ໄດ້ຈັດຂຶ້ນໃນວັນທີ 24 ມີນາຜ່ານມາ ຢູ່ທີ່ຫ້ອງປະຊຸມຫ້ອງວ່າການແຂວງໄຊຍະບູລີ ພາຍໃຕ້ການເປັນປະທານຂອງທ່ານ ພົງສະຫວັນ ສິດທະວົງ ກໍາມະການສູນກາງພັກ ເລຂາພັກແຂວງ ເຈົ້າແຂວງໄຊຍະບູລີ.
ທ່ານ ພົງສະຫວັນ ສິດທະວົງ ໄດ້ກ່າວວ່າ: ນັບແຕ່ການສ້າງຕັ້ງ ສາທາລະນະລັດປະຊາທິປະໄຕປະຊາຊົນລາວ ເປັນຕົ້ນມາ, ກົງຈັກການຈັດຕັ້ງ ຂອງລະບອບການເມືອງປະຊາທິປະໄຕປະຊາຊົນ ໄດ້ຮັບການປັບປຸງ ບູລະນະຢ່າງຕໍ່ເນື່ອງເຮັດໃຫ້ການນໍາພາ ຊີ້ນໍາ, ການບໍລິຫານຄຸ້ມຄອງ ໄດ້ມີຈິດໃຈໃໝ່ ແລະ ຂະຫຍາຍຕົວຂຶ້ນຢ່າງບໍ່ຢຸດຢັ້ງ, ສາມາດເສີມຂະຫຍາຍ ແລະ ດໍາລົງບົດບາດ ໃນການຫັນແນວທາງ ປ່ຽນແປງໃໝ່ຂອງພັກ ມາເປັນນະໂຍບາຍ, ເປັນແຜນພັດທະນາ, ເປັນກົດໝາຍ ເພື່ອອໍານວຍຄວບຄຸມການບໍລິຫານ, ຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ເມື່ອທຽບກັບໜ້າທີ່ການເມືອງຂອງພາລະກິດປະຕິວັດຂອງພັກເຮົາແລ້ວ ກົງຈັກການຈັດຕັ້ງຂອງປະເທດເຮົາ ຍັງບໍ່ທັນໜັກແໜ້ນ, ເຂັ້ມແຂງ ໄດ້ຢ່າງເຕັມສວນ, ຈຶ່ງຕ້ອງໄດ້ມີການປັບປຸງປ່ຽນແປງໄປຕາມລະດັບການຂະຫຍາຍຕົວທາງດ້ານການເມືອງ, ການພັດທະນາເສດຖະກິດ-ສັງຄົມ ກໍຄື ການປ່ຽນແປງດ້ານແນວທາງ, ແຜນນະໂຍບາຍ ຂອງພັກ ໃນແຕ່ລະໄລຍະ. ຈາກນັ້ນ, ຜູ້ເຂົ້າຮ່ວມໄດ້ຮັບຟັງການເຜີຍແຜ່ມະຕິ 02/ຄບສພ ລົງວັນ ທີ 7 ມີນາ 2025 ຂອງຄະບໍລິຫານງານສູນກາງພັກ ກ່ຽວກັບກອງປະຊຸມຄົບຄະນະສະໄໝວິສາມັນຂອງຄະນະບໍລິຫານງານສູນກາງພັກ ສະໄໝທີ XI, ມະຕິ 03/ຄບສພ ລົງວັນທີ 12 ມີນາ 2025 ວ່າດ້ວຍການປັບປຸງກົງຈັກການຈັດຕັ້ງ, ຜ່ານແຈ້ງການຂອງກົມໃຫຍ່ການເມືອງ ກະຊວງປ້ອງກັນຄວາມສະຫງົບ ສະບັບເລກທີ 971/ກມປສ ລົງວັນທີ 24 ກຸມພາ 2025, ຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 138/ຄພຂ.ຊຍ ລົງວັນທີ 20 ມີນາ 2025 ວ່າດ້ວຍການແຕ່ງຕັ້ງຄະນະຮັບຜິດຊອບປັບປຸງກົງຈັກການຈັດຕັ້ງຂັ້ນແຂວງ. ພ້ອມດຽວກັນນີ້ ຍັງໄດ້ພ້ອມກັນປະກອບຄໍາຄິດຄໍາເຫັນຕໍ່ກອງປະຊຸມເພື່ອໃຫ້ກອງປະຊຸມດັ່ງກ່າວໄດ້ຮັບຜົນຕາມທີ່ວາງໄວ້.
(ຂ່າວ+ພາບ: ຄໍາໝັ້ນ)
ຄໍາເຫັນ