດທີ່ຈະມາກັບລະດູຝົນ.
(ໂດຍ: ຕະວິນຍານ)
ຄໍາເຫັນ