 |
ທ່ານ ຄໍາຫຼ້າ ຜິວວັນນາ ກໍາມະການປະຈໍາພັກແຂວງ ເລຂາຄະນະບໍລິຫານງານພັກເມືອງໄຊຍະບູລີ ກ່າວວ່າ: ການຈັດພິທີສະເຫຼີມສະຫຼອງແມ່ນສຸດທີ່ມີຄວາມໝາຍຄວາມສໍາຄັນ, ຄວາມເປັນຫ່ວງເປັນໃຍຂອງການຈັດຕັ້ງພັກ-ລັດ ແລະ ທົ່ວສັງຄົມທີ່ມີຕໍ່ຊັບພະຍາກອນປ່າໄມ້ອັນລໍ້າຄ່າ, ເຮັດໃຫ້ຊັບພະຍາກອນປ່າໄມ້ມີຄວາມອຸດົມສົມບູນ ເປັນແຫຼ່ງທີ່ຢູ່ອາໃສຂອງສັດປ່າ, ຮັກສາແຫຼ່ງນໍ້າ, ຮັກສາຄວາມສົມດຸນທາງດ້ານລະບົບນິເວດ ແລະ ຊີວະນາໆພັນ, ກໍຄືຄວາມເປັນຫ່ວງເປັນໃຍຕໍ່ອະນາຄົດຂອງລູກຫຼານເຍົາວະຊົນ ຜູ້ຈະເປັນໜໍ່ແໜງ ແລະ ສືບທອດພາລະກິດປະຕິວັດຂອງຊາດ ຊຶ່ງ “ເດັກໃນວັນນີ້ ຄືຜູ້ໃຫຍ່ໃນວັນໜ້າ, ເດັກຄືອະນາຄົດຂອງປະເທດຊາດ” ການປູກຈິດສໍານຶກໃຫ້ລູກຫຼານເຍົາວະຊົນ ແລະ ທົ່ວປວງຊົນ ໃຫ້ມີ ຈິດສໍານຶກຕໍ່ການຄຸ້ມຄອງປົກປັກຮັກສາປ່າໄມ້ ແລະ ສິ່ງແວດລ້ອມ ໃຫ້ມີຄວາມສົມດູນທາງນິເວດ ວິທະຍາ, ໝັ້ນຄົງ.
ເພື່ອເປັນການຄຸ້ມຄອງ, ປົກປັກຮັກສາ, ພັດທະນາ ແລະ ນໍາໃຊ້ຊັບພະຍາກອນປ່າໄມ້ແບບຍືນຍົງ. ພັກ ແລະ ລັດຖະບານ ໄດ້ວາງແຜນຍຸດທະສາດວຽກງານປ່າໄມ້ ຮອດປີ 2035, ກໍຄື 7 ແຜນງານ ແລະ 4 ວຽກຈຸດສຸມປິ່ນອ້ອມ ຂອງກະຊວງກະສິກຳ ແລະ ສິ່ງແວດລ້ອມ ໂດຍເນັ້ນໃສ່ການຄຸ້ມຄອງ, ປົກປັກຮັກສາປ່າໄມ້ ເຮັດໃຫ້ອັດຕາການປົກຫຸ້ມຂອງປ່າໄມ້ກວມ 70% ຂອງເນື້ອທີ່ທົ່ວປະເທດ ດ້ວຍ ການປູກໄມ້, ເຄື່ອງປ່າຂອງດົງ ໃຫ້ໄດ້ 5 ແສນເຮັກຕາ, ຟື້ນຟູປ່າໄມ້ໃຫ້ໄດ້ 1.3 ລ້ານເຮັກຕາ ແລະ ຫຼຸດຜ່ອນທາດອາຍເຮືອນແກ້ວໃຫ້ໄດ້ 55 ລ້ານໂຕນ. ໃນປີ 2026 ນີ້, ທົ່ວແຂວງໄຊຍະບູລີ ມີສວນກ້າເບ້ຍໄມ້ຈໍານວນ 71 ແຫ່ງ (ຂອງລັດ 14 ແຫ່ງ, ຂອງປະຊາຊົນ 41 ແຫ່ງ, ຂອງບໍລິສັດ 16 ແຫ່ງ), ສາມາດເກັບແກ່ນພັນໄມ້ໄດ້ 44,034 ກິໂລ, ຜະລິດເບ້ຍໄມ້ ໄດ້ 4 ລ້ານກວ່າເບ້ຍ, ທຽບໃສ່ແຜນການປະຕິບັດໄດ້ 186.30% ແລະ ມາຮອດປັດຈຸບັນໄດ້ປູກໄມ້ ກ່ອນວັນທີ 1 ມິຖຸນາ 2026 ຈໍານວນ 281 ຕອນ, ເນື້ອທີ່ 736.46 ເຮັກຕາ, ປູກໄມ້ໄດ້ 328,185 ເບັ້ຍ, ສໍາລັບປູກໃນວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2026 ທົ່ວແຂວງ ຈະປູກຈຳນວນ 36 ຕອນ, ເນື້ອທີ່ 82 ເຮັກຕາ, ມີເບັ້ຍໄມ້ 32,238 ເບ້ຍ ແລະ ຈະສືບຕໍ່ປູກຮອດວັນທີ 30 ສິງຫາ 2026 ໃຫ້ໄດ້ຫຼາຍກວ່າ 1 ພັນເຮັກຕາ, ຟື້ນຟູປ່າໃຫ້ໄດ້ 25,000 ເຮັກຕາຂຶ້ນໄປ.
ການສະເຫຼີມສະຫຼອງຄັ້ງນີ້ ຍັງຈັດກິດຈະກຳການສະແດງສິລະປະວັນນະຄະດີຈາກນ້ອງນ້ອຍນັກຮຽນຈໍານວນ 3 ລາຍການ.
ຂ່າວ: ໄຊຍະບູລີ
ຄໍາເຫັນ