 |
ກອງປະຊຸມຄັ້ງນີ້, ໄດ້ເປັນເອກະສັນຮັບຮອງເອົາບັນດາເນື້ອໃນສໍາຄັນ ໄດ້ຮັບຮອງເອົາບົດລາຍງານການເມືອງທັງສອງພາກ ແຜນພັດທະນານັກຮົບເກົ່າລາວ 5 ປີ; ບົດສໍາຫຼວດການນໍາພາຂອງຄະນະບໍລິຫານງານນັກຮົບເກົ່າແຫ່ງຊາດລາວ ສະໄໝທີ IV ໃນໄລຍະ 5ປີຜ່ານມາ, ກົດລະບຽບສະຫະພັນນັກຮົບເກົ່າແຫ່ງຊາດລາວ ເນື້ອໃນຂໍ້ແຂ່ງຂັນ 3 ດີ 6 ຮັກສາ ຂອງ ສນຫລ ນອກຈາກນັ້ນ ກອງປະຊຸມກໍໄດ້ຮັບຟັງການປະກອບຄໍາຄິດເຫັນຂອງທ່ານລັດຖະມົນຕີກະຊວງປ້ອງກັນປະເທດ, ທ່ານຮອງປະທານສູນກາງແນວລາວສ້າງຊາດ ແລະ ທ່ານຜູ້ຕາງໜ້າ ສະຫະພັນນັກຮົບເກົ່າແຂວງໄຊຍະບູລີ. ໄດ້ຮັບຮອງເອົາບຸກຄະລາກອນຄະນະບໍລິຫານງານ ສນຫລ ສະໄໝທີ V ຈໍານວນ 27 ສະຫາຍ ຍິງ 1 ສະຫາຍ; ໃນນັ້ນໄດ້ ຕົກລົງແຕ່ງຕັ້ງ ສະຫາຍ ພົນໂທ ແສງນວນ ໄຊຍະລາດ ເປັນປະທານສະຫະພັນນັກຮົບເກົ່າແຫ່ງຊາດລາວ, ສະຫາຍ ພົນໂທ ວົງຄຳ ພົມມະກອນ ເປັນຮອງປະທານ ທັງເປັນປະທານກວດກາຄະນະບໍລິຫານງານ ສນຫລ, ສະຫາຍ ພົນຈັດຕະວາ ພອນໃຈ ພັນທະວົງ ເປັນຮອງປະທານ, ສະຫາຍ ພັນເອກ ນາງ ຄໍາໂພ ສິດທິເສນ ເປັນຮອງປະທານກວດກາ.
ໃນໂອກາດດັ່ງກ່າວ ເພື່ອເປັນທິດຊີ້ນໍາເຂົ້າໃນການຈັດຕັ້ງ ແລະ ການເຄື່ອນໄຫວຂອງຄະນະບໍລິຫານງານ ສນຫລ ໃນຊຸມປີຕໍ່ໜ້າ . ກອງປະຊຸມໄດ້ຮັບກ່ຽດ ເຂົ້າຮ່ວມ ແລະ ຮັບຟັງການ ໂອ້ລົມຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ ຊຶ່ງກອ່ນອື່ນສະຫາຍໄດ້ມີບາງຄຳເຫັນ ສະເໜີໃຫ້ ບັນດາສະຫາຍຜູ້ແທນກອງປະຊຸມ, ຄະນະບໍລິຫານງານ ສະຫະພັນນັກຮົບເກົ່າແຕ່ລະຂັ້ນ ເອົາໃຈໃສ່ຜັນຂະຫຍາຍໜ້າທີ່ລວມຂອງພັກ, ຂອງລັດ ແລະ ຂອງອົງການສະຫະພັນນັກຮົບເກົ່າພວກເຮົາ ເພື່ອເປັນແຜນການເຄື່ອນໄຫວຂອງຕົນ ໃຫ້ແທດເໝາະກັບສະພາບຕົວຈິງ ພ້ອມທັງເປັນເຈົ້າການຈັດຕັ້ງປະຕິບັດ ໃຫ້ເປັນຂະບວນຟົດຟື້ນ ຢ່າງກວ້າງຂວາງ ໃນທຸກຂົງເຂດວຽກງານ ແລະ ໃຫ້ເກີດມີໝາກຜົນຕົວຈິງ; ເອົາໃຈໃສ່ຊີ້ນໍາ-ນໍາພານັກຮົບເກົ່າ ເພີ່ມທະວີຄວາມສາມັກຄີຮັກແພງ ລະຫວ່າງ ນັກຮົບເກົ່າດ້ວຍກັນ, ສາມັກຄີຮັກແພງກັບທຸກໆຊັ້ນຄົນໃນສັງຄົມ ແລະ ເປັນກໍາລັງແຮງ ສັງລວມຂອງພັກ ຂອງລັດ ແລະ ຂອງຊາດ; ຊຶ່ງບັນດາສະຫາຍ ລ້ວນແລ້ວແຕ່ແມ່ນຜູ້ມີປະສົບການ ໃນການຕໍ່ສູ້ປົດປ່ອຍຊາດ ກໍຄືໃນການສ້າງສາພັດທະນາປະເທດຊາດ ບົດຮຽນນີ້ ຕ້ອງໄດ້ຖ່າຍທອດໃຫ້ລູກຫຼານເຮົາໃຫ້ຫຼາຍກວ່າເກົ່າ ແລະ ເຮັດໃຫ້ດີຂຶ້ນຕື່ມ, ພ້ອມນີ້ ໃຫ້ສືບຕໍ່ປັບປຸງຍົກລະດັບຖັນແຖວພະນັກງານນັກຮົບເກົ່າຕື່ມອີກ ເຮັດໃຫ້ນັກຮົບເກົ່າ ໄດ້ເຊື່ອມຊຶມແນວທາງນະໂຍບາຍຂອງພັກເປັນປົກກະຕິ, ຮູ້ ແລະ ມີສະຕິເຄົາລົບລັດຖະທໍາມະນູນ, ກົດໝາຍ, ຍົກສູງຈິດໃຈເອກະລາດ ເປັນເຈົ້າຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ; ພ້ອມກັນທົບທວນຄືນມູນເຊື້ອຂອງພັກ, ມູນເຊື້ອວັດທະນະທໍາ, ປະເພນີອັນດີງາມຂອງຊາດ, ຂອງນັກຮົບເກົ່າ ແລະ ຂອງປະຊາຊົນບັນດາເຜົ່າ; ຫັນເອົາການເຄື່ອນໄຫວຂອງຕົນ ລົງສູ່ມະຫາຊົນຢູ່ຮາກຖານບ່ອນທີ່ ມີນັກຮົບເກົ່າດໍາລົງຊີວິດຢູ່ຕົວຈິງ ເຮັດໃຫ້ການສ້າງຮາກຖານ ຕິດພັນກັບການຜະລິດ, ແກ້ໄຂຊີວິດການເປັນຢູ່ຂອງນັກຮົບເກົ່າ, ຕິດພັນກັບການປົກປ້ອງຜົນປະໂຫຍດຕົວຈິງຂອງເຂົາເຈົ້າ ມີຄວາມຮັບຜິດຊອບຕໍ່ການພັດທະນາຕົນເອງ ແລະ ໃຫ້ມີລາຍຮັບເພີ່ມຂຶ້ນ ເຮັດໃຫ້ຊີວິດການເປັນຢູ່ນັບມື້ນັບດີຂຶ້ນ; ບັນດາກະຊວງ-ອົງການ ໂດຍສະເພາະກໍແມ່ນກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ແນວລາວສ້າງຊາດ ແລະ ອົງການຈັດຕັ້ງມະຫາຊົນ ຈົ່ງສືບຕໍ່ໃຫ້ການອູ້ມຊູຊ່ວຍເຫຼືອ ແລະ ເອົາໃຈໃສ່ໃນການເບິ່ງແຍງຊ່ວຍເຫຼືອທາງດ້ານວັດຖຸ ແລະ ຈິດໃຈ, ໃຫ້ໃກ້ຊິດຕິດແທດ ສະຫະພັນນັກຮົບເກົ່າລາວ ເພື່ອໃຫ້ອົງການຈັດຕັ້ງດັ່ງກ່າວ ມີຄວາມໜັກແໜ້ນ, ເຂັ້ມແຂງ ຍິ່ງໆຂຶ້ນ; ເປັນເຈົ້າການປະຕິບັດແນວທາງການພົວພັນຮ່ວມມືກັບສະມາຄົມນັກຮົບເກົ່າປະເທດເພື່ອນມິດ ຕາມແນວທາງການຕ່າງປະເທດຂອງພັກ ເພື່ອຍາດແຍ່ງເອົາບົດຮຽນ, ປະສົບການໃນການຊີ້ນໍາ-ນໍາພາ ແລະ ຍາດແຍ່ງເອົາການຊ່ວຍເຫຼືອຕາມຄວາມເໝາະສົມ, ດຶງດູດເອົາການຮ່ວມມືລົງທຶນໃນຂະແໜງການຕ່າງໆຕາມເງື່ອນໄຂທີ່ພວກເຮົາມີ ໂດຍຕ່າງຝ່າຍຕ່າງມີຜົນປະໂຫຍດ ບົນພື້ນຖານແນວທາງນະໂຍບາຍ, ລະບຽບຫຼັກການທີ່ວາງໄວ້; ເອົາໃຈໃສ່ເບິ່ງຄືນການເຄື່ອນໄຫວຂອງຕົນເອງໃນໄລຍະຜ່ານມາ ເພື່ອເຮັດແນວໃດໃຫ້ຖືກຕ້ອງສອດຄ່ອງ ຕາມພາລະບົດບາດສິດ ແລະ ຂອບເຂດ
ໜ້າທີ່ຂອງຕົນ , ເບິ່ງຄືນທຸກໆເນື້ອໃນຂອງການເຄື່ອນໄຫວ ແລະ ແບບແຜນວິທີເຮັດວຽກຂອງ ສະຫະພັນນັກຮົບເກົ່າທຸກຂັ້ນ, ເອົາໃຈໃສ່ ແລະ ລົງເລິກເຂົ້າວຽກງານການປັບປຸງການຈັດຕັ້ງເປັນຫຼັກ, ແບບແຜນວິທີເຮັດວຽກ ເພື່ອໃຫ້ສະຫະພັນນັກຮົບເກົ່າແຕ່ລະຂັ້ນ ເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ, ໃຫ້ມີຄວາມໜັກແໜ້ນເຂັ້ມແຂງ ສາມາດເປັນຫຼັກແຫຼ່ງ ແລະ ເຮັດໃຫ້ຂະບວນການນັກຮົບເກົ່າ ກ້າວຂຶ້ນຢ່າງບໍ່ຢຸດຢັ້ງ; ສືບຕໍ່ຊີ້ນໍາ, ປະສານສົມທົບ ແລະ ສ້າງເງື່ອນໄຂໃຫ້ການຈັດຕັ້ງນັກຮົບເກົ່າ ທຸກຂັ້ນ ໄດ້ເຄື່ອນໄຫວຕາມພາລະບົດບາດໄດ້ດີກວ່າເກົ່າ ເພື່ອປະກອບສ່ວນຢ່າງຕັ້ງໜ້າ ເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ; ພັກ ແລະ ລັດຖະບານ ຍາມໃດກໍໃຫ້ຄວາມສໍາຄັນ ແລະ ເຊື່ອໝັ້ນຢ່າງໜັກແໜ້ນຕໍ່ ນັກຮົບເກົ່າ ຫວັງວ່າສະຫະພັນນັກຮົບເກົ່າທຸກຂັ້ນ ກໍຄືນັກຮົບເກົ່າທຸກສະຫາຍ ຈະເສີມຂະຫຍາຍມູນເຊື້ອອັນສະຫງ່າອົງອາດ ແລະ ກ້າແກ່ນຂອງຊາດພວກເຮົາ ເດັດດ່ຽວເດີນຕາມເສັ້ນທາງ ແລະ ການນໍາພາຂອງພັກ ບໍ່ຫວັ່ນໄຫວຄອນແຄນຕໍ່ສິ່ງທ້າທາຍທົດສອບ ແລະ ຄວາມຫຍຸ້ງຍາກໃດ; ປະກອບສ່ວນຢ່າງສົມກຽດ ເຂົ້າໃນການຈັດຕັ້ງປະຕິບັດແນວທາງຂອງພັກ, ແຜນພັດທະນາເສດຖະກິດ-ສັງຄົມຂອງລັດ ເພື່ອເຮັດໃຫ້ປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສີວິໄລ ແລະ ຍຸຕິທຳ; ມາໃນເງື່ອນໄຂໃໝ່ນີ້, ບັນດາສະຫາຍ ຍັງຮັກສາໄວ້ໄດ້ມູນເຊື້ອ ແລະ ກຽດສັກສີອັນສູງສົ່ງຂອງຕົນ, ອັນນີ້ແມ່ນປະເສີດ ແລະ ມີຄວາມໝາຍສໍາຄັນຫຼາຍ ແລະ ຈະຍັງຕ້ອງສືບຕໍ່ ຍົກສູງຄັນທຸງອັນນີ້ຕໍ່ໄປ, ເພື່ອໃຫ້ເປັນເສົາຄໍ້າ ແລະ ເປັນແວ່ນແຍງອັນໃສແຈ້ງ ໃຫ້ແກ່ຮຸ່ນລູກ ຮຸ່ນຫຼານ ເພື່ອໃຫ້ລູກຫຼານເຮົາໄດ້ຮໍ່າຮຽນ, ສືບທອດ ແລະ ສືບຕໍ່ພາລະກິດຂອງພັກ, ຂອງຊາດ, ສ້າງປະເທດຊາດ ໃຫ້ຈະເລີນສີວິໄລ ແລະ ເຊື່ອໝັ້ນວ່າ, ຄະນະບໍລິຫານງານ ສະຫະພັນນັກຮົບເກົ່າລາວ ສະໄໝທີ V ນີ້ ຈະສືບຕໍ່ມູນເຊື້ອຄວາມສາມັກຄີ ຮັກແພງ ຊ່ວຍເຫຼືອຊຶ່ງກັນ ແລະ ກັນ ພ້ອມກັນສ້າງຕົນເອງ ເພື່ອນໍາພາວຽກງານນັກຮົບເກົ່າໃຫ້ມີການພັດທະນາຮອບດ້ານ ໄປພ້ອມໆກັບການພັດທະນາລວມຂອງປະເທດຊາດ.
 |
ຂ່າວ-ພາບ: ຍຸພິນທອງ-ບຸນອູ້ມ
ຄໍາເຫັນ