ໄຊຍະບູລີ ປັບປຸງການຈັດຕັ້ງຫ້ອງການ ຍທຂ ເມືອງ

ໃນວັນທີ 4 ເມສານີ້ ເມືອງໄຊຍະບູລີ ແຂວງໄຊຍະບູລີ ໄດ້ຈັດພິທີມອບ-ຮັບຫົວໜ້າຫ້ອງການໂຍທາທິການ ແລະ ຂົນສົ່ງ (ຍທຂ) ເມືອງລະຫວ່າງຜູ້ເກົ່າ ແລະ ຜູ້ໃໝ່ ຢູ່ທີ່ຫ້ອງປະຊຸມຫ້ອງການ ຍທຂ ເມືອງ ໂດຍການເປັນປະທານຂອງທ່ານ ຄຳພຸດ ອິນທະວົງ ຄະນະປະຈຳພັກເມືອງ ຮອງເຈົ້າເມືອງ ຜູ້ຊີ້ນຳວຽກງານຂົງເຂດເສດຖະກິດຂອງເມືອງ, ມີຫົວໜ້າ, ຮອງຫົວໜ້າຫ້ອງການເຂົ້າຮ່ວມ.
    ໃນພິທີ, ທ່ານ ສີສຸກ ສີພານິດ ຫົວໜ້າຫ້ອງການ ຍທຂ ເມືອງ (ຜູ້ເກົ່າ) ໄດ້ຜ່ານບົດສະຫຼູບການຊີ້ນຳ-ນຳພານັບແຕ່ປີ 2014-2023 ບາງຕອນທ່ານກ່າວວ່າ: ສຳລັບຫ້ອງການ ຍທຂ ເມືອງ ທີ່ໄດ້ຈັດຕັ້ງປະຕິບັດຢູ່ພາຍໃນເມືຶອງ ໄຊຍະບູລີທີ່ພົ້ນເດັ່ນມີດັ່ງນີ້: ໂຄງການຈັດຕັ້ງປະຕິບັດຕາມແຜນງົບປະມານມີ 18 ໂຄງການ ມູນຄ່າ 90 ຕື້້ກວ່າກີບ, ສາມາດຈັດຕັ້ງປະຕິບັດສຳເລັດແລ້ວ 12 ໂຄງການ ມູນຄ່າ 49 ຕື້ກວ່າກີບ ແລະ ກຳລັງສືບຕໍ່ຈັດຕັ້ງປະຕິບັດ 8 ໂຄງການ ມູນຄ່າ 41 ຕື້ກວ່າກີບ, ໂຄງການທືນຊ່ວຍເຫຼືອປະກອບມີ 6 ໂຄງການ ມູນຄ່າ 164 ຕື້ກວ່າກີບ ສາມາດຈັດຕັ້ງປະຕິບັດສຳເລັດແລ້ວ 100%, ໂຄງການທືນຊົນນະບົດ ມີ 2 ໂຄງການ ມູນຄ່າ 8 ຕື້໊ກວ່າກີບ, ສາມາດຈັດຕັ້ງປະຕິບັດສຳເລັດແລ້ວ 100%, ໂຄງການກໍ່ສ້າງສ້ອມແປງສຸກເສີນ ມີ 19 ໂຄງການມູນຄ່າ 22 ຕື້ກວ່າກີບ ສາມາດຈັດຕັ້ງປະຕິບັດສຳເລັດແລ້ວ 100%, ໂຄງການກໍ່ສ້າງສ້ອມແປງຫຼັງລະດູຝົນມີ 8 ໂຄງການມູນຄ່າ 12 ຕື້ກວ່າກີບ ສາມາດຈັດຕັ້ງປະຕິບັດສຳເລັດແລ້ວ 100%, ໂຄງການກໍ່ສ້າງຕ້ານເຈື່ອນ ມີ 12 ໂຄງການ ມູນຄ່າ 11 ຕື້ກວ່າກີບ ສາມາດຈັດຕັ້ງປະຕິບັດສຳເລັດແລ້ວ 100% ມີ 9 ໂຄງການ ແລະ ກໍາລັງສືບຕໍ່ຈັດຕັ້ງປະຕິບັດມີ 3 ໂຄງການ, ໂຄງການກໍ່ສ້າງສ້ອມແປງຕ້ານເຈື່ອນຫຼັງລະດູຝົນ ມີ 2 ໂຄງການ ມູນຄ່າທັງໝົດ 4,5 ຕື້ກວ່າກີບ ສາມາດຈັດຕັ້ງປະຕິບັດສຳເລັດແລ້ວ 100%, ຜົນສຳເລັດການກໍ່ສ້າງທາງຊອຍເບຕົງໃນເທດສະບານເມືອງ ຈຳນວນ 15 ເສັ້ນ ລວງຍາວ 2.450 ແມັດ ລວມມູນຄ່າ 3,372 ລ້ານກວ່າກີບ. ໃນນີ້, ທືນຂອງລັດ 1,642 ລ້ານກວ່າກີບ ສົບທົບທືນປະຊາຊົນ  1,498 ລ້ານກວ່າກີບ, ພັນທະອາກອນ 249 ລ້ານກວ່າກີບ ກວມເອົາ 11 ບ້ານ. ຈາກນັ້ນ, ໃນພິທີ ກໍໄດ້ເຊັນບົດບັນທືກມອບ-ຮັບລະຫວ່າງ ທ່ານ ສີສຸກ ສີພານິດ ຫົວໜ້າຫ້ອງການ ຍທຂ ເມືອງ (ຜູ້ເກົ່າ) ແລະ ທ່ານ ເພັດມັງກອນ ສິວິໄລ ຫົວໜ້າຫ້ອງການ ຍທຂ ເມືອງ (ຜູ້ໃໝ່).
(ຂ່າວ-ພາບ: ສົມພົງ ສີສະຫວັດ)